Новости Республики Коми | Комиинформ

Кыкнанныслы – "100 Коми"

Кыкнанныслы – "100 Коми"
Кыкнанныслы – "100 Коми"
logo

"МузМир" котыртліс "Асъя кыа" ансамбль да Ухтаысь "United Bit" котыр костын йӧктан баттл, кодӧс нуӧдісны онлайн.

Кыдзи пасйис "МузМир" котырӧн веськӧдлысь Сергей Лебедев, тайӧ уджтассӧ найӧ сиӧмаӧсь Коми Республикалӧн 100 вося юбилейлы, мед мир пасьталаын нимӧдны чужанін.

–Талунъя баттлын ордйысьӧны Комиысь кык нималана котыр. И ордйысьӧмыс лоӧ зэв аслыспӧлӧс да яръюгыд, сы вӧсна мый налӧн хореографияыс торъялӧ – ӧтиыс йӧз-костса, а мӧдыс хип-хоп. Сідзкӧ, лоӧ нӧшта на жарджык баттл, – юӧртіс ордйысьӧм водзын Сергей Лебедев.

И збыльысь, "Скалалӧн" жырйын вӧлі зэв жар! Ӧд тайӧ зэв аслыспӧлӧс ордйысьӧм. Быттьӧ и оз позь котыръяссӧ орччӧдны, хореографияыс торъялӧ да. Но кык йӧк-тан котырлысь петкӧдчӧмсӧ видзӧдны вӧлі зэв интереснӧ.

Кыдзи висьталіс "Асъя кыа" ансамбльӧн веськӧдлысь Дмитрий Бушуев, артистъяс кӧть и петкӧдчылӧмаӧсь мирса некымын сцена вылын, но татшӧм ордйысьӧмын – медводдзаысь на. "United Bit" котырӧн веськӧдлысь Саид Джораев тадзи жӧ пасйис.

Видзӧдысьяс залын эз вӧвны, но котыръяс йӧктісны "ловйӧн". Медводз петкӧдлісны асьнысӧ. Кыдз шуласны, йӧктӧмӧн висьталісны, кутшӧм найӧ мастерӧсь. А сэсся баттл нуӧдысьыс пудъясьӧмӧн йӧзӧдіс некымын раунд, кӧні котыръяслӧн нӧшта на ясыда тыдовтчис енбиа-луныс.

Шуам, ӧти раундын йӧктысьяслы ковмис вежласьны. "Асъя кыаысь" йӧктысь вуджис "United Bit"-ӧ и мӧдарӧ. Налӧн вӧлі мог велӧдны мукӧдсӧ йӧктыны: "Асъя кыа" йӧктіс хип-хоп, а ухтаса – йӧзкостса танец. Нӧшта ӧти раундын командаяслы вежисны нин  могсӧ: "Асъя кыа" ассьыныс хореографиясӧ петкӧдліс хип-хоп шылад улӧ, а "United Bit" – мӧдарӧ.

Нималана йӧктысьяслысь ордйысьӧмсӧ коліс донъявны ӧтуввезйын, котыръяслы гӧлӧс сетӧмӧн. Висьталісны, мый позяс тайӧс вӧчны февраль 11 лунӧдз, но гӧлӧсуйтӧмсьыс  дугӧдчисны кык лун мысти нин, пӧшти дас сюрс морт пырӧдчис да. Котыртысьяслӧн кывъяс серти, орд-йысьӧмын вермис  йӧктӧм. Кыкнан котырыслы вичмис "100 Коми" кубок.