Кодкö, гашкö и, шуас, мый Енмыс абу да кутшöм нин сысянь отсöг. Но мыйöн кывзан öнія олысьяслысь эскöдана висьта-сьöмъяссö, а сэсся тшöтш и ачыд мыйсюрö казявлан, кутан эскыны.
ДИВÖ ДАЙ СÖМЫН
Со татшöм вöвлöмтор. Кор Сыктывдін районса Ыбын заводитöмаöсь лэптыны Свято-Вознесенскöй вичко вылö крестсö, зэв тöла вöлöма. И öти ань, Васса Родионовна Шурганова (кувсьыліс нин), öшиньöдыс вöлöм видзöдö. Мужичöйыс пö тöкöтьö оз усь. А нöшта сылы колö ыджыд крест катöдны вичко йылас. Сэсся Вассаыд заводитöма молитва лыддьыны, мед мортыс оз вильскöбты. Друг енэжсьыс кияс мыччысьöмаöсь да мужичöйтö крестнас катöдöмаöсь. Сэксянь аньыд Енмыдлы нöшта на ёнджыка кутöма эскыны. Весиг вичкоас уджавны пырöма да кувтöдзыс сэсся сэні и зільöма.
Коркö петкöдчылöма öти аньлы и Николай Чудотворец. Мунö вöлöм нывбабаыс вичко горувса туй кузя. А кокыс сэтшöма висьö, мый öдва вермö восьлавнысö. Друг кодкö бöрсяньыс шыасьöма, тэныд пö колö бедь босьтны. Бергöдчöма да, мужичöй сулалö, бедь вöзйö. Аньыд босьтöма да зэв öдйö кутöма восьлавны, весиг дойыс бырöма. Кöсйö-ма эськö аттьöавны мужи-чöйтö, бергöдчöма, а некод нин абу.
Сыктывкарысь Эльвира Христиановна Касевалы Николай Чудотворецыд ёна жö отсасьö. Ань кык арöссянь кольöма бать-мамтöг. Челядьдырыс детдомын кольöма. Öтчыд Николай Чудотворецыд Эльвира Христиановнаöс тшыгла кулöмысь мездöма.
– Олам вöлі сэки Спаспорубын, – казьтылö ань. – Миян приютын пачыс киссис да, пусьыны ни пöжасьны вöлі оз вермыны. Зонпосни ставным тшыгöсь. Сэсся петім гоз-мöдöн челядь керка йöрсьыд да завор дорас сулалам. Друг миян дорö сувтіс кöрöба доддя вöла. Пукаліс сэні кушмыштöм юра, векньыдик чужöма мужичöй. Юалö миянлысь: "Ті лоанныд бать-мамтöм челядьыс? Тшыгъяланныд?"
Сэсся сійö восьтіс ыджыд куд. А сэні – еджыд нянь. Дукыс сэтшöм чöскыд! Руалö. Быттьö сöмын на пачысь кыскöмаöсь. Миянлы сэсся мужичöйыд юкліс пöжассö. Нимкодьнымла шензим да весиг эг аттьöа-лöй. Кыдзи друг мыччысис, сідзи и вошис.
Мöд лунас бара петім. Виччысям, гашкö, волас на. Видзöдам да, збыльысь тöвзьö-рöдтö. Сувтіс миян дорö. Вердіс. Кутшöмкö ань видзöдöма миян бöрся да кутіс горзыны: "Шыбитöй! Ті öд он нянь сёйöй, а из". Öти зонка и шыбитіс муас няньсö. А ме морöс бердö топöді. Мужичöйыд и шуис: "Тадзи кö вöчинныд, ог сэсся тіян дорö лок". И вошис.
А тайö вöлі Николай Чудотворец. Верстяммöм бö-рын нин ме сылысь мыгöрсö аддзи вичкоын öбраз вылысь.
Мöдысь Эльвира Христиа-новна дорö волöма Серафим Саровский. Аньлöн висьмöма пузчужöм кагаыс.
