Лöкчим ювывса оланінъяс скач мунöм да сэтчöс сикт-грезд вöсна майшасьöм бöрын сьöлöм бурмис Позтыкерöсын. Гашкö, сы вöсна, мый сэтчö кежигöн воссис синтö гажöдана серпас. Паськыд эрдъяс. Ылöдз-ылöдз арся вöр-ваыс вералö. Шуйгавылас озыр йöзлöн тшап керкаясöн мичмöм Баяркерöс. А гашкö, сы вöсна, мый зумыш кымöръяс пöвстын виччысьтöг мыччысисны яръюгыдлöз лестукъяс, сэсся и шонді вашнитіс.
Вичко
Сикт шöрын – вичко коляс. Сылы паныда – коромина. Вöлöмкö, кыпöдлöмаöсь стрöйбасö культура керка да библиотека улö. Öні сэні нöшта сиктса администрация меститчöма. Сэтчö и кежи.
Куимнан служакыс сöбинсаяс. Пані сёрни вичко йылысь. Стрöитöмаöсь сійöс дас во. Матігöгöрса сикт-грездын олысьясысь быдöн пуктöма ассьыс пай. Ставсяньыс корöмаöсь вайны чипан кольк. Стенсö вöчлöмаöсь кык метр кызта. Труба на сюйлöмаöсь, кыті ветлöдлöма пачсянь шоныдыс. Мыйта во коли, а кирпичсö öні на он вермы торпыригавны. Вичко юр йывсö мичмöдлöмаöсь ыджыд сьöкыд жыннянöн. Сылöн шыыс ёна ылöдз кылöма. 1941 воö "кöрт батюшкоöс" ырыштчöмаöсь нуны сывдыны – фронтлы пö кöрт колö. Кор гыпмунöма сигöрсяньыс муас, "мурöстöмсö" кывлöмаöсь весиг Мордінын. Кöрткерöс пристаньöдз и вайöмаöсь жыннянсö. Абу вермöмаöсь та сьöктасö нинöмöн нуны. Гашкö, öнöдз кöнкö куйлö жынняныс.
А вичкосö се-тöмаöсь колхозлы склад улö. Öні вежа стрöйбаö сöмын шöйтысь мöсъяс кежавлöны.
Гашкö, Енсö пыдди пуктытöмысь и путкыльтчис сиктас олöмыс. Позтыкерöссаяс казьтылöны, кыдзи сійö кадö веськöдлысьыс аслас киöн перъялöма джодж да йирк плакаяссö да регыдöн и сьöкыд висьöмысь бырöма.
Господи Енмöй, мед эсь-кö аддзысяс жö морт, коді босьтчас дзоньтавны Позтыкерöсысь вичкосö, лов-зьöдас кыпыдлунсö, козьналас мичлунсö.
Том йöз
"Монди" миллионер котыр да öти ютыр уна сикт-грездлы нин козьналісны челядьлы ворсанінъяс. Но Сöбинса да Позтыса том йöз эз кутны виччысьны милöстина. Öзйöмаöсь – асьным пö öмöй ог вермöй татшöмсö вöчны. Бур, кор ышöдысь эм. Позтыкерöсын тайö Наталья Веселова. Судзöдöмаöсь плака, асланыс сьöм вылö ньöбöмаöсь краска, сиктса администрация отсалöма кöрт тувйöн. Öні тайö тыр-бур спортплощадка, кöні и ворсöны, и гаж котыртлöны. Дерт, öтув унатор артмö. Гашкö, коркö öтув и вичко ловзяс.