Уджöй менам йитчöма чужан коми кыв велöдан да велöдчан небöгъяс лöсьö-дöмкöд. Пыр мыйкö выльтор колö тöдмавны, туявны, öд выль учебниктö вö-чигöн век нин мöвпалан он сöмын локтан во йывсьыс, а 4-5 во вылö водзöджык зілян видзöдлыны. Кор на выльысьсö лоö дасьтöма да лэдзöма татшöм небöгъяссö.

Öнiя вежласяна олöмас быдтор вермас лоны, и виччысьтöг волö юрö мöвп: зiлян-вöчан учебниктö, а тэнад уджыд кодлыкö ковмас али оз. Колö-ö, сiдзкö, мырсьыны-ноксьыны? Но мортыд тай век надеяöн олан, виччысян бурсö, со и водзö уджалам, уджъёртъяскöд зілям-вöчам велöдчан небöгъяс, кывкудъяс, велöдысьлы методика кузя пособиеяс да с.в.

Миян Коми муын эмöсь на сиктса школаяс, кöнi йöзыслöн, а сiдзкö и, быдмысь войтырыслöн кольöма на коми руыс. Школаыс, велöдысьясыс абу на дзикöдз эновтчöмаöсь чужан кывсьыс, культурасьыс. Коми кыв велöдан уджас кöть кытъяскö дзуртышталö жö, но чужан кывсö радейтöмыс татшöм школаясас эм. И велöдысьыслöн аслас синмыс югыд, сьöлöмыс пöсь, уджсö пыдди пуктö, вирас сылöн коми кыв дорö муслуныс. Татшöм велöдысь дорас книгатö вöчигöн сёысь шыöдчылан, вöчан да коран видзöдлыны, лöсялö али оз небöгас пыртöм уджыс, правилöыс, серпасторйыс да уна мукöдтор. Кор петас выль небöгыс, авторыслы и отсасьысьыслы любö.

Майшöдлö, мый содö сиктса школа лыдыс, кöнi чужан коми кывсö дугдöны велöдны, став челядьыс пö рочöсь. Мыйлакö оз эскыссьы дзик рочмöмыслы. Быдмысь челядь быттьö эськö рочасьöны, но налöн кывйыс ньöти абу сöвмöм, а горт-гöгöрса. Öта-мöдыскöд варовитігöн содталасны нöшта пельтö сьöдöдысь ёг кывъяс, а татшöм сорасыд некутшöм сёрни оз мичмöд. А ассьыд кывтö кö он радейт, сідзкö, и мукöдыс веськодь, баргам тай со, кыдзи кужам.

Уна семьяын быдтасъясыслöн гортгöгöрса роча-сьöмыс бать-мамлы сьöлöм вылас воö. Найö мöвпалöны, мый кагаыс налöн коминас оз нин куж сёрнитны, нинöмла, сiдзкö, и школаас велöдны сійöс. Ас костаныс бать-мам, пöль-пöч сёрнитöны комиöн, а челядьыскöд рочасьöны. А верстьöясöн роч шыяссö коми ног шуа-лöмыс, колöкö на, роч грамматикасö торкалöмыс ныв-пиыслысь сёрнисö оз озырмöдны ни мичмöдны. Сы йылысь гырысьяс оз мöвпавны, но рочасьöны! Кедзовтöны асьныс коми бать-мамыс чужан кывнысö, мыйöн сёрнитісны быдмигас, воисны мортö.

Геннадий Анатольевич Юшков чужан кыв йылысь аслас öти гижöдын пасйылöма, мый гортса кывйыд пö зэв на гöль, колö на пö уна тöдмавны, корсьысьны, мед мортыс кужис сёрнитны да гижны стöч, мича, серпаса озыр кывйöн. Тадзи шуöмыс и комилы, и мукöд кывйöн сёрнитысьлы лöсялö. Школаö пырысь челядьлöн абу на сöвмöма ни коми сёрниыс, ни рочыс. Сідзкö, велöдны позьö и колö кыкнан кывсö. Коми да роч грамматикаяслöн уна эм öткодьторйыс. Кывъяссö велöдöмыс сöмын содтас öтисьыс и мöдсьыс тöдöмлунсö.

