Надежда Никитиналӧн чибукъяс

Надежда Никитиналӧн чибукъяс
Надежда Никитиналӧн чибукъяс
logo
Надежда Никитиналӧн чибукъяс
Снимокъясыс Виталий ЧЕРНЕГАЛӦН

Талун Удораса гежӧд сикт-грездын аддзывлан вӧвтӧ. Тайӧ статя, мича да вежӧра пемӧсъяссӧ вежис техника. А со Вачӧртыдінын буретш во сайын овмӧдчисны куим вӧв: сьӧд, кельӧй да еджыд, да Ральф пони. Вашка вылын тайӧ мича грездас найӧ воисны кӧзяйкаыскӧд, Надежда Никитинакӧд, коді ньӧбис татысь керка.

…Надежда казак рӧдысь. Вӧвъяссӧ радейтӧмаӧсь-вӧдитӧмаӧсь батьыс и пӧльыс. Сыктывкар бердса Выльгортын, кӧні быдмӧма, уджалӧ вӧла спортшкола, сэні Надежда вошласьӧма лунтыръясӧн. Дӧзьӧритӧма пемӧсъяс бӧрся, тӧдмалӧма накӧд уджлысь гусяторъяссӧ, пырӧдчӧма и уна сикас ордйы-сьӧмӧ да новлӧдлӧма челядьӧс Сыктывкарса шӧр изэрдын.

Да кӧть профессиясӧ бӧрйӧма пемӧсъяскӧд йитчытӧмӧс — велӧдчӧма пусьысьӧ, со кызь во нин сылӧн уджыс топыда йитчӧма чибӧяскӧд.

Мыйла бӧрйӧма Вачӧртыдін?

—Ме пыр кӧсйи овны сикт-грездын, — висьталӧ Надежда. — Зэв ёна радейта вӧр-ва, чери кыйны, тшак вотны, дӧзьӧритны пемӧсъяс бӧрся. Карын меным быттьӧ сынӧдыс эз тырмы. Да и челядьыдлы сиктад лӧсьыдджык. А тані со пожӧма яг, орччӧн ю, суседъяс шаньӧсь. Верӧсӧй менам удораса, овліс да уджавліс Благоевын. Вачӧртыдінын керкасӧ ньӧбим мам капитал весьтӧ. Сӧмын тай тавося кӧдзыдъяс дырйи петкӧдчис, мый оланінным шоныдсӧ омӧля кутӧ. Ковмас бура дзоньтавны.

3-1.jpg

Керка мышкас гозъялӧн кыпӧдӧма нин конюшня. Турунсӧ мӧйму асьныс пуктылӧмаӧсь и бокысь ньӧбӧмаӧсь.

—Миян вӧвъясным арлыдаӧсь нин, уна ордйысьӧмын петкӧдчылӧм вӧвлӧм спортсменъяс. Тайӧ пемӧсъясыс олӧны шӧркодя 30-35 во, а менам видзанторъясӧй 19, 20 да 27 арӧсаӧсь. Ме чайта, вӧвтӧ колӧ видзны олӧм помӧдзыс. А медым пемӧсыслы овсис кокньыдджыка, сылы пыр колӧ вӧрны. Мортлы моз вӧлыдлы вӧрӧмын олӧмыс и эм. Буретш та вӧсна ме новлӧдла наӧн челядьӧс.

Сійӧ ӧні сиктын лӧнь, а гожӧмнас тані зонпосниыс зэв уна. Волӧны бать-мамыскӧд, гӧститӧны пӧль-пӧч орданыс.

Татшӧмъясыслы зэв нимкодь вӧлӧн ветлӧмсьыс. Тыр арлыдтӧмъяс окотапырысь дӧзьӧритӧны пемӧсъяс бӧрся. Кольӧм во ми накӧд весиг ордйысьӧмъяс котыртлім, кубок-медальӧн пасйим. Кута лача, таво гожӧм бара на аддзысьлам, — висьталӧ Надежда.

Кӧть ветеринарӧ абу велӧдчылӧма, видзанторъяссӧ ань бурдӧдӧ ачыс. Вӧчӧ укол, вермӧ весиг неыджыд дояин вурыштны.

Вӧвъяссӧ мамыс моз жӧ зэв ёна радейтӧ вит арӧса Антонина нылыс. Нимкодьпырысь вердӧ пемӧсъясӧс да и пониӧн ветлӧ. Тайӧ ичӧтик чибуксӧ бать-мамыс козьналӧмаӧсь чужан лун кежлас. Тоня зэв визув да варов, зілис висьтавны радейтана вӧвъяс да понъяс йывсьыс дзик-дзик ставсӧ.

Збыльысь, чибӧяскӧд орччӧн тан зэв лӧсьыда олӧны понъяс. Татшӧмыс вит. Кыксӧ видзӧны кӧзяеваыслӧн Благоевын тӧвйигкості, а мукӧдыс — Надеждаӧн аддзӧм да мездӧмторъяс.

32.jpg

Мичлуннас, кыпыд да гажа ловрунас торъялӧ Зефир — австралийскӧй пӧрӧдаа пон.

Вӧвъясӧс снимайтігкості сійӧ пыр бергаліс кок улын, зілис тшӧтш веськавны кадрӧ.

Кӧть мукӧд челядь сиктын абуӧсь, визув Тоняӧс гажтӧм оз босьт. Ворсыштас кык арӧса Лиза чойыскӧд, да бара ывлаӧ, радейтана пемӧсъяс дорӧ. Челядьлы садйыс грездын абу да, чойяс олӧны гортаныс, но локтан восянь Надежда кӧсйӧ новлӧдлыны найӧс Благоевӧ. Машинасӧ ньӧбӧма нин, коли пӧ сӧмын велӧдчыны да босьтны руль сайын ветлан право.

Водзӧ вылӧ мӧвпалӧны ньӧбны мӧс да вӧдитны тшӧтш курӧг-индюк, сямыс ӧд эм нин. Горт дорас — ыджыд теплица, эм кӧні быдтыны ӧгуреч-помидор да переч. А сэсся позьӧ и асшӧр предприятие-ИП восьтыны.

Ӧні жӧ Надежда кага видзан отпускын. Верӧсыс ветлӧма уджавны вахтаӧн, ӧні гортас жӧ, нокыс ӧд овмӧсас уна.

…Вачӧртыдінса чибӧясӧс тӧдӧны нин Солнечнӧйын да Благоевын. Орчча посёлокъясӧ Надеждаӧс пемӧсъяснас корлӧмаӧсь культураын уджалысьяслысь гаж да дзоньвидзалун видзан лун пасйыны.

—Благоевын зэв уна кагаӧс новлӧдлім, весиг эг чайт, мый та мында чукӧрмас, — шензьӧ Надежда. — Гажсӧ котыртысьяссянь уна аттьӧалана кыв вичмис. Нимкодь.