Коми газет-журналтö и водзті медуна судзöдлісны и öні медъёна лыддьöны Кулöмдін да Кöрткерöс районъясын. А гижöдчыны йöзсö, дерт жö, ышöдöны пошта разöдысьяс. Сы вöсна накöд медводз и аддзысь-лісны Кулöмдінö ветлігас "Коми му", "Йöлöга" газетъясöн, "Войвыв кодзув", "Чушканзі" да "Би кинь" журналъясöн веськöдлысьяс, аттьöалісны зільöмысь да сёрнит-чисны и водзö ёртасьны, öти удж пö öд вöчам: журналистъяс гижö-ны, а поштальонъяс вайöны налысь юöрсö йöзлы.

А сэсся коми газет-журналын уджалысьясöс виччысисны ветеранъяслöн сöветын водзмöстчысьяс, школаын велöдчысьяс, Кулöмдінса олысьяс, кодъяс вöлі чукöртчöмаöсь районса библиотекаын. Чужан кывйöн лыддьысьны ышöдöм могысь мöдöдчисны журналистъясыд Эжва йылö, но вöчны тайöс эз и ковмы, накöд аддзысьлыны öд локтісны мам кывсö радейтысь йöз, кодъяс коми небöг-журналтö и кортöг-тшöктытöг лыддьöны. Налы окота вöлі висьтавны карса гöсьтъяслы, кыдзи бурджыкöн вöчны петасъяссö, мый кöсйöны лыддьыны "Коми муысь" да "Войвыв кодзулысь", юксьыны коми кывлöн аскиа лун йылысь мöвпъясöн. И сиктса войтырлöн, и журналистъяслöн та вылö öти сикас видзöдлас вöлöма да, тöдöмысь, та вöсна и лоис ёрта сёрниыс, кор бы-дöн зілис кывны мöд мортлысь вöзйöмъяссö, öтлаын корсьны мытшöд венан нырвизьяссö.

–Кöть бöрд, кор коми кыв йылысь босьтчам сёрнитны, – пасйис ветеранъяслöн сöветын аддзысьлігöн Дина Петровна Буракова, вöвлöм велöдысь. – Медводз, дерт, мам-бать сайын, велöдас-ны-ö найö ныв-писö ассьыныс кывсö пыдди пуктыны. Кулöмдінын квайт детсадйысь комиыс сöмын öти. Кага мунö мукöдас комиöн, сёрнитöмöн, а детсадсьыс петігас рочасьö нин. Школаын кык во сайын весиг коми классö эз котыртлыны. Ва-жöн коми кыв да литература вежоннас квайт час вöлі велöдöны, öні кык часöдз чинтісны. Гырысь классъясын коми литературанас рочöн тöдмöдöны – и кыдзи татшöм ногöн ас кывлысь мичлунсö челядьыслы петкöдлыны верман? Артмö, кывнымöс тöдöмöн бырöдам, а кывйыд кö оз ло, и войтырыс бырас. Кулöмдінысь комиöн сёрнитысь челядьтö гежöда нин паныдавлан да быттьö мöд муö веськавлан, кор кылан насянь комиöн шыасьöмсö.

Республикаса Юралысьлöн общественнöй приёмнöйысь Кулöмдінса юкöнын уджалысь Антонина Анатольевна Кузнецова содтіс, бать-мам пö ыстысьöны: коми кыв-йысь öтувъя госэкзаменыс абу да, сы вöсна рочсö ён-джыка колö велöдны.

–"Коми войтырсянь" эськö шыöдчылім нин, медым и комиысь татшöм экзаменсö позис бöрйыны, но вочакывйыс век на абу, – шуис сійö.

А коми газет-журнал йылысь сёрнитігöн Лидия Дмитриевна Есева ошкыштіс на журналистъясöс, бöръя кадас пö "Коми му" мичаммис.

–Мамöлы 86 арöс да сійö медводз бöръя лист боксьыс чолöмалöмъяс лыддьö. "Тысяча мелочей" кажитчö и, – висьталіс сійö. – Сöмын уна тöдтöм кыв пыртанныд, словартöг он и гöгöрво, мый гижöмныд.

Лидия Дмитриевна бöрын тайöс казьтыштіс и Иван Тимофеевич Морохин, коді ёртъясыскöд вит во нин лэдзö "Миян Кулöмдін" газет. Ме пö "Коми мусьыд" кывкудсö вундала да торъя тетрадьö чукöрта.

–"Коми му" кö кöсйö вужвойтырлöн газетöн лоны, колö ёнджыка татчöс йöзлöн майшасьöм йылысь гижны, кутшöм сьöкыдлунъяс лоö налы венны, – пасйис Иван Тимофеевич. – Со неважöн Дереваннöйö лэччылі да кызвыныс сэні уджтöмалöны. И оз сöмын тайö сиктас.

Коми кыв да коми газет-журнал йылысь сёрниыс водзö муніс библиотекаын нин, кытчö бара жö ас кыв вöсна "висьысь"-тöждысьысь йöз чукöртчылісны. Районса библиотекаяслöн öтувтöм тэчасöн веськöдлысь Галина Егоровна Пашниналöн кывъяс серти, кызвын сикт-посёлокса небöг видзанінас пö коми петасыд воö. Найöс во джын кежлö судзöдны вичмöдлöны ветымын сюрс шайтöдз.

Иван Иванович Ногиев казьтыштіс, Парма грездын пö 18 керка вöлі да джынъяс "Войвыв кодзув" журналыд вöлі воö.

–Сэтысь гижöдъяссö йöзыс öта-мöд костас донъявлісны, – висьталіс сійö. – Чайта, посни грездъяс бырисны да, сы вöсна и коми газет-журналлöн тиражыс чинö. А öні ичöт сиктсьыд и школасö бырöдöны, челядьсö автобусöн гырысь велöдчанінö новлöдлöны, кöні коми кывнас сідз-тадз и тöдмöдыштöны. И коді нö сэсся водзö ку-тас лыддьыны коми газеттö да журналтö, коми небöгтö?

Анна Михайловна Апостолиди Салехардö ветлöма да, сэні олысь изьватас пö некодысь яндысьтöг ас кывнас варовитöны, а Сыктывкарад комитö шоча кывлан.

–Роч морт Кулöмдінö ов-ны локтас да комиöн сёрнитö, а вужвойтырыс рочасьны зільö, – казялöма Светлана Михайловна Тесленко. – Таысь медъёна öбидаыд босьтö.

–Ичöтторсянь босьтчыны колö, – вöзйис Александр Степанович Рассыхаев. – Лавкаын вузöссö рочöн и комиöн индыны, орччöн мед вöлі гижöма "хлеб" и "нянь".

Тöдчана сёрни вöлі республикаса газет-журналын уджалысьяслöн Кулöмдінын. Некод веськодьöн эз коль, збыльысь öд и журналистъяслöн, и коми йöзлöн могыс öтувъя – медым мам кывным эз кус да коми войтырыс эз быр. Коді нö кутас та вöсна тöждысьны, асьным кö ог мöдöй зільны?