Февраль 1-6 лунъясӧ юркарын пасйӧны Кӧрткерӧс районлысь культура лунъяс. Буретш тайӧ районыслы таво мойвиис медводдзаӧн петкӧдчыны Коми Республикалӧн 100 вося тшупӧда паслы сиӧм муниципалитетъяслӧн фестивальын, коді мунас во чӧж.
Пасъям, мый тайӧ ыджыд гажыслӧн кураторыс – йӧзкост творчество сӧвмӧдан да тӧдӧмлун кыпӧдан республикаса шӧрин.
Февраль медводдза лунӧ Коми Республикаса войтырлӧн Ёртасян керкаын кыпыда восьтісны Кӧрткерӧс районлы сиӧм культура лунъяс.
Гӧсьтъясӧс чолӧмалісны республикаса культура, туризм да архив удж кузя министр Сергей Емельянов да Кӧрткерӧс районса администрацияӧн веськӧдлысь Константин Сажин.
"Кӧрткерӧсса рытпукъяс" кыпыд концертӧн петкӧдчисны Кӧрткерӧс районса коми культура, районса культура да прӧст кад коллялан шӧринъясысь котыръяс. Юргисны роч да коми мыла сьыланкывъяс.
Концерт бӧрын нимӧдісны "Гажаин, мусаин. Как я люблю тебя, мой край родимый" небӧг, кодӧс дасьтӧмаӧсь Рита Мингелайте да Галина Изъюрова.
Кӧрткерӧс районлӧн кӧкъямысдасӧд вося тшупӧда паслы сиӧм сборникас журналистъяс, краеведъяс да библиотекаръяс чукӧртӧмаӧсь сэтчӧс сикт-грезд-посёлокса войтырлӧн нэмӧвӧйся бур традицияяс да обычайяс, история, вӧр-ва да архитектура памятникъяс, а сідзжӧ район нимӧдысьяс йылысь интереснӧй гижӧдъяс.
Фестивальлӧн мӧд лунас Коми Республикаса Национальнӧй музейын воссис "Кузнец – всем ремёслам отец" выставка.
Март 31 лунӧдз тані позьӧ нимкодясьны "Кӧрт Айка" кузнечьяслӧн фестиваль дырйи кӧртысь мичасьыс-мича да шензьӧдана вӧчӧмторъясӧн.
Выставка кежлӧ ставсӧ тайӧс чукӧртӧмаӧсь-дасьтӧмаӧсь районса историко-краеведческӧй музейын да коми культура шӧринын зільысьяс.
Квайт во чӧжӧн (а дорччысьяслӧн фестивальыс медводдзаысь вӧлӧма буретш квайт во сайын) чукӧрмӧма вель уна сідз шусяна арт-объект, кодъясӧс дорӧмаӧсь абу сӧмын Коми Республикаса да Россияса, но и суйӧрсайса кузнечьяс.
Февраль 3 лунӧ Сыктывкарын С.Я.Маршак нима челядьлы библиотекаын воссис "7 чудес земли Кӧрт Айки" выставка да нуӧдісны мастер-класс.
Талун Кӧрткерӧсысь "Браво" томуловлӧн театр петкӧдлас Михаил Булгаковлӧн пьеса серти "Полоумный Журден" спектакль.
А февраль 6 лунӧ Кӧрткерӧс районса культура лунъяслы сиӧм кыпыд гажсӧ "Калевала" спектакль-премьераӧн сигӧртасны Н.М.Клермон нима народнӧй театрысь артистъяс.