Тулыснас мойвиис ветлыны Сыктывдiн районысь Пальса да Придашса школаясö, кöні коми кывсö велöдöны на, кöть и сійö кусан выйын. Районас мунiс медбур школа вылö конкурс, да экспертъяс — методистъяс, районса школаясöн веськöдлысьяс, велöдысьяс — донъя-лiсны урокъяс, школаыслысь öтув уджсö, кутшöм вермöмъяс эмöсь, мый колö бурмöдны, тöдмасисны водзö вылö могъяснас. Меным уджыс тшöтш вичмис — кывзыны коми кыв урокъяс, донъявны, мый и кöсйи вöчны радпырысь.

Но ыпнитлöм радлунöй, кыпыдлунöй вочасöн вежсис, сиргаг моз пысасис вежöрö: кыдзи нö тадзи, мыйла нö тадзи?

Видзаасьöны школаясад, дерт нин, рочöн. Коми сёрнисö кывлi сöмын урокъяс вылас. И со öтар школаас кö велöдысьыс да челядьыс сёрнитiсны на ас кывйöн (öткымын велöдчысь кöть пинь пырыс сёрнитiс, но комиöн), мöдас ачыс велöдысьыс быд здук öлöдiс велöдчысьсö, рочöн пö юав, он кö гöгöрво, эн пов. А велöдчысь нывкаыс молодеч, сёрнитö коминас и ставсö гöгöрвоö, сёрни шыяссö шуаланногыс мича коми, тöдö коми грамматикасö сы мында, мыйта колö программа сертиыс, тер-минъясас оз ылав, вöчö кыв-кöртöдъяс да с.в. Мыйла велöдысьыс öтырыш тшöк-тö рочöн юавны — гöгöрвотöм.

Сэсся ичöт класса велöдчысьяс петкöдлiсны "Урок здоровья". Чайтанныд, мый комиöн вöлi? Коми ног рочöн сёрнитісны челядь. А ворсiсны непöштö роч нима ошпиянöс да бурдöдысьöс (коми йывсьыс ог нин шу), — Тим да Том да доктор Найс велöдiсны пинь весавны, ки мыськыны. Кöнi нö миян варгыль кока ошпиыс, табъя кока муса кöчильыс, пашкыр бöжа ичöт урыс? Али нö найö сöмын Англияса вöр-ваын олысьяс? Танi, дерт, велöдысьыслöн тырмытöмторйыс. Ог ылö мун, орччöда карса садкöд, школакöд, кöні, дерт, кызвын челядьыс рочöн сёрнитöны. Уналаын видзаасян кывъяссö комиöн и рочöн гижöма, петкöдласны кö кутшöмкö урок, занятие, челядь кывзасны либö лыддясны ас му йылысь кутшöмкö гижöд, юöр, коми ворсöмöн ворсасны, казьтыласны нöдкыв, шусьöг да уна мукöдтор, мый содтö-паськöдö асгöгöрса олöм тöдöмсö, сiдзкö и, сöвмöдö оланiн дорö муслунсö, тайö му вылас важ-важысянь олысь йöз-лысь культура, кыв пыдди пуктöмсö.

Гажтöм лоис сыысь, мый Пальса да Придашса, нэмö-вöйся коми сиктъясса, школаяслöн ас руыс вошöма, ни роч, ни коми абу. Челядьыслöн школасö радейтöмыс бырыштöма жö. Мыйла тадзи? Код сайынöсь татшöм шогöдан вежсьöмъясыс? Оз öд асьныс челядь лöсьöдны школаас велöдан плансö, уджалан ладсö, урок лыдсö.

Чужан кывсö öтдортöмыс заводитчö верстьöсянь. Кытчö ковмас, мыйла колö велöднысö? — татшöм нога юалöм тшöкыда кывлан школаын уджсö котыртысьяссянь. Öнi миян ЕГЭ! Сiдзкö, вай та понда сэсся эновтчам чужан кывнымöс велöдöмысь, а коми кагасö пондам коминас велöдны рочöс моз. Мый таысь артмас? Рочöн жö шуа: ни два, ни полтора. Мыйла дугöдчыны чужан кывсö велöдöмысь? Кывлан татшöм воча-кыв: сьöкыