Таво тулыс-гожöм кыптыліс сёрни — Сыктывкарса государственнöй университетын коми филология юкöн тупкöм йылысь. Бур, мый сёрниöн и коли.
Ог гöгöрво, кодлысь пельсö "косялö" коми кывйыс? Öд сэні дасьтöны бур специалистъясöс, коми кыв да литература тöдысьясöс да сійöс пыдди пуктысьясöс. Студентъяс пырöдчöны и вужвойтырлöн кывйö, литератураö, культураö, историяö, традицияясö. Та могысь налы быд во котыртлöны торъя курсъяс. Комиысь студентъяс ветлывлöны велöдчыны Финляндияö, Удмуртияö, Венгрияö да мукöд финн-йöгра регионъясö, а сэтчöс ныв-зон окотапырысь волöны Комиö.
Сідз, сентябрсянь Выль воöдз СГУ-ын велöдчасны финн да удмурт. Мыйла найöс татчö кыскö да кыдзи донъялöны тайö факультетсö сэні велöдчысьяс?
Сиктö окота
Нико Партанен —Хельсинки университетса студент. Сійö мöдысь нин локтіс Сыктывкарö, медым бурджыка велöдны коми кыв да тöдмасьны культураöн, традицияясöн.
—Кольöм во Сыктывкарын олі вежон, а таво тані лоа январöдз. Ветла декабрын Рöштво кежлö Финляндияö да бöр на вола. Коми йöзыс зэв бурöсь да шаньöсь, — висьталö Нико. — А коми кывйыс зэв мича. Зэв окота олыштны коми сиктын, мед пыдісяньджык тöдмасьны татчöс войтырлöн оласногöн. Кольöм во волігöн эськö ветлім Ыбö, чöсмасим шаньгаöн, мыссим вежа юкмöсын, но окота и мукöдлаас ветлыны. И оз öти лун, а дырджык кежлö. Комиын уна сёрнисикас. Окота и найöс туявны, велöдны.
Тіян кывныд озыр
Николай Анисимов, Удмуртияса государственнöй университетын витöд курсын велöдчысь, том войтырлöн "Ми" котырö пырысь.
—Ме туяла фольклор. Татчö локті медводдзаысь на да окота тöдмасьны и кывйöн, и культураöн, и традицияясöн. Тіян уна сёрнисикас, и тайöн зэв озыр кывйыс, — шуö сійö. — Дерт, Коми йылысь ме уна нин кывлі. Мöдöд курсын коми кыв велöдім. Весиг экзамен сдайтім сы кузя. Чайта, ми медся матынöсь вужвокъяс пиысь. Уна кыв миян öткодь. Коми кыв тöдöмыс отсалö меным и удмуртлысь традицияяс туялöмын. Ёртъяс меным тшöтш вöзйöны ветлыны коми сиктъясö. Да и аслым зэв окота. Чайта, карын олöмыс сиктын дорысь ёна торъялö.
—Улич вылын оз юргы коми кыв...
—Öтчыд кывлі. Сэки эськö думайті, мый удмуртъяс сёрнитöны, а вöлöма кö, комиöн.
—Николай, Удмуртияын том йöзыс рочмöны жö?
—Тані, Комиын, видзöдöмпырысь, ёнджыка. Но и удмуртъяс вунöдöны чужан кывсö. Миян унатор вöчсьö, мед видзны пöль-пöчлысь кыв, традицияяс. Шуам, öтуввезйын "В контакте" вуджöдісны удмурт кыв вылö, овлöны быд пöлöс аддзысьлöмъяс, рыт-гаж, кытчö окотапырысь волывлöны и удмуртъяс, и рочьяс, и татара.
—А мый медъёна кажитчис Комиын?
—"Ö" шыпаслы памятник. Весиг меным лои таысь нимкодь.
Ыбö ог кöсйы
Андрей Терентьев — писькöс, водзмöстчысь том морт. Сійö велöдчö Сыктывкарса государственнöй университетын коми филологö.
Быдмöма Андрей, кыдзи ачыс шуö, Войвывса медся ылі коми сиктын — Инта районса Петруньын. Андрейöс СГУ-ö велöдчыны босьтöмаöсь экзаменъястöг, школасяньыс нин петкöдчöма бур тöдöмлунъясöн да.
—Ме радейта коми кыв, литература. СГУ-са коми юкöнлöн зэв паськыд позянлунъяс: велöдчан, содтöд тöдöмлунъясла ветлöдлан вужвокъяс ордö. Тайö нёль вонас ме кытшовті нин Коми Республика, Россия, велöдчи коймöд курс бöрын Финляндияын, ветлі олимпиада вылö Удмуртияö.
Андрей дипломсö гижö фольклорысь, туялö Ямалын олысь изьваса комияслысь традицияяссö. Кыдзи висьталіс том морт, Комиысь найö мунöмаöсь 18-19 нэмъясын, но ассьыныс традицияяссö видзöмаöсь. Сэтчöс телевидениеын пö весиг эм изьваса комияс йылысь "Оландыр" телепередача.
—Кор туялан важся оласногсö, быттьö ачыд бергöдчылан нэмъяс сайö, — висьталö Андрей. — Заводитан эскыны и приметаясö. Овлö, аддзан пызан вылысь пань да вилки крестасьöмаöсь, пыр и торйöдан найöс.
Кутшöм удж бöръяс Андрей СГУ помалöм бöрын, оз на тöд. Шуис тай:
— Мунны, шуам, Ыбö да лоны велöдысьöн, веськыда кö шуны, абу окота. Прöститасны мед менö сиктсаяс. Сьöлöмöй кыскö кутшöмкö общественнöй удж нуöдны. Öд сöвмöдны коми кыв, литература, культура позьö оз сöмын школаын. Стöча тöда, тöдöмлунъясöй эмöсь, а, сідзкö, ачымöс олöмас аддза.