"Коми му" газетлӧн тавося мӧд номера петасын лыддьысьысьясӧс тӧдмӧдім ӧнія коми сьыланкывъяслӧн "Василей" республикаса фестивальын Гран-при босьтысь Валентина Лебедевакӧд да кӧсйысим паськыдджыка сы йылысь гижны.
Казьтыштам, мый Валентина чужлӧма Кӧрткерӧс районса Пӧддельнӧй сиктын, а ӧні олӧ Санкт-Петербургын, уджалӧ томуловлӧн "Охта" шӧринын художествоа веськӧдлысьӧн, дасьтӧ том йӧзкӧд быдсикас концерт-гаж да фестиваль, велӧдӧ быдмысь войтырӧс сьывны, а нӧшта на ачыс сьылӧ "ДивоГрад" ансамбльын.
Сьывны радейтӧмыс енбиа гӧлӧса аньлӧн ичӧтсяньыс нин вӧлӧма – школаса да клубса сценаяс вылын пыр окотапырысь петкӧдчылӧма. А сэсся Надежда Габова тьӧткаыс вӧзйӧма сылы пырны велӧдчыны Коми Республикаса юралысь бердын искусство гимназияӧ. Куим во ныв босьтӧма тӧдӧмлун музыкальнӧй юкӧнын, а сэсся вуджӧма гуманитарнӧйӧ. Сэні Валяӧс сьывны велӧдӧма Наталья Фёдоровна Канова.
Гимназия помалӧм бӧрын пырӧма водзӧ велӧдчыны В.Т. Чисталёв нима Коми Республикаса культура колледжын "Йӧзкостса хор творчество" юкӧнӧ, сэні нин велӧдысьнас вӧлӧма Наталья Михайловна Гнедых. Велӧдчигас тшӧтш и "Пелысь мольяс" ансамбльын сьылӧма.
Колледж помалӧм бӧрын Валентина гӧгӧрвоӧма, мый сьывтӧг сэсся оз нин вермы, да мӧвпыштӧма водзӧ мунны велӧдчыны ылі Питерӧ. Нывъёртыскӧд эськӧ медводз Петрозаводскса консерваторияӧ кӧсйӧмаӧсь пырны, Москва на дум вылас усьлӧма и, но тайӧ ыджыд карыс абу сьӧлӧм сертиыс вӧлӧма. Бӧрйӧмаӧсь сэсся Санкт-Петербургса культура да искусство университет (ӧні институт) "Роч йӧзкостса сьылан искусство" кафедраӧ Валяӧс дзик пыр и босьтӧмаӧсь, ӧд енбиа нывлӧн киас вӧлӧма колледж помалӧм кузя гӧрд диплом. А сэсся водзӧ олӧмыс да и
уджыс сылӧн ставнас гартчӧма-йитчӧма сьылӧмкӧд.
Колӧ пасйыны тшӧтш и сійӧ, мый Питерса университет бергӧдӧма Валентиналысь олӧмсӧ нӧшта ӧти шуда ордымӧ – буретш тайӧ ыджыд карас воӧм бӧрын мӧд лунас нин сійӧ тӧдмасьӧма верӧспуыскӧд.
–Да, сідз и лои – университетӧ документ сдайтӧм бӧрын мӧд лунас муні менам нывъёрт Елена Иванова дорӧ (ӧні сійӧ веськӧдлӧ Ыбса финн-йӧгра этнокультура паркӧн), а буретш сы дорын пукалӧ вӧлӧм Евгений верӧспуӧй, – нюмпырысь казьтылӧ Валя. – Со дас квайт во нин инӧн-ладӧн олам, быдтам 9 арӧса Анечка да кык арӧса Сонечка нылукъясӧс.
Валентиналысь юалі: коді нӧ, мися, ышӧдіс пырӧдчыны "Василей" конкурсӧ?
–Коркӧ некымын во сайын "ДивоГрад" ансамблькӧд ми петкӧдчылім "Василейын", но сӧмын кыдзи гӧсьтъяс, – висьталӧ Валентина. – А тавося конкурс вылӧ ышӧдіс менам бур ёрт, нималана режиссёр Алексей Полубояров. Сылӧн гӧтырыслӧн тьӧткаыс гижӧма сьыланкыв, со и вӧзйис: вай пӧ таӧн пырӧдчам "Василей" конкурсӧ. Ме сӧглас сеті. Менам мӧд бур ёрт Павел Пивоваров дасьтіс сьыланкыв вылӧ аранжировка, гижим студияын, ыстім конкурс вылӧ, венім медводдза тшупӧд, сэсся снимайтім клип и воӧдчим финалӧдз.
И со Валентина Лебедевалӧн колипкай кодь мыла гӧлӧсӧн "Шонді югӧрыс водз асыв чеччӧдіс" мичасьыс-ми-ча коми сьыланкыв лои вермысьӧн – Гран-при шедӧдысьӧн, а нӧшта на тайӧ сьыланкывсӧ шуисны медмичаӧн видзӧдысьяс.
–Ме зэв рад, мый лои татшӧм ыджыд конкурсын вермысьӧн, и кӧсъя тӧдчӧдны, мый тайӧ вермӧмыс абу сӧмын менам – а ставнас ыджыд котырлӧн, – висьталӧ Валентина. – Ыджыд аттьӧ сьыланкывлы кывъяс гижысь Альбина Селивановлы, шылад гижысь Светлана Кондратюклы, менам ёртъяс Алексей Полубояровлы да Павел Пивоваровлы. Сьӧлӧмсянь жӧ аттьӧала ставнысӧ, кодъяс велӧдісны менӧ сьывны: и гимназияын, и колледжын, и институтын – ме найӧс некор ог вунӧд да пыр пыдди пукта.
Тайӧ сьыланкывсӧ ме сии аслам мамуклы, кодӧс ми дзик неважӧн воштім…
Аттьӧ менам ыджыд-ыджыд да радейтана рӧдвужлы, кодъяс ёна "висисны" ме понда конкурс дырйи, а сэсся мекӧд ёна радлісны да чолӧмалісны. А медся ыджыд аттьӧсӧ шуа Енмыслы! Ставсьыс! И енбиысь, и мича гӧлӧс сетӧмысь, и менам олан туй вылын пыр шань да отсӧг вылӧ воысь йӧзӧс паныдалӧмысь, дзик став-сьыс, мый ӧні эм менам олӧ-мын.
