Новости Республики Коми | Комиинформ

"Менам рольяс – сикӧтш мольяс"…

"Менам рольяс – сикӧтш мольяс"…
"Менам рольяс – сикӧтш мольяс"…
logo
"Менам рольяс – сикӧтш мольяс"…
Снимокъясыс театрса архивысь

Пандемия понда дыр кад коставлӧм бӧрын Коми Республикаса вужвойтырлӧн шылада-драмаа театрысь артистъяслӧн бара лоис позянлун петкӧдчыны асланыс спектакльясӧн сиктса культура керкаясын.

А гастрольысь гажныс налӧн ёна нин бырӧма. И сиктсалы, кыдз тыдовтчӧ, зэв жӧ нин окота аддзысьлыны радейтана артистъясыскӧд.

Коми театрын ворсысьяс ветлiсны нин Сыктывдін районса Ыбӧ да Паджгаӧ, кӧнi котыртлісны Елена Чувьюровалысь "Менам рольяс — сикӧтш мольяс" творчествоа рыт.

Тайӧ кыпыд аддзысьлӧм дырйиыс сыктывдiнсаяс тӧдмалiсны Коми Республикаса заслуженнӧй артистка йылысь уна выльтор.

Елена висьтасис, кыдзи сылӧн артмис лоны артисткаӧн, ӧд первойсӧ сiйӧ кӧсйӧ вӧлӧм велӧдчыны уджавны текстильнӧй фабрикаын.

Казьтывлiс и ассьыс медводдза рольяссӧ да кутшӧм сьӧлӧмкылӧмъяс накӧд йитчӧмаӧсь. Аслас ёрт-артистъяскӧд ӧтвылысь Елена гажӧдiс видзӧдысьясӧс серамбана петкӧдчӧмъясӧн, тшӧтш и сьылiс.

31.jpg

Февраль 21 лунӧ "Менам рольяс — сикӧтш мольяс" рытсӧ нуӧдісны Ем-дін районса Кӧжмудорын, а март 13 лунӧ шылада-драмаа театрын вор- сысьяскӧд тайӧ аддзысьлӧмыс лоас Княжпогост районса Сьӧська сиктын.

Театрса котыр сідзжӧ ветлiс тайӧ районас Синдор грездӧ да Чимиавӧрӧк посёлокӧ, кӧнi петкӧдлісны "Шудлы шуДА" концерт-сёрни.

Андрей Епанешников варовитiс видзӧдысьяскӧд олӧмас шуд йылысь, а Оля Сан сьылiс коми да роч сьыланкывъяс.

Синдорын да Чимиавӧрӧкын кызвын олысьыс роч, и коми театрысь артистъяс сэтчӧ шоча волывлӧны. Но налы сэні век радӧсь, и та пӧрйӧ зэв шоныда да кыпыда вочаалісны найӧс и клубын уджалысьяс, и видзӧдысьяс.

Кольӧм вежонӧ четвергӧ Сыктывдінса Выльгортын петкӧдлісны "Баба гожӧм", пекничаӧ — Сыктыв районса Куратовын "Кык бать" спектакль.

32.jpg

"Баба гожӧмсӧ" видзӧдысьяс торйӧн нин ёна ошкӧны: и мыла сьыланкывъяссӧ, и артистъяслысь бура ворсӧмсӧ, и яръюгыд паськӧмсӧ да сценавывса мича серпассӧ.

Алексей Поповлысь тайӧ тешсӧ петкӧдласны февраль 27 лунӧ Емваын, мартын — Кӧрткерӧс районса Одыбын, а сідзжӧ Визинын да Айкатылаын. Тайӧ тӧлысяс жӧ театр ветлас Сыктывдінса Час сиктӧ "Кимӧститчысьяс" спектакльӧн.

Вужвойтырлӧн шылада-драмаа театрын ворсысьяслӧн кыпыд да сьӧлӧм вӧрзьӧдана петкӧдчӧмъясыс бара на бурмӧдӧны сиктса войтырлысь сьӧлӧмсӧ.

И водзӧ видза корам ставнысӧ коми спектакльяс вылӧ!

* * *

Тайӧ жӧ лунъясӧ коми театрын ворсысьяс петкӧдчасны юркарын. Февраль 26 лунӧ Сыктывкарса администрация керкаын концертасян залын позяс видзӧдны "Гажа-курыд теш", кӧні артистъяс ворсӧны серамбана миниатюраясын, а сідзжӧ сьылӧны да йӧктӧны.

Елена Чувьюровалӧн "Менам рольяс — сикӧтш мольяс" кыпыд рыт мунас февраль 28 лунӧ Бабушкин уличаса 4-ӧд номера керкаын театрса ичӧт залын. "Шудлы шуДА" концерт юргас сэні жӧ март 20 лунӧ.

Вужвойтырлӧн шылада-драмаа театрлӧн локтан тӧлысся репертуарын жӧ — "Медся муса, медся мича" концерт (юргас март 4 лунӧ), "Кабаре "Сыктывса кань" водевиль (март 12 лунӧ), "Ставсьыс мыжаыс Париж" теш (март 26 лунӧ). Ставсӧ тайӧс позяс видзӧдны юркарса администрациялӧн концертасян залын. А театрлӧн ичӧт залын шуӧма петкӧдлыны "Квартирник" концерт (март 6 да 28 лунъясӧ) да "Нёрымӧ дядьӧ" мойд (март 21 лунӧ).