Финн-йöгра страна-регионысь студентъяс IFUSCO вылö Сыктывкарö чукöртчылісны кыкысь: 1999 (Россияын сэки медводдзаысь та-тшöм конференцияыс вöлі) да 2003 воясö. Таво тулысын вöлі Тартуын (Эстония), а локтан воö Сыктывкар бара корис рöдвуж войтырöс Комиö.

–Конференцияыс векджык мунö куим лун. Сыктывкарын нуöдам сійöс 2013 вося май 6-8 лунъясö, виччысям сэтчö 150 гöгöр мортöс, – висьталö филологияса кандидат Марина Федина. – Национальнöй политика миниc- терство отсöгöн конференциясö котыртны босьтчисны госслужба да веськöдланног академия, Сыктывкарса университет, Коми пединститут, Вöр институт. Ми кöсъям, медым форумыс отсаліс ёнмöдны юркарса вузъяс кос-тын йитöдсö, сэтчöс велöдысьяс да студентъяс топыдджыка кутісны ёртасьны. Заводитім нин дасьтысьны конференция кежлас. Окотапырысь босьтчисны таö и том йöз, öд IFUSCO дырйи найö и асланыс туясьöм йылысь висьталöны, и мукöд регионысь да странаысь ёртъясöс аддзöны.

–Студентъяслы нö конференциясö котыртöмын мый вын сертиныс?

–Найö кывкутасны гöсьтъясöс кураторалöм – вочаалöм, карöн тöдмöдöм, прöст кадсö котыртöм – вöсна. Найö жö öтуввезйын лöсьöдöны конференциялы сиöм лист бокъяс. Форумлöн уджыс мунас дас секцияын: финн-йöгралöн кыв, литература, история, экономика кындзи сёрнитам и юöртан технологияяс да рöдвуж войтырлöн кипода искусство йылысь. Медым веськавны конференция вылö, шыöдчыны колö январь 1 лунсянь март 1 лунöдз.

–И коді вермас волыны конференция вылас?

–Оз сöмын студентъяс, но и аспирантъяс, том учёнöйяс, и весиг школаын велöдчысьяс. Оргкомитетö ыстöм докладтö кö бура донъяласны – вермасны корны форум вылö. Сёрнитны сэні кутам роч, англия да финн-йöгра кывъяс вылын. Доклад кындзи быдöнлы колö дасьтыны видеопрезентация да гижны тезисъяс, и быдöн ачыс бöрйö, кутшöм кыв вылын кутас сёрнитны, кутшöм кывйöн презентациясö вöчас да кутшöмöн тезиссö лöсьöдас. Но ставсö колö вöчны куим кыв вылын.

–Ме кö комиöн сёрнита, тезиссö колö рочöн гижны, а презентациясö – англия кывйöн?

—Да. А позьö рочöн сёрнитны, тезиссö английскöйöн вöчны, а презентациясö комиöн. Куим кывнас вöдитчöмыс отсалас став чукöрт-чöмаыслы öта-мöдсö гöгöрвоны.

Юöртім нин конференциялысь эмблема лöсьöдан конкурс йылысь. Видзöдлыны кö воддза форумъяслысь пасъяссö, ясыда тыдовтчö, мый тшöкыда сэні паныдасьлöны посъяс, шонді, пемöсъяс. Посъясыс быттьö йитöны рöдвуж войтырöс, шондіыс финн-йöгра пöвстын зэв пыдди пуктана пас, сійö тшöкыда паныдасьлö орнаментъясын. Конкурс вылö серпасъяс воöны нин, а вермысьыслы вичмас козин.