Медводдза снимок вылын петкöдлöм неыджыд небöгыс – Язьва юбердса войтыр олöмын вöвлытöмтор. Язьваса комилöн тайö медводдза кывбур чукöр. Сiйöс серпасалöмаöсь челядь – чужан муаныс аскиа олöмö эскысьяс.
Небöгыс абу ыджыд, сэнi некымын кывбур, и öнi сьöкыд на донъявны сiйöс. Век жö позьö шуны, мый язьваса комилöн чужис асланыс медводдза поэт. Со сылöн öти кывбур.
Ме муна арся вÿрө,
Понда песня сьөлнө,
Понда песня сьөлнө да тшакъялнө,
Менум лёка бөдёр,
Этшэм вÿрөт муннө да аддзөлнө
Кузь бө кай то сьөлө,
Кузь бө ошис мунө,
Кузь бө ошис мунө да рышитө,
Май бө сювнө сiлө
Тöлсө долгөй лувас,
Корө ошислө сювнө бо майкө.
Ме муна арся вÿрө
Понда песня сьөлнө,
Понда сьөлнө да радуйтчинө.
Небöгсö йöзöдöма 2006 воын, кор сiйöс гижысь Михаил Паршаковлы вöлi 14 арöс. Сэки сiйö велöдчöма Паршаковаса шöр школаын да рочкöд тшöтш велöдöма язьва-коми кыв. Тайö енбиа зонкаыс мöвпалö лоны ас войтырлöн нырщикöн – юрнуöдысьöн.
Зонлöн олöмын ыджыд тöдчанлун босьтiс Паршаковаса шöр школаын велöдысь Анна Лазаревна Паршакова. Сы отсöгöн сизимöд классянь Миша велöдiс чужан кывсö эз сöмын школаын, мудзлытöг зiлис и гортас.
Анна Лазаревна öсьöдiс анбур, кодi лоис язьваса омилöн гижöд кывлы подулöн. Сiйö сетiс позянлун дасьтыны 2003 воын йöзöдöм шыпаскуд. Вужвойтыр олöмын тайö вöлi тшöтш зэв тöдчанатор. Буретш шыпаскудйыс сетiс позянлун велöдны челядьöс чужан кыв вылын. И колö шуны, тайö уджыс ёна шензьöдіс Тал-линнын 2004 воö финн-йöгра войтырлöн IV ставмирса конгресс вылö волысьясöс.
Ас анбур подув вылын А.Л.Паршакова дасьтiс "Лөддьөтан книга", кодöс йöзöдлісны 2008 воын. Сэтчö чукöртöма неыджыд висьтъяс, мойдъяс, кывбуръяс, шусьöгъяс да кывйöзъяс.
Перым крайса губернаторъяслöн администрацияын ортсыса политика департаментöн веськöдлысь С.В. Неганов тöдчöдiс, тайö пö кык уджыс – шыпаскуд да лыддьысян небöг – лоис ас кыв велöдiгöн медся коланаторйöн да вужвойтырлöн асьсö пыдди пуктанаторйöн.
Позьö чайтны, миян пöвстысь оз быдöн аддзы карта вылысь язьваса комилысь олан мусö. сiйö нюжöдчöма Перым крайлöн асыв-войвыв юкöнын: рытыввылын сiйö заводитчö Язьва ю пöлöн, асыввылын помасьö Урал керöсöн, войвылын да лунвылын нюжöдчöма помтöм нюръяс пöлöн. Уна нэм чöж сэтчöс нимавтöм войтырсö власьт эз пуктыв пыдди. Но сiйö сяммис видзны-дöзьöритны ас чужан кывсö да культурасö. ХХ нэм шöрын, кыдзи аслас монографияын пасйö В.И.Лыткин, вылыс Язьваын артавсис ассьыныс кывсö тöдысь 3.600 морт.
Öнi язьваса комияс олöны Перым крайса Красновишерскöй районлöн Антипина, Паршакова, Бычинскöй да Вылыс Язьва сиктъясса администрацияяс улö пырысь грездъясын. Медся унаöн олöны Антипинаын, Арефинаын, Ваньковаын, Ванинаын, Паршаковаын, Симаковаын, Сысоеваын – ставыс 2 сюрс сайö морт. Красновишерскöй районын, кыдзи Россияса и мукöд мутасын, олöны сорöн роч, украинеч, белорус, немеч, татара, удмурт, чуваш, чечен да с.в.
Кольöм нэмся 30-50-öд воясö власьтлöн политика вöсна язьваса коми, кыдзи этша лыда и мукöд войтыр, вочасöн жебмисны, вунöдiсны ассьыныс культурасö. Чужан кыв вылын сёрнитiсны сöмын ас костаныс, и медсясö пöрысьяс. Сэк жö йöзöс гижалiгöн, паспортын да мукöд документын язьваса комиöс пасъялiсны рочöн. Гöгöрвоана, мый накöд орччöн олiгöн язьваса комилöн лыдыс вочасöн чинiс. Öнi артавсьö ас кывсö тöдысь кык сюрс гöгöр морт.
Век жö быд войтыр олöмын нем виччысьтöг овлöны вежсьöмъяс. 1990-öд воясын и язьваса комилöн олöм-вылöмыс кутiс вежсьыны. Сідз, 1993 восянь вöлi ловзьöдöма "Сарчик вайö тулыс" аслыссяма гаж. Сійöс ко-тыртiс история туялысь доктор, профессор Георгий Николаевич Чагин. Водзмöстчöмсö отсалiс збыльмöдны Красновишерскöй районса творчество шöрин. Сiйö кадсяньыс тайö гажсö пыдди пуктöны оз сöмын Перым крайса, но и Россияса мукöд финн-йöгра войтыр.
Тöв бöрын медводдза лэбачлысь воöмсö водзтi пасйылiсны эз öткодя – быд сикт-грездын разнöй кадö Ыджыд лунсянь Вежа куима лунöдз. Тайö кадколастнас ныв-зон аттьöалiсны сырчикöс – гажöдчисны, сьылiсны-йöктiсны, ворсiсны бипур дорын.
Выль гажыс вайис вужвойтыр олöмö вежсьöмъяс, отсалiс пыдди пуктыны асьнысö. Вежсис и власьтлöн видзöдласыс – мöд ногöн кутiсны донъявны вужвойтырöс, сылысь оланногсö, культурасö. Сiдз, 1996-1998 воясын Красновишерскöй районса культура учреждениеяс дасьтiсны язьваса комилысь культура ловзьöдан-сöвмöдан уджтас. Кутiсны чукöртны историялысь да фольклорлысь озырлун, пöль-пöчлысь казьтылöмъяс. Чу-кöртöмтор подув вылын лои йöзöдöма неыджыд пособиеяс: Антипина сиктлöн история, войтыр, важся паськöм йылысь, викторина, а сiдзжö вужвойтырлöн овъяса, семьяяслöн обрядъяса, вылыс Язьва матiгöгöрса иннимъяса кывчукöръяс. Тайö пособиеясыс отсалiсны нуöдны уна сикас удж: важся ворсöм, выставка-экскурсия да с.в.
Велöдысьяслöн зiльöмыс, язьваса комилöн асьнысö пыдди пуктöмыс эз вош весьшöрö. Бöръя кадö тöдчымöн содiс ас кывйöн сёрнитысьыс. Челядь окотапырысь велöдчöны гижны, лыддьысьны да сёрнитны ас кыв вылын, тöдмасьöны ас войтырлöн важся олöм-вылöмöн, культураöн.
