КОМИ РЕСПУБЛИКАСА ЮРАЛЫСЬ В.М.ГАЙЗЕРЛЫ
ВОСЬСА ПИСЬМÖ
Пыдди пуктана Вячеслав Михайлович!
Коми Республикаса журналистъяслöн котырöс майшöдлö республикаса печать да юöр сетан агентстволöн борд улö пырысь газет-журналъяслöн аскиа луныс налы зэв этша сьöм вичмöдöм понда. Торйöн нин ыджыд полöм чужö коми кывъя да челядь-томуловлы петасъяс вöсна.
Сідз, 2009 воын "Коми му" газет редакция" автономнöй учреждениелы, кытчö пырöны "Коми му" да "Йöлöга" газетъяс, "Чушканзі" да "Би кинь" журналъяс, бюджетысь вичмöдісны 13 миллион 273 сюрс шайт. 2010 воын тайö лыдпасыс чиніс 1,6 миллион, таво — нöшта 4,2 миллион шайт вылö. Артыштны кö газет-журналъяс йöзöдöм, уджалысьяслы нажöтка вештöм, вот да жилищно-коммунальнöй услугаясысь мынтысьöм вылö сьöмсö, холдинглы оз тырмы 4 миллионысь унджык шайт. Редакцияясын рöскодсö да автономнöй учреждениелысь штатсö водзö чинтыны некытчö нин. Уджалысьяслысь киритöма став содтöдсö. Петасъясса редакторъяслöн нажöткаыс корреспондентъяслöн ыджда. А реклама йöзöдöмысь сьöм весьтö артмöм "розьсö" некыдзи он "дöм".
Автономнöй учреждениеса главнöй редакторъяс унаысь шыöдчылісны печать да юöр сетан агентствоöн веськöдлысьяс дорö корöмöн содтыны сьöмсö, но вочакывйыс век öти — отсавны позянлун абу. Гöрöдсö пö разьны позяс сöмын выль проектъяс збыльмöдöм весьтö. Но öд чужан кывъя да челядь-томуловлы петасъясыс сідз нин лыддьыссьöны социальнöй тöдчанлуна уджтасъясöн. Найöс лöсьöдöма абу нажöвитчöм ради, а коми кыв, литература, история да культура видзöм, оланпас дасьтан да сійöс збыльмöдан власьтлöн уджöн тöдмöдöм, кар-сиктъясса войтырлысь олöмсö да мытшöдъяссö петкöдлöм, быдмысь войтырöс бурас туйдöм-ышöдöм могысь.
Колö пасйыны, мый "Коми му" холдингö пырысь редакцияясын зільысьяс оз сöмын дасьтыны йöзлы колана да бур петасъяс, но и водзмöстчöны чужан му нимöдöмын: министерство-ведомствояскöд, культура да велöдан учреждениеяскöд öтув збыльмöдöны уна сикас проект, пырöдчöны общественнöй олöмö.
Ставсö тайöс тöд вылын кутöмöн республикаса журналистъяс котырлöн правление вöчö кывкöртöд — агентстволöн борд улö пырысь газет-журналъясын, торйöн нин республикаса да районса коми кывъя да челядь-томуловлы петасъясын, бюджетысь сьöм чинтöм вöсна серпасыс зэв ёна омöльтчис, а тайö вермас вайöдны найöс бырö-дöмöдз. Сідзкö, Коми Республикаын олысьлöн бырö Оланподулын урчитöм правоыс — тöдмасьны чужан кыв вылын юöръясöн.
Сэк жö Россияса мукöд регионъясын национальнöй петасъяс вöсна тырвыйö тöждысьöны. Сідз, Ханты-Манси кытшын 2004 восянь збыльмöдсьö чужан кывъя петасъяслы отсöг сетöм кузя оланпас. Россия Федерацияса регионъясын сутки чöж юргö башкир да татара кывъяс вылын лыдпаса радио да телевидение. Казьтыштам, миян республикаын неважöн бырöдісны Коми йöзкостса радио. Кывсьö, Сыктывкарса госуниверситетын тавосянь оз кутны босьтны "коми филология" специальносьт серти велöдчысьясöс. Кöть эськö буретш тайö вузыс дасьтö национальнöй журналистикаын уджалысьясöс.
И тайö ставыс вöчсьö Коми Республикалы 90 во тыран воö!
Вячеслав Михайлович, ми шыöдчам Тіян дорö корöмöн пыдісянь видлавны тайö майшöдлана да ыджыд тöжд чужтана юалöмсö да эскам, мый Тіян отсöгöн гöрöдсö лоö разьöма.