Май 19-26 лунъясӧ миян республикаса 260 школаын 9-ӧд да 11-ӧд класса 13.632 велӧдчысьлы триньгас бӧръя звӧнок.

Таво тайӧ луныс торйӧн нин виччысяна и челядьлы, и бать-мамлы. Ӧд пандемия понда кольӧм во школа помалысьяслы татшӧм гажсӧ эз котыртлыны.

Видзӧдан тайӧ мичаник паськӧма, кыпыд чужӧма ныв-зон вылас да чуймалан: кутшӧм жӧ ӧдйӧ котӧртӧ-тюрӧ кадыс. Быттьӧ тӧрыт на тайӧ челядьсӧ гырысь классын велӧдчысьяс киӧдыс кутӧмӧн нуӧдісны сентябрса "линейка" вылысь медводдзаысь на парта сайӧ. А со нюжалӧмаӧсь и сӧвмӧмаӧсь, мичаммӧмаӧсь и верстяммӧмаӧсь.

Май 22 лунӧ бӧръя звӧнок триньӧбтас и Кулӧмдін районысь Пожӧгса шӧр школа помалысь ӧкмыс мортлы. На пиысь быдӧн йылысь позьӧ висьтавны зэв уна бур кыв. Ас кадӧ ставныс вӧліны районса да республикаса олимпиада-конкурсъясын вермысьясӧн. Эз кольччывны и спортын.

Школаын босьтӧм тӧдӧмлуныс сетас ныв-зонлы позянлун пырны велӧдчыны вылыс да шӧр тшупӧда велӧдчанінъясӧ. Тайӧ классыс мукӧдсьыс пыр торъявліс тӧдӧмлун азыма босьтӧмнас, старанньӧнас, ӧта-мӧдыслы отсасьӧмнас. Урок кежлӧ дасьтӧмторйыд пыр эз судзсьывлы, ковмыліс сетны содтӧд тӧдӧмлун. И найӧ ставсӧ тайӧс, позьӧ шуны, здукӧн ньылыштлісны позйын пукалысь кайпиян моз, кор найӧс вердлісны мам-батьыс, да вом паськӧдӧмӧн корлісны содтӧд.

Владимир ШОМЫСОВ