Январь 25 лунӧ Кулӧмдінса школаысь витӧд класса кадетъяс "Студентъяслӧн десант" ставроссияса акциякӧд йитӧдын тӧдмасисны Коми Республикаса МВД-лӧн кинология служба юкӧнын зільысьяскӧд.
Экскурсиясӧ нуӧдіс сэні уджалысь Олеся Калимьянова. Кадетъяслы сійӧ висьталіс, мый кинология шӧринлӧн питомникын ӧні 35 пон, кызвыныс на пиысь немеч овчарка, эм и бельгиеч рӧдысь. Тайӧ пӧрӧдаыс пӧ зэв жӧ сюсь да ныриса, мыж вӧчысьясӧс корсигӧн бура туясьӧ.
Питомникын эмӧсь и кычипиян. Быдмӧм-велӧдчӧм бӧрын найӧ кутасны жӧ служитны МВД-ын.
Олеся Калимьяновалӧн кывъяс серти, понъясӧс найӧ велӧдӧны уджавны куим нырвизьын: кок туй да дук серти корсьны мортӧс, взорвитчантор да дурмӧдчантор. Но медводдза урокъяс дырйиыс пӧ нёль кока пӧрадок видзысьясӧс велӧдӧны кывзысьны, ӧд понйыд кӧ оз кут кывзысьны мортлысь, уджыс оз артмы.
Сэсся кинологъяс петкӧдлісны кадетъяслы пемӧсъяслысь сямсӧ. Медводз Ева немеч овчаркалы сетісны "сидеть", "лежать", "рядом", "змейка" командаяс. Сійӧ на серти став коланасӧ бура вӧчис. А сэсся корсис служебнӧй машина кузолӧ дзебӧм Макаров пистолет.
Водзӧ ассьыс сямсӧ петкӧдліс бельгиеч рӧдысь Ерта овчарка – аддзис сумкаысь наркотик. А Гайлы ковмис корсьны челядьлысь кепысьсӧ, кутны "мыж вӧчысьсӧ".
Видзӧдӧмпырысь, Кулӧмдінысь кадетъяслы ёна воис сьӧлӧм вылас нёль кока пӧрадок видзысьяслӧн уджыс.
Ӧти зонка гоз-мӧдысь шыӧдчыліс кинологъяс дорӧ, мед сылысь овчаркасӧ велӧдасны жӧ. Кинологъяс юалісны, ыджыд-ӧ сылӧн понйыс. Зонка вочавидзис, эг на пӧ лӧсьӧд.
–Кор лӧсьӧдан, сэки и сёрнитам, – шуис Олеся Калимьянова.
Водзӧ ныв-зонлы петкӧдлісны, кыдзи понъяс ветлӧны служебнӧй машинаын, кутшӧм вольерын найӧс видзӧны, тӧдмӧдісны и 4,5 тӧлысся кычанъяскӧд.
МВД-лӧн кинология служба шӧринӧ волӧмысь кадетъяслы нимкодь. Классӧн веськӧдлысьныс Наталья Александровна Костина висьталіс, мый ныв-зон важӧн нин окотитӧны вӧлӧм волыны татчӧ. Аслас нылыс велӧдчӧ кадет классын жӧ.
–Нылӧй ӧні велӧдчӧ 9-ӧд классын. Коркӧ найӧ волісны жӧ татчӧ да, зэв любӧпырысь висьтасис гортын. И меным окота вӧлі вайӧдлыны ассьым классӧс. Нимкодь, мый артмис волӧмыс, – шуис Наталья Александровна.
Водзӧ Кулӧмдінысь кадетъяслы погона йӧз петкӧдлісны, кыдзи корсьӧны мыж вӧчысьясӧс уличвывса камераяс отсӧгӧн, видзӧдӧны пӧрадок бӧрся, тӧдмӧдісны криминалистъяслӧн уджӧн.