2002 воын Паршаковаса шöр школаын вöлi научно-практическöй конференция, кодöс сиöма язьваса комилöн оласног вежсьöмсянь 10 во тырöмлы. Антипинаын конференция дырйи шуöма котыртны Паршаковаса школа бердын экспериментальнöй научно-методическöй лаборатория, медым водзö велöдны ас кыв, туявны войтырлысь историясö, культурасö. Школаын тшöтш восьтöма медводдза музей, кытчö чукöртöма уна сикас экспонат, войнавывса да уджвывса ветеранъяслысь кöлуй. 2006 воын татшöмсяма музей лöсьöдöма и Антипинаын.
Коми язьвасалöн кывйыс пырö финн-йöгра кывъяс лыдö коми, перым-коми, удмурт кывъяс чукöрö. Кыв туялысьяс оз öтмоза донъявны сылысь статуссö. Сiдз, В.И.Лыткин лыддьö сiйöс асшöр кывйöн; Р.М.Баталова да А.С.Лобанова чайтöны перымса коми кывлöн сёрнисикасöн; асьныс язьваса комияс лыддьöны, мый налöн кывйыс торъялö перымса коми кывйысь. Г.Н.Чагин тöдчöдö, мый перымса коми да язьваса коми – абу öти войтыр; найö олöны öта-мöдсяньыс вель ылын, на костын абуöсь экономика да культура йитöдъяс.
Учёнöйяс важысянь зi-льöны унджык тöдмавны язьваса коми йылысь, налöн кыв йылысь. Сiйöс медводдза туялысьöн вöлi финн учёнöй, Хельсинки университетса профессор Арвид Генетö. 1889 воын сiйö олiс язьваса коми пöвстын некымын вежон, дасьтiс кывчукöр, гижис мойдъяс да висьтъяс.
1949-1953 воясын язьваса коми муö куимысь волiс профессор В.И.Лыткин. Сiйö чукöртiс кыв йылысь уна озырлун да йöзöдiс "Коми-язьвинский диалект" монография. Профессорлысь уджсö вылö донъялiс Г.Н.Чагин. Сiйö чайтö, мый öнöдз на финн-йöгра кывъяс туялöмын мöд татшöм уджыс абу. 2006 воын язьваса коми ордö ветлiсны Коми наука шöринса Кыв, литература да история институтысь кыв туялысьяс.
Кызь во чöж язьваса комилысь оласногсö туялö этнограф, история наукаса доктор, Перымса университетын кафедраöн веськöдлысь, профессор Георгий Николаевич Чагин. Туялöмъяслысь бöртассö сiйö йöзöдöма уна уджын, сы лыдын "Язьвинские пермяки: история и традиции", "На землето был той, да на язьвинской", "Коми-язьвинские пермяки – древний народ Северного Урала" да мукöд удж.
2006 воын Г.Н.Чагин веськöдлöм улын Красновишерскöй районын нуöдісны этносоциологическöй туялöм. Туясьöмыс петкöдлiс, мый войтыр олöмын выльторъяс вылö видзöдтöг унатор на колис вежсьытöг. Язьваса комилöн оласног вылö ёна тöдчö роч войтыркöд орччöн олöмыс. Юасьöм йöз пöвстын 87 прöчентыс шуисны асьнысö рочöн, 13 прöчентыс – язьваса комиöн. Мукöд войтыркöд лöсялана (дöзмытöм) олöм вылö видзöдтöг язьваса комияс век жö чайтöны, мый налöн культураыс вермас бырны.
Язьваса коми оз вунöдны да пыдди пуктöны налысь кыв да культура туялысьясöс. Сiдз, финн учёнöй Арвид Генетцлысь нимсö пасйöма казьтылан пöвйын, сiйöс 1995 воын öшöдöма Паршакова сиктса керкаö, кöнi сiйö овлiс. Вужвойтыр нимсянь А.Л.Паршакова тадзи аттьöалö туялысьясöс: "Миянöс, кыдзи войтырöс, восьтiсны став мирлы А.Генетц, В.И.Лыткин, Г.Н.Чагин. Ми аттьöалам найöс. А миян аттьöалöмным – видзны ассьыным кыв да культура".