Аскомысь Челядьöс доръян лунсö пö кутам пасйыны садь юрöн. Тадзи тшöктöны-индöны ыджыд чина йöз. Лунтыр пö Россия пасьта мед абу вöлі вузалöма курыдтора ни öти сулея. Ни верстьöлы, ни челядьлы.

Слабог, палялісны шоныд пуклöс-вывсаыд. Сöмын ог тöд, мый таысь артмас. Мед эськö оз жö сі-дзи, кыдзи миян томдырйи: сэки тай быдсяма общество трезвости котырталісны-а. Помнитанныд? А безалкогольнöй свадьбаыд? Юр сьмек. Петаласны вöлі гöсьтъясыд, гусьöн гулькнитасны дзебасысь да пырасны гажöдчыны. Шуанныд, эз тадзи вöв? Дзик тадзи.

Сійö кадас ог на ёна вöлі ю да винаыдкöд тышкасьöмыс серамöс петкöдліс. А сэсся öд, мый оз позь, кык пöв ёнджыка колö. И быд чукöртчигöн нарошнö (одыбса ногöн кö, вилимöн) вöлі винатö ньöбан. А кыдзи нö он? Киад со мыйта талон, мед оз жö пропадит!

Сэксянь Эжваад ок уна ва визувтіс. Вина лавкаыд кутіс уджавны эз сöмын водз асывсянь да сёр рытöдз, а и сутки чöж. Но и юыштісны жö йöзыд. Дерт, кодлы окота. Сэтшöмыс вель уна вöлі. А кор пагавны кутісны да кулавны, чинаяс отьмисны: но пö, юсисны тай! А юсясны, дерт. ЛТП-яс тупкалісны, вытрезвитель абу. Но со неважöн индöд лэдзисны: винаöн вузасьны сöмын дас час рытöдз.

И кыдзи уна во сайын, менам чужи юалöм: а мыйкö выльтор лöсьöдісны? Мый кутасны том йöзыс вöчны вина юöм пыддиыс? Найö öд велалісны нин тадзисö овны. Кыдзи "тадзи"? А рытнас чукöртчыны, ньöбны доз да артельöн дучкыны-юны. А сэсся шöйтны-гуляйтны. Карад, гашкö, и эм кытчö пырнытö, а сиктад? Клубö? Рытнас восьса сöмын шойччан лунъясö. Сэсся öд и некытчö. НЕКЫТЧÖ.

Вина юöмкöд тышсö ошка, но вывті жö сёрöн заводитісны. Öні во дас коляс, мед серпассö кöть неуна вежыштны. Аддзылам-ö ми сійö кадсö?

А челядь вöснаыд субöта рытö öти штоптö лэпта. Дзебасын сулалö нин.