Мӧйму гожӧм Сталинград вӧсна вир кисьтана чорыд тыш-кось мунанінын поискӧвикъяс "кыпӧдісны" куим салдатӧс и аддзисны винтовка патронӧ гартыштӧм кабала. Сэтчӧ вӧлі гижӧма: "Час сайын куліс Башкирияысь Володя Емельянов, и ме, Василий Николаевич Диген, коли ӧтнам. Фашистъяс дугдывтӧг лыйлӧны миномётысь. Ме ранитчи и дыр ог нин ов. Войнас ротаысь ловйӧн кольӧмаяс пышйисны фашист-гадъяс дорӧ, но найӧс век жӧ мыждасны таысь коркӧ. А ме кула, но вӧрӧглы ог сетчы. Юӧртӧй менам гӧтырлы Анна Фёдоровналы Чкалов (ӧні — Оренбург) обласьтӧ, мый ме, кыдзи верми, дорйи Рӧдинаӧс. Ми победитам. 1942 во, август 30 лун. Диген В.Н. Босьтӧй меысь водзӧс, ёртъяс!".
Тайӧ кывъясыс висьталӧны, мый поискӧвикъяслӧн уджыс зэв колана, кӧть и кодсюрӧ шуасьӧны, муыс пӧ вевттис нин ставсӧ, эн вӧрӧдӧй нинӧм. Салдатлӧн пасйӧдыс со воис йӧзӧдз.
"Наследие" отрядса боечьяс кывкӧрталісны кольӧм вося уджсӧ Чужан му дорйысьлӧн лун водзын. Чилимдін районса кадет школаысь Василий Носов да Сыктывкарса университетысь студент Полина Игнатова ветлісны Псков обласьтса Невель районӧ Паметь вахта вылӧ. Сэні Турки-Перевоз грезддорса братскӧй гуӧ дзебисны 69 салдатлысь коляссӧ.
Кулӧмдін районса Габов грездын водзӧ дзоньталісны Салдатлысь керка. 2020 вося ноябрын йӧзӧдісны Сергей Таскаевлысь "По следам печорского десанта. Экспедиции 1988-2002 гг." небӧг. А тайӧ сбор дырйиыс тӧдмӧдісны сылӧн выль книгаӧн — "Жизнь не вернуть, верните имена… (об участии бойцов ПО "Наследие" имени лётчика-истребителя Н.К.Лошакова во Всероссийской Вахте Памяти 2003-2020 гг.)". Сэні пасйӧма, мый поискӧвикъяс туялӧмаӧсь 8 усьӧм салдатлысь ним-овсӧ.
Отрядӧ пырысь Юлия Корецкая "Отечество — земля Коми" конференция вылын висьталіс аслас прадедъяс йылысь. "Сёльыбсянь Берлинӧдз" уджсӧ кывзасны и Москваын ставроссияса конкурс вылын нин.
Сбор дырйи поискӧвикъясӧн лоисны Екатерина Бажитова, Николай Ветошкин, Дария Семяшкина, Софья Филиппова.
Комиын туясьысь-корсьысьысьяслӧн ӧтмунӧмӧн юрнуӧдысь Александр Пановлӧн кывъяс серти, республикаысь дас кык отряд уджалӧны Карелияын, Ленинград, Новгород, Псков да мукӧд обласьтын.
