Пыр шензя да нимкодяся зарни киа йӧзӧн. Сетлӧма тай Енмыс налы сям-кужӧмлун да енби! Ӧти татшӧм анькӧд и кӧсъя тӧдмӧдны "Коми му" лыддьысьӧс.
Нина Станиславовна Макаровалӧн кипом уджъясӧн позьӧ помтӧг нимкодясьны… Мыйсӧ сӧмын оз куж кыны-вурны: и уна сикас акань-чача, и олыся-видзӧг, и керка пытшкӧс мичмӧдантор да тшӧтш и сюмӧдысь вӧчӧмтор. Но ас киӧн вӧчӧмторйысь медся унаыс – мича акань. Сы мында нин чукӧрмӧма, ань весиг аканьяслысь музей восьтӧма.
Ачыс Нина Станиславовна Кӧрткерӧс районса Ыджыдвиддзысь, ӧні олӧ орчча Зулӧб грездын, 14 во нин веськӧдлӧ сэтчӧс культура керкаӧн. Районса, а тшӧтш республикаса гаж-фестиваль дырйи сылӧн юрнуӧдӧм улын петкӧдчӧны челядьлӧн "Шонді" да верстьӧяслӧн "Сударушка" котыръяс. Ок, и мичаа йӧктӧны да сьылӧны-ливкйӧдлӧны! А костюмъясыс кутшӧм мичаӧсь! Сьӧлӧмсяньыд нимкодясян!
Нӧшта сиктса ань ёна радейтӧ быдтыны дзоридзьяс, ас йӧрас да керка пытшкас кутшӧм сӧмын оз дзоридзав-быдмы! Неважӧн Нина Станиславовна пасйис ассьыс мича тшупӧда пас. Сьӧлӧмсянь чолӧмалам енбиа да водзмӧстчысь аньӧс, сиам керка тыр шуд да крепыд дзоньвидзалун. Мед уна на мича акань сылӧн ки помысь чужас-артмас.
