.JPG)
Ыджыдвиддзысь Елена да Вениамин Панюков гозъялöн куд кодь лöсьыд керкаыс тырöма челядь гöлöсöн.
—Мам, калбассö вундала?
—Мам, а ме сыр вундала?
—Мам, а кампетыс шкапас?
—Мам, ме Алтайлы няньтор сета...
—Ксюша, горöд батьтö пажнайтны...
И тадзи быд лун олöмыс налöн дзулькйöн пуö.
Челядьдыр
Гозъя кыкнанныс быдмöмаöсь ыджыд семьяын. Елена чужлöма карын. Нёль чой пиын сійö кага да та вöсна пö ёна и радейтöмаöсь-лелькуйтöмаöсь. Олöмаöсь кык жыръя патераын. Сэсся, кыдзи висьталіс Елена, дас куимнад карса патераад дзескыд лоöма да бать-мамыскöд локтöмаöсь Ыджыдвиддзö.
—Чойяс верöс сайö петісны, налöн челядь чужисны. Бать и стрöитчис чужан сиктас. Витöд классянь сэсся тані велöдчи, — казьтыліс ань.
Веня ыджыд семьяын жö быдмöма. Öкмыс арöса вöлöма, кор батьыс мöс гид тшупны петкöдöма. Öтар пельöссö лöсьöдны сылы сетöма, кыдзи пö кералан, сэтшöм и лоö. Батьыс абу и вермöма гидсö эштöднысö, кувсьöма кадысь водз.
Дас куим арöса Веня сикт-са мужикъяскöд пес керавны нин мунöма. Ыджыд вокыс армияын вöлöма да, кодлы кö öд колö пестö заптыны.
—Пусö йöткыны эськö жмитчан, но кытысь сэки эбöсыд? — казьтыліс челядьдырсö мужичöй. — Кызвыннас Климов Иван и вöчис ставсö. Армия бöрын сэсся сыкöд жö и веськалім совхозын пöрöдчыны.
Öти туйöд
Öта-мöдыскöд Лена да Веня дыр абу тöдмасьöмаöсь. Кыдзи висьталіс ань, ог пö и видзöд вöлі сы вылö. Коркö пö ді вылын купайтчигöн аддзи сылысь суналöмсö да горöді: "Сунав, сунав, гашкö, шудтö аддзан".
—Но и сюри шудыд? —юася Вениаминлысь.
—Со тай дінын пукалö, — сывйыштіс радейтана гöтырсö мужичöй.
А тöдмасьöмаöсь найö, кор ныв велöдчöма дас öтиöд классын. Том морт тшöкыда казявлöма Леналысь сикт кузя конькиöн исласьöмсö. Дивö öд тайö. Ставöн лавкаö подöн мунöны, а Лена конькиöн. Да нöшта сэтшöм мичаник.
—Йöктан кружокысь вöлі гортö мунам нывъёртъяскöд. А Веня менö бергöдіс мö-дарö, лок пö сэсся мекöд гуляйтыштам. Ме и муні. Весиг ог тöд, мыйла, — казьтыліс ань.
Сэксянь олöмас öти туйöд восьлалöны. На-лöн кöлысь вылын гажöдчöма став сиктыс.
—Гажа вöлі?
—Дерт жö. Апрель 24 лун, а сувтсöн зэрö, — казьтыліс Вениамин Геннадьевич. — Пöчö шулывліс, тасьті дорысь шыд васö вöлі юа да, свадьба дырйи пö чорыда зэрас. Сэки вöлі он думайт. А öд збыль вöлöма.
—А ме, чайта, кöлысь дырйиыд кö зэрö — тайö шуд вылö, — нюмдіс Елена гöтырыс.
Зарни киа
Ыджыдвиддзö воöм бöрын Елена пыр и веськалöма школаса Гиннесс небöгö. Сылöн вöлöма сой кыза зэв кузь кöса. Казьтыліс тай, школаас нуöдöмаöсь кутшöмкö гаж да сы кежлö нывъяслысь мерайтöмаöсь юрсисö. Леналöн вö-лöма ставсьыс медся кузь.
Важ йöз шулöны, нывлöн пö кöсаыс кузь, да мывкыдыс дженьыд. Но тадзи некутшöма оз позь шуны Елена йылысь. Ичöтик тушаа, мелі нюма, шань да вось-са сьöлöма тайö аньыс, зэв бура кысьö-вурсьö и вышивайтчö, мичаа серпасасьö и ньöр-сюмöдысь вöчасьö. А сьывны-йöктыны кö заводитас, быдöнлысь сьöлöмсö вöрзьöдас.
Школаас на велöдчигöн Еленалы сьöлöм вылас воöмаöсь Индияса кинофильмъяс. Сійö заводитöма ачыс сэтчöс ног йöктыны, вурöма некымын сари, кутшöмöс новлöны сэтчöс аньяс. Индияса йöктöмъясöн тшöкыда петкöдчылöма школаса гажъяс дырйи да сиктса клубын.
—Öнöдз на сариясыс шкапынöсь, — висьталö ань. —Гоз-мöд во сайын клубын йöктылі на. Да и Ксюша нылöй школаас велöдчигöн пасьтавліс.
