Телевизор пыр коми программаяс видзöдны радейтысьяс и öні на бур кывйöн казьтылöны Иван Шаховлысь уджтасъяссö. Сьöлöмсянь дасьтöм передачатö öд быдöн казялö да ошкö. Иван Михайловичкöд сёрниыс телевидениесянь и пансис.
–"Коми гор" телерадиокомпанияö локті уджавны, кор национальнöй передачаяс дасьтан юкöннас веськöдліс Михаил Матвеев. Сэні квайт во зіли, сёрöнджык нöшта нёльöс – Коми Республикаса телеканалын. Веськыд эфирын выльторъясöн тöдмöдны медводдзаысь тшöктісны чужан лунö – 1999 вося июль 4 лунö.
– А кыдзи воин журналистикаас?
–Школаын велöдчигöн на коми кыв, литература да чужан му туялöм кузя республикаса олимпиадаö пырöдчи. Сэні Анна Гагиева висьта-ліс, Сыктывкарса университетын пö воссьö выль финн-йöгра факультет, кöні кутам дасьтыны и журналистъясöс. Нöшта на коми, роч, англия, финн кывъяс сэні велöдісны, да та вöсна тшöтш шуи пырны сэтчö. Уна сикас кыв окота тöдны, ачым весиг китай кыв босьтчылі велöдны. Университетас веськалöм могысь коліс кутшöмкö редакциясянь шыöдчöм да, мöс видзигöн гижи "Коми му" газетö. Мися, он кö сетöй кабаласö, сиктса мужичöйяс моз юся. Вочакыв газетсяньыд воис öдйö, Михаил Ладанов вöлі гижöма, корöма тшöтш и ассьым гижöдъясöс ыстыны. Шахсиктын став олысьыс чукöрмис редакциясянь письмöтö лыддьыны – дивö öд, газетсянь гижöд воöма! Редакциясянь направлениетö сетісны, и тайö ёна отсаліс меным пырны велöдчыны финн-йöгра факультетö.
–Тэнсьыд передачаястö коми войтыр радейтлісны, нимтö бура тöдісны. А мыйла телевидениесьыс мунін?
–Муні, коми передачаяссö кутісны тупкавны да, "Талун" да "Миян йöз" и колисны. А вöліны и аналитикаа "Сьöда-еджыда" уджтас, и Александр Чувьюровлöн музыкалы сиöм "Лад" передача, и Галина Марковалöн да Александр Пивкинлöн сьöлöм вöрзьöдана фильмъяс... А öні мый?
Вуджи спорт министерствоса пресс-службаö. Сэки ми öтуввезйын лöсьöдім министерстволысь лист бок, "Коми горын" спортлы сиöм программа дасьтыны кутім, лызьöн котралöм кузя Россияса чемпионат дырйи торъя газет лэ-дзим. Газетсö вöчöмысь странаса Олимпийскöй комитетсянь аттьöалана гижöд вичмис. Раиса Сметанина, Николай Бажуков, Василий Рочев, Василий Рочев (пиыс), Аркадий Вятчанин, Виктор Фуражкин да мукöд йылысь видеороликъяс лöсьöдім. Телевидениеын жö кызьöд нэмся чемпионъяс йылысь сюжет-серпас дасьтім, тöдмöдім вермасьысь Владимир Паршуковкöд, таэк-вондист Вячеслав Майсериккöд, шорт-трэкын ордйысьысь Марина Пылаевакöд...
Министерствоас воысь регыдджык уджалі, чиновниклöн пуклöсын дітш- видзны эз ло окота. 2007 воö Наталья гöтыркöд ола-нінöн вузасян "Родник" агентство лöсьöдім. Тавося март 9 лунö сэксянь вит во тырис. Уджалам восьса сьöлöмöн, некодöс ог ылöд-лöй. Дерт, сьöкыд, вит во нин отпускын эг вöв.
–Иван Михайлович, тэ и Кулöмдінса землячествоöн юрнуöдан. Мый- ла нö босьтчин тайö уджас?
–Йöзкостса сьыланкывъяс радейта, а миян землячествоын кык котыр эм: "Эж-ва катыд", кодöн веськöд-лö Зинаида Пупышева, да "Медбур кад" (веськöд- лысьыс Вера Булышева). Чайта, "Эжва катыдлы" кад нин народнöй хорлысь, а Вера Булышевалы – народнöй артисткалысь ним сетны. Вонас хоръяс сё концертöдз петкöдлöны, тшöкыда чужан районö петалöны. Кыкнан ансамбльыслы йöзкостса паськöм колö вурны, мед эськö сэні и Эжва йывса сер-орнамент вöлі. "Эжва катыдлы" костюмъяс вурим нин. Зэв ыджыд аттьö таысь Сыктывкарса коми культура шöринöн веськöдлысь Валентина Самариналы.
Быд во тулыснас Сыктывкарын котыртлам сиктлысь лун. Пасйим нин Пожöг, Помöсдін, Зимстан, Керчомъя, Дереваннöй, Кулöм-дін сиктъяслысь лунъяс. Таво Кужса войтыр волісны. Петкöдлісны карсалы ассьыныс киподтуйсö, сьылан-йöктан сямсö. Бура котыртöмöн куимсё морт вылö артыштöм жырйö йöзыс оз тöр. Миянлы ыджыд отсöг вичмöдöны Кужйысь да Зимстанысь асшöр уджалысьяс Роберт Третьяков, Андрей Морохин. Дженьыда кö, землячествоын уджыс юр выв тыр, сöмын зіль да водзмöстчы.
–Кывсьö, тэ пö и гижан на?..
–Дас во сайын нин босьтчылі "Öль" повесьтö. Тайö аслыссикас боевик. Коми зон веськалö спецназö, кутö полевöй командирöс. А сэк кості ассьыс чойсö нывъ-ёртыскöд гусялöны. Зонмыд босьтчас мездыны найöс. Дерт, унатор повесьтас лöсьöдöма-мöвпыштöма, но уна жö и олöмсьыс босьтöма.
Нина Чадоромцева ас кадö художествоа серпасъясöн документальнöй фильмъяс снимайтліс. Öні тайöс некод оз вöч. А ме кык фильмлы сценарийяс лöсьöді. Öтиыслöн нимыс "Гудöка-сьысь". Сюрöсыс татшöм: том морт армияын тышкö воас "дедъяскöд", гортсьыс на вайлöм гудöксö сылысь косяласны да. И бöрдöм-сорöн вурас мекъяссö. Матыстчас военнöй сьыланкывлöн смотр, а петкöдчыны некодлы. Дивизиялысь нимсö вурöм гудöкнас дор-йыны тшöктасны том мортöс. И вермысьöн на лоас. Отпускö лэдзасны да выль гудöк козьналасны. Тöдö-мысь, фильмсö снимайтны куимсё сюрс гöгöр шайт ковмас. А син водзын нин сэтысь серпасъясыс: ар- мияö пöвесткаыс том мортлы воöма турун пуктігöн, радысла сійö зорöдсö чöв-тöм бöрын вöв вылын рöд-тö, армияö колльöдны сійöс теплоход дорö став сиктыс локтö...
Мöд сценарийыс – "Батрачка Нина". Важöн, революцияöдз, гöльяс батрачитлісны озыръяс вылö, и öні сиктса гöльджык войтыр отсасьöны озырджыкъяслы, важöн моз жö батрачитöны.
Телевидениеын выльторъяс дасьтыны öні öдвакö нин кута, а фильмъяс снимайтны радпырысь эськö босьтчи.
–Семьяыдкöд, матыссаясыдкöд нöшта тöд-мöдышт.
–Вячеслав пи сизимöд класс помаліс, гожöмъяснас ыджыд мамыс да пöчыс до-рö ветлывлö. Кольöм гожöм ставным Питерö ветлім, тесьт-тьöщалы, Нина Ефимовна да Геннадий Павлович Терентьевъяслы, 65 арöс тырис да та кузя ветлöмыс козинöн быттьö налы лоис. Ольга Алексеевна мамöй дорö быд тöлысь ветлывла. Ме öд сизимöд кага семьяын, вит арöса вöлі, кор батьöй кувсис, и мамö öтнас миянöс кок йылö сувтöдіс. Таысь мамöс ёна пыдди пукта.
Шойччан лун кö вичмылас, шатинöн да спиннингöн чери кыя. Дачаö радейта ветлывны, сэні ас киöн век мыйкö колö вöчны. Тайö бура шойччöдö быдлунъя ноксьыс. Шулöны, быд мужичöйлы пö колö керка кыпöдны, пиöс быдтыны да пу садитны. Керка эм, пиöс быдта и дачаын сус, коз, пожöм, ниа садиті. Öмидз-сэтöр быдмö, пывсян бöрад налöн вотöсысь морс юам. А пывсьынытö ме радейта жö...