2013 воыс тшупöда абу сöмын "Коми му" газетлы. Таво тырö коми гижысь, драматург Виктор Алексеевич Савинлöн чужöмсянь 125 да кулöмсяньыс 70 во.
Нёбдінса Виттор вöлі "Коми му" газетлы подув пуктысьяс лыдын. И кыдзи быд редактор, сійö зілис сöвмöдны петассö, вöчны сійöс лыддьысьысьлы матыссаöн да мусаöн, а кыдзи гижысь да драматург – вöзйыны лыддьысьысь-видзöдысьлы выль кывбур-пьеса. 1937 во январь 1 лунся "Вöрлэдзысь" газетын Виктор Савин йöзöдöма ассьыс гижöд, кöні вöчöма кольöм 1936 вося уджлы кывкöртöд да индöма водзö вылö мöвп-могсö.
"Мый ме сета 1937-öд воын
Бöръя кык тöлысьнас (ноябр-декабр) ме комиöді Н.В.Гогольлысь "Гöтрасьöм" да А.С. Пушкинлысь драматическöй поэма "Русалка". Сыысь öтдор гижи кывбур "Мед олас свободнöй Испания" — мöд ногöн кö шуны, прозаöн лöсьöдöма 2,5 печатнöй лист да кывбурöн 725 визь (строка). Тайö абу этша, и верми вöчны сы вöсна, мый, öти-кö, зільöмöн зіли сетны коми театрлы содтöд репертуар, мöд-кö, великöй роч поэт А.С.Пушкин кулöмлы 100 во тыригкежлö зіли комиöдны сылысь öти тöдчана произведение ("Русалкалысь" отрывоксö сідзжö кутас лöсьöдны Коми театр пушкинскöй юбилей кежлö).
Воан 1937 во кежлö ме ас вылам босьта мог вöчны гырысьджык куим произведение: 1) гижны пьеса гражданскöй война йылысь (темаыс — Изьва йывса крепость); 2) комиöдны Шекспирлысь "Отелло"; 3) гижны поэма историческöй под вылын, а верма кö, нöшта гижа öти пьеса сэтшöм тема вылö, кыдзи Коми му чудь-яссянь да царскöй колониясянь воис сталинскöй Конституцияöн Автономнöй Сöветскöй Социалистическöй Республикаöдз.
Индöм кöсйысьöм уджъяс эштöдны ме урчита татшöм срокъяс: медводдза пьеса (гражданскöй война тема вылö) сетны апрель кежлö, "Отелло" комиöдны гожöмнас, а мукöдсö — ар кежлас, мед Октябрса революциялы 20 во тыригкежлö вöлі став босьтöм могöс пöртöма олöмö".
Нёбдінса Витторлöн кöсйöмыс эз збыльмы. Шекспирлысь "Отеллосö" комиöдны кадыс эз ло да, ковмис эновтчыны. Сэк жö лöсьöдіс да йöзöдіс Сталинöс нимöдана кывбуръяс. "Отелло" ворсанторсö коми театр дасьтылöма рочöн 1940 да 1946 воясö (режиссёръясыс Г.Мирский да Б.Мордвинов). Кыкнан уджсö вылö донъялöмаöсь критикъяс. Кутшöмкö кад мысти пьесасö комиöдöма Василий Юхнин. Сійöс пуктыны да ворсны Отеллоöс босьтчылöма Пантелеймон Мысов, но висьмöма. Тырвыйö уджавны сійö абу нин вермöма, та вöсна велöдöм рольяссö гижöмаöсь радиостудияын. Режиссёралöма ачыс Мысов. Комиöн Шекспир медводдзаысь юргис 1957 вося майын. Отеллоöс ворсіс Пантелеймон Мысов, Ягоöс — Иван Аврамов, Дездемонаöс — Галина Лыткина. Пьесалысь неыджыд юкöн йöзöдісны 1967 воö "Войвыв кодзув" журналын.
1936 воын Виктор Савин босьтчöма вуджöдны Пушкинлысь ямбсö — 525 строка (буретш та мында визь "Русалкаын") да, медым вевъявны урчитöм кад кежлö, уджалöма лун и вой. Та йылысь сійö юöртö Шыладорса Миш ёртыслы 1936 вося декабрь 10 лунö ыстöм письмöын. Савинöн комиöдöм "Русалкаöс" (медводдза картинасö) петкöдлісны Сыктывкарын "Пушкинскöй спектакль" ворсöмын 1937 вося февраль 10 лунсянь куимысь, а гожöмнас нöшта и Архангельскын гастроль дырйи. Спектакль видзöдысь гижöма сэкся газетö: "Савин переводын кылö пушкинскöй стих. Кывбурыслысь мичлун да музыка кужöмöн петкöдлö артист В.П.Выборов, Мельник рольсö ворсöмöн". "Русалка" вуджöдöм поэмаыс бöрыннас вошис, та вöсна газетын петöм ошкана кывъясыс зэв донаöсь талун. А мый лоис "Гöтрасьöмнас", абу тöдса.
1937 вося июньын "Ударник" журналын йöзöдöны Нёбдінса Витторлысь "Коми му — АССР" кывбур. Гожöмнас сійö ветлöма на лунвылö санаторийö. Сентябрь 16 лунö "Вöрлэдзысьын" петö "Мыйла?" медбöръя кывбур. Таöдз август 6 лунö газетын йöзöдöны "Тувсов вой" кывбур, кöні гажсö гижысь петкöдлöма синва сорöн: "Кусі бикиньöй менам пöрысь морöсын..."
Дзескыдінö йöршиттöдзыс колис кык тöлысь...
Сутшкасьысь сутуга сайö веськавтöдзыс Нёбдінса Виттор век жö удитöма помавны öти пьесасö. Куим лун мысти, октябрь 7 лунö, и воöмаöсь сыла, мырддьöмаöсь ки помысь медбöръя гижöдсö да быдса архив.
Виктор Алексеевич Савинлы бур нимсö бергöдöм бöрын 1956 воын "мездісны" и "Крепость" пьесасö, но сійö сідзи и колис пуктывтöм, вредительство да народлöн врагъяс йылысь сёрниыс мунö да...
