Власьтлöн быд сикас тшупöда чина йöз да депутатъяс öтарö дольöны, кар-сиктын олысьяслöн пö олöмыс лунысь-лун бурмö, удждон содö, государство зільö быд ногыс кокньöдны йöзöс... Та йылысь брунгöны радио да телевидение пыр, гижöны газетъясын. А локтан сиктö да, дзик мöд серпас аддзан: удж абу, йöв да картупель инавны некытчö, весиг чери кыйöмысь нин дзескöдöны-мыждöны. А öні со нöшта вит пöв донсялöма вöрбилет. Мужикулов балябöжсö гыжъялö, кыдзи пö сэсся кутам керка-пывсян тшупны, пес заптыны.
Кöрткерöс районса Ыджыд-виддзысь Юрий Кондачков зарни киа, горт гöгöрын дзик быдтор сяммö вöчны. Сійö буретш вöлі пывсянсö вевттьö. Вöрбилет донсялöм йылысь юöрыс шогöдöма жö.
ВЕСЬКЫД МАТ...
–Кольöм тöвнас нин этша вылö тöлысь ковмис котравны, медым босьтны вöр-билеттö. Серав кöть бöрд, а тадзи и эм. Первой лунас быдмысь пожöмъяссö "точкуйтім". Пасъялігас ывлаас вöлі кызь градус кöдзыд. Сэсся лун дас виччыси, кор арталасны пуяссö. Сетісны кабала. Автобусöн лэччылі Кöрткерöс сиктö, Сбербанкын сулалі öчередь. Мынті вöрбилетысь 500 шайт, а öтарö-мöдарö локтöм-мунöмысь туй вылö видзи 600 шайт. Чексö нуи лесничествоö. Но и тані бара крукöд: квайт час асылын колö нин сулавны лесничество öдзöс дорын. Сёрöнджык кö локтан, öчередьыс лоö зэв кузь, – висьталö Юрий Андреевич.
Тайö, вöлöмкö, сöмын медводдза на майшасьöмыс. Ыджыдвиддзын олысьяслы керка-пывсян вылö кражсö заптыны сетöны дас сайö километр ылнаысь, кöні асшöр уджалысьлöн котырыс керасьöма нин. Юрий Кондачков шуö, мый медбур пожöм-козсö предприни-матель, дерт, кералöма да нуöма. И керасын кольöм шылльö-мылльöсьыс нин сиктсаяс бöрйысьöны. Важöн пöль-бать керка да пывсян-жытник тшуплöмаöсь 120-150 вося пожöмысь. Дерт, сэсся стрöйбаыс зэв дыр сулавліс. А жебиник том пусьыд пывсяныд öдйö сісьмö-нёровтчö.
Чина йöз, кодъяс вынсьöдöмаöсь вöрбилет донсьöдöм йылысь индöдсö, эскöдöны, сиктсаяс пö аслыныс босьтöм вöрбилетсö иналöны асшöр уджалысьяслы да тадзи быттьö нажöвитчöны. Кодкö, гашкö, тадзисö и вöчлывліс, медым ловъя сьöмтор киас босьтыштны. Но выль индöдыс крукыштö зэв уна йöзöс. Бура тöдса, мый сиктын абу удж, а, сідзкö, и войтырыслöн абу удждоныс. Кыдзи öні татшöмыс кутас ньöбны вöрбилетсö? Али сиктсалы оз ков кыпöдны выль керка?
ПОЖÖМЫСЬ... СÖМЫН КАБАЛА?
Сыктывдін районса Пöинга посёлокысь телефон пыр звöнитліс мужичöй. Ним-овсö эз висьтав. Сійö тшöтш жö элясис вöрбилет донсялöм вылö. А нöшта на ёна дöз-мöдöмаöсь лесничествоын уджалысьяс. Водзті лесникъяс индылöмаöсь Пöингаын олысьяслы торъя керас, медым сэні найö заптісны пывсян-карта вылö краж либö пес. А талун посёлоксаяс караул горзöны. Матігöгöрсьыс пö став яг-рассö сетöмаöсь Сыктывкарса ЛПК-лöн вöр заптан öти пред- приятиелы, коді вермöма аукционас.
Тешкодьтор артмö: сикт-посёлокын олысьяс потöм вор дорын кольöмаöсь. Вöрын олöны, а потш ни пес заптыны оз лэдзны. Сэк жö чужан муын быдмысь пожöм-козйысь вöчöны кабала да картон. И та могысь вöрсö водзвыв нин юклöма-сетöма. Мыйла сикт-посёлокын олысьяслысь оз юавны, кодлы да кутшöм яг-рас позьö сетны? Татшöм вывтіасьöмыд Россияысь кындзи сэсся ни öти мукöд государствоын абу.
Коми озырсьыс-озыр вöрöн, мусирöн, биаруöн, уна мукöдторйöн. А сэк жö республикаын олысьяс, торйöн нин вужвойтыр, олöны гöля...