Помöсдінса бабушъяс паччöр вылын мыш оз пöжны. Быд лун исласьöны лызьöн. Коді кыдзи вермö, сідзи и шлывгö-мунö.
Тамара Арсеньевна Канева асъя ноксö эштöдас да лызь вылö жö сувтö. Овлö, луннас öтарö-мöдарö дас километр мунö. Кöть и та йылысь эз тшöкты гижны, а висьтала.
—Ме öд ог ордйысь, а дзоньвидзалун видзöм могысь, — зэв вежавидзана шуö ань. — Подöн сьöкыда ветлöдла, коскöй висьö да. А лызь вылас кокньыдджык.
Тайö спорт сикасыс Тамара Арсеньевналы мусмöма пединститутас велöдчигöн. Сэні ёна котралöма, тшöкыда ветлывлöма походö. Весиг туризм кузя инструкторлöн книжка эм.
А велöдчöма пединститутас математикö. Педпрактикаыс вöлöма Ыбын. Сэки пö шöр предмет кындзи коліс и сідз шусяна внекласснöй удж нуöдны. Тамара Арсеньевна, дерт, бöрйöма лыжи. И кор помалöма пединститутсö, Ыбсянь сылы воöма корöм, школаас вöлöм физрукö медалöны.
—Кöть и ёна радейта лызьöн исласьны, а öбиднö лои, — висьталö ань. — Медвойдöр öд ме математик.
Тамара Арсеньевна локтöма чужанінас. И тані ышöдöма челядьöс лызьöн исласьны. Кор пö сиктса зонпоснилы вайöмаöсь ботинкиа лызь, ставныслы тайö дивö кодь вöлöма. Öд сöмын гын сапöгöн тöвнас ветлывлöмаöсь.
Помöсдінса зонпоснилы зэв любö вöлöма лызьöн котралöмыд. Тамара Арсеньевнакöд тшöкыда ветлывлöмаöсь походö. Öтчыд январса каникул дырйи 5-7 классакöд мöвпыштöмаöсь Кулöмдінöдз лэччывны, экскурсия вылö пö.
Пожöгöдз воöмаöсь да пемдöма. Сэні узьмöдчöмаöсь физкультура велöдысь ордын. Мöд лун — бара водзö. Туяс друг нелямын градусöдз кöдздöдöма. Машинаясыд сэки шоча ветлöмаöсь. Да и сöлан кö сэтчö, кынмалан, бурджык лыжинад вöляникысь мунны.
—Ставным купайкааöсь. Нопйын истöг, сёянтор да чайник. Бипур пестылам да водзö, — висьталö Арсеньевна.
Кулöмдінад воöмаöсь, а кöдзыд поводдя вöснаыд унджыклаас оз уджавны, кутшöм нин экскурсия. Сöмын вичкоас пекарняö вермöмаöсь пыравны, видзöдлöмаöсь, кыдзи кöлач пöжалöны.
—Öні думайта да, кыдзи мекöд, том велöдыськöд, бать-мамыс тöв шöрын лэдзисны челядьсö. Ме кö эськö эг лэдз, — шензьö Тамара Арсеньевна. — Да и öнія челядьыд, кыдз шуласны, гортсаöсь. Бур, сэки туйын нинöм эз ло. Дерт, мудзисны. Ныв-зон мöдöдчигöн зэв варолöсь вöліны, а локтігöн некод нин нинöм йылысь эз сёрнит.
Казьтыліс Тамара Арсеньевна, кыдзи нöбасигас верöсыскöд кöч кыйны ветлöма, капкан видлавны. Чой горувсö пö вöлі пуксьöмöн исковта, мед ог доймы.
Öні тöвнас Тамара Арсеньевна лызь вылын. А гожöмнас велосипедöн журъялö. Бара жö дзоньвидзалун ёнмöдöм могысь.