– Ставнас лöмöссис, – водзö висьталіс сійö. – Быдтор видлі, нинöмöн оз бурд. Забеднööйла петі кильчö вылö да ырзöмöн бöрддзи. Кевмысьны куті поконча мамöйлы. Мися, водз кувсин да нинöмö эн удит велöдны. Весиг кагаöс ог сяммы бурдöдны. Суседъясöй кылісны лимзалöмöс да ме дорö матыстчисны. На дорö нин сэсся шыöдчи, кöть, мися, кутшöмкö тöдысьöс ме дорö ыстылöй.
Мöд лунас керкаö пырис мужичöй. Гöгрöсіник чужöма, киас турун тыра кöрзина. Нораси сылы да сійö шуис, мый кагаöс колö жов тусьöн бурдöдны. Комын километр сайын пö быдмö. А меным и кагаöс кольнысö некодлы, мед вотігкостіыс видзыштасны. Мöд лунас шань мортыд ачыс вайис. Тшöктіс тусьсö нырны да лöмсö мавтны, а жовыслысь сöдзöм сöксö вомас вой- тöдны. Менам нылукöй, ен сыкöдöн, куим лунöн и правитчис.
А тайö бурдöдысьыс Серафим Саровский вöлі. Вичкоысь бöрыннас жö аддзылі.
ЕН МАМЫС ВИДЗИС
Александр Витальевич Ивановöс Ен мам киöдыс кутöма, кор сійö кöсйöма ассьыс гöтырсö пуртöн сутшкавны. Гозъя воöмаöсь венö. Пинясигад мужичöйлöн вирыс дзикöдз пузьöма, да кватитöма пурт. Шашаритчöма гöтырыслы голяас да личкöма пызан дорас. Пуртсö кыпöдöма... И сутшкигкостіыс Александр Витальевичлысь кисö кутöма сизим ньöвъя Богородича.
Мужичöй тіралігтыр пе-тöма ывлаö. Сайкалöм бöрас висьталöма гöтырыслы, коді сійöс сувтöдіс.
Сизим ньöвъя Ен мам öбраз видзö лёк йöзысь, лöньöдö-раммöдö скöр сьö-лöмаясöс. Татшöм öбразыс и öшалö вöлöм Ивановъяслöн пызан весьтас.
КЕВМЫСЬ СЬÖЛÖМСЯНЬЫД –ОТСАЛАСНЫ
Мыйла йöзлы отсöг вы-лö локтöны вежаяс, Ен мам? Петкöдчылöны-ö найö вичкоса батьяслы? Тайö юалöмъяснас ме шыöдчи Сыктывкарса да Воркутаса епархияысь Филипп ай дорö.
– Енмыс кöсйö, мед йöзыс олісны öта-мöдсö пыдди пуктöмöн да сылы эскöмöн, – висьталö Филипп ай. – Суас кö неминуча, висьман, шогалан, колö шыöдчыны Ен дорö кевмысьöмöн. Сійö быть отсалас. А коді оз эскы сылöн вынö, ыстö пикö воöмалы морт мыгöра анделъясöс. Николай Чудотворец, Серафим Саровский да мукöд вежа олöны Ен дорын. И кор налы кевмысян, пыр и висьталасны Енмыслы корöмтö.
Миянлы аслынымлы Енмыс унаысь дивöсö петкöдліс. Николай Чудотворец туйын унаысь мездыліс. Коркö öтчыд туйын машинаным жугаліс. Кöрт тöв. Вой. Телефон оз уджав. Отсöг виччысьны некодсянь. И ми кутім кевмысьны Николай Угодниклы. Тöдса, сійö ветлысь-мунысьöс видзö лёкысь-притчаысь. И друг тыдовтчис машина би югöр. Сувтіс миян дорö. Машинанымöс домаліс да кыскис. Ме и юалі, мися, кыдзи тэнö шуöны, бур морт? "Николай", – вочавидзис сійö.
Мöдысь бара туйö йöрмылім. Бара жö войын неминучаыс суис. И сідзи жö виччысьтöг миян дорö сувтіс автобус. Пытшкас шоперыс кындзи некод эз вöв. Сійö миянлы и шуö: "Дивуйтчанныд? Со тайö вежаыс менö ыстіс. Ме сыкöд дас вит во нин ветлöдла" да индіс автобусас öшалысь Николай Чудотворецлöн öбраз вылö.