Май 7 лунӧ Сыктывкарын петкӧдчис Игорь Моисеев нима мир пасьтала нималана государственнӧй академическӧй ансамбль. "Танцы народов мира" программаын артистъяс петкӧдлісны уна сикас войтырлысь йӧктӧмъяссӧ.
Тайӧ яръюгыд концертсӧ найӧ сиисны Коми Республикалӧн 100 вося юбилейлы да Айму вӧсна Ыджыд тышын Вермӧмлы. Ансамбльлӧн волӧмыс артмис республикаса филармониялӧн – "Танцуй и пой, Великая Россия!" IV фестивалькӧд йитӧдын.
Социалистическӧй Уджвывса герой, балетмейстер Игорь Моисеев пыдісянь туялӧма йӧзкостса йӧктӧмъяс, кытысь босьтӧма колана да аслыспӧлӧс вӧрас да трюкъяс.
Ансамбльлӧн, кодӧн ӧні веськӧдлӧ Россияса народнӧй артистка Елена Щербакова, куимсёысь унджык хореография постановка.
Сцена вылын котырыс петкӧдчӧ 80 сайӧ во нин, сійӧс пасйӧма "Дружба народов" орденӧн.
"Танцы народов мира" – чуймӧдана петкӧдчӧм, кӧні ӧтлаалӧма хореография искусстволысь уна сикас бан: классика да йӧзкостса йӧктӧмъяс, акробатика да трюкъяс.
Енбиа артистъяс йӧктісны роч "Лето", белорусъяслысь "Юрочка", грекъяслысь "Сиртаки", молдавияса йӧктӧмъяс, аргентинаса пастукъяслысь "Гаучо", нималана "Яблочко" да с.в.
Кыдзи висьталіс ансамбльӧн художествоа веськӧдлысь Елена Щербакова, Игорь Моисеевлӧн хореография постановкаясыс – шедевръяс. Кӧть и пуктӧма найӧс уна во сайын, оз важмыны, весиг выльмӧдны оз ков. Татшӧм хореография уджыс сэсся некодлӧн абу.
–Быд йӧктӧм вӧлі аслыспӧлӧс мича. Но медся ёна меным кажитчис калмыкъяслӧн йӧктӧм да "Партизаны" хореография постановка, – юксьӧ аслас сьӧлӧмкылӧмъясӧн Татьяна Потапова. – Воддзаас артистъяс быттьӧ ракаясӧ пӧрины, вӧрасныс вӧлі дзик лэбачлӧн кодь. Кыдзи тадзи кужӧны! А "Партизаны" видзӧдігӧн и нюмӧй петіс, и синваӧй. Кор петісны буркаа йӧктысьяс – быттьӧ кывтісны. Орччӧн пукалысь суседӧй бокӧ тойыштіс, ролик вылын пӧ найӧ тюрӧны. Оз! Кокныс сэтшӧм ӧдйӧ вӧрӧ!
А сэсся кутісны чеччавны, лэбавны, быттьӧ вӧв вылынӧсь, мыйкӧ кыйӧдӧны, тышкасьӧны… Мастерӧсь йӧктыны, кокныс, майбыр, печласьӧ!
Олӧмыс – йӧктӧм
Игорь Моисеев чужӧма Киевын 1906 вося январь 21 лунӧ. Батьыс – гӧльмӧм дворянин, юрист, тшӧкыда вӧвлӧма Парижын, кӧні и тӧдмасьӧма модистка Анна Грэнкӧд. Александр Моисеев вайӧма гӧтырсӧ Киевӧ.
Гозъя олӧмаӧсь бура. Но мужичӧй тшӧкыда кулитӧма власьтсӧ, мыйысь сійӧс пуксьӧдӧмаӧсь дзескыдінӧ. Ичӧтик Игорьӧс Анна нуӧма Парижӧ, а ачыс бӧр воӧма Киевӧ мездыны верӧссӧ дзескыдінысь. Кор ставыс ладмӧма, ань бӧр вайӧдӧма писӧ гортас.
Игорь ичӧтсяньыс тӧдмасьӧма асыввывса культуралӧн историяӧн, музицируйтӧма, серпасасьӧма. А кор зонкалы тырӧма 14 арӧс, сетӧмаӧсь балетӧ. Велӧдӧма сійӧс Большой театрын вӧвлӧм йӧктысь Вера Масолова, коді и казялӧма Игорь Моисеевлысь енбисӧ.
Нёль во мысти нин том морт ачыс йӧктӧма Большой театрын. Регыд мысти гӧгӧрвоӧма, мый позьӧ и аслыс дасьтыны постановкаяс. 1926 воын Игорь Моисеев да режиссёр Симонов дасьтӧмаӧсь "Красавица с острова Лю-Лю" балет. А во мысти Моисеевлы вӧзйӧмаӧсь дасьтыны Большой театрын "Футболист" балет. Сэки Игорьлы вӧлӧма сӧмын на 24 арӧс. Тайӧ балетсьыс юкӧн петкӧдлісны и ӧнія концерт дырйи.
Игорь Моисеевлы окота лоӧма туявны уна сикас войтырлысь йӧктӧмъяс. Гастрольясӧ ветлігӧн сійӧ тӧдмасьӧма наӧн. Дасьтӧма аслыспӧлӧс репертуар, кодлӧн юкӧнӧн и тӧдмӧдісны сыктывкарсаӧс. Игорь Моисеевӧс шуӧны выль йӧктан жанрлы – сценавывса народнӧй йӧктӧмлы – подув пуктысьӧн.
Игорь Моисеев вуджӧма кузь нэм, сылӧн шуда олӧмыс ставнас йитчӧма йӧктӧмкӧд.
Енбиа хореограф кувсьӧма 2007 вося ноябрь 2 лунӧ. Сылы вӧлӧма 101 арӧс. Нималана йӧктысьӧс дзебӧмаӧсь Москваын Новодевичье шойна вылын.