Елена Егоровна зэв мичаа сьылö. Сиктса концертъяс дырйи уналысь вöрзьöдö сьöлöмсö. Неважöн вурöма аслыс концертасян сарапан. Лавкаын кöть и быдсяма паськöмсö вузалöны, но ань тшöкыда челядьсö ачыс пась-тöдö. Шуам, районса "Золушка" конкурс вылö Оля нылыслы вурöма зэв мича платтьö.
"Зарни киыс" Еленалöн мамсяньыс. Кыдзи висьталіс, водзынсö пö крестöн ёна вышивайтчылöмаöсь. Сэки öнія моз журналъястö эз вузавлыны, быдöнлы мича серыс эз сюрлы. Со и киысь киö татшöм журналыс ветлыв-лöма. Мамыс Еленалöн вой кежлас вöлöм босьтлас да дö-раас öтар джын-сö вышивайтö. Сэсся нин во-дзö журналсö мöдлы сетö. Да и батьыс вöлöм кысьö-вурсьö.
—Ичöтсяньыд ставсö тайöс аддзан да и аслыд окота видлыны, — висьталö Елена.
Пушоклы пась
Öні аньлöн челядьыс сылысь велöдчöны. Ныв-пияныс окотапырысь кысьöны-вурсьöны, мастеритöны быдсикас серпассö. Керка стенын öшалöны ас киöн вö-чöмторъяс. Ветлöдлан жыръясті да быттьö галереяса выставка вылын.
Челядьыс ставныс зэв мичаа серпасасьöны. Пушок каньыслы кыöмаöсь нин шоныд пась да кöм. Öні сэсся кысöйныс оз нин кынмы. Водзö челядь кöсйöны пасьтöдны и Алтай понсö. Оля ставсö нин мерайтöма. Сöмын пуксьы да кы.
Неважöн труд урок кежлö тшöктöмаöсь кыны шарп. А Елена Егоровна вöлöма санаторийын. Вой шöр кадö Оля нылыс звöнитöма. Мам сьöлöмыд весиг повзьöма, мыйкö пö, гашкö, гортын нелючки. Вöлöмкö, нылукыс шарп кыö, да серыс оз артмы.
—Ме сійöс видышті весиг, мыйла оз узь. Эз öд, мися, öти рытöн тшöктыны кыны. Мöд лунас нуöма школаас да абу и эскöмаöсь, бöрдö вöлі, шуöмаöсь, мамыд пö кöнкö кыис, — висьталіс Елена Егоровна.
Ем кутны кианыс бура кужöны и пияныс. Найö тшöтш жö окотапырысь кысьöны-вурсьöны, ки помысь вöчасьöны. Ывлаö петавлан паськöмыс кö косясяс, оз нин мам дорас котöртны, асьныс дöмыштасны. Коркö Паша школаас öти нывкакöд дуригмоз мырддьысьöма кепкаöн. Зонкаыд асланьыс чорыдджыка кыскыштöма, да сійö и косясьöма. Гортас сэсся вайöма да ачыс и вурöма.
Гожöмнас — футбол, тöвнас — лымморт
Панюковъяслöн семьяын став уджсö зільöны вöчны öтув. Да и шойччöны öтвыв жö. Быд гожöм йöрас ворсöны футболöн, медводдза лымйысь лыммортöс вö-чöны.
—Семьяын традицияясыс кыдзкö асьныс чужöны, — висьталö Елена Егоровна. —Челядьыд öд радейтöны медводдза васöд лымйысь лымморттö вöчны. Да и ми коркö Венякöд ичöтöсь вöлім. Тадзи быд во лымъялöм бöрас ставöн öтлаын и петам ывлаö. Сэсся быть снимайтам лыммортсö. А футболнас ворсöмыс сідзи жö друг артмис. Öти гожся лунö вöлі зэрö. Челядь пиысь кодкö петіс зэр улö мачöн. Сэсся мöд, а вочасöн и ставöн гузьгысим. Сьöлöм бурмытöдз зэригас ворсім. И быд во сэсся тадзи.
Батьыскöд тшöкыда вуграсьны ветлывлöны. Витнан челядьыс да Пушок кань. Ордйысьöны на, кодлы унджык шедас. Сэсся пестöны бипур да пуöны юква.
—Тайö и эм семья шудыс, — нюмдіс мужичöй.
Вениамин Геннадьевичлы дедыслöн на лэч туйыс кольöма. Кыйсьöм йылысь сійö оз ошйысь. Шуис сöмын: "Ог горшась, семьяöс тай номсöдла-а." Вöравны эськö пияныс вöзйысьöны, но ылын да, оз на новлöдлы. Жалитö, мудзасны пö. А вотчыны öтлаын ветлöны.
* * *
Панюков гозъялöн вит челядь: куим ныв да кык пи. Öні Елена Егоровна оз уджав. Горт овмöссö кутö. Дерт, и верöсыс быдторйын отсасьö. Ыджыд семьянад тöжд-нокыс юр выв тыр. Но гозъя оз элясьны, öтсöгласöн-ладöн олöны да.
—Синмыд полö, а киыд вöчö, — эскöдöны найö öтвылысь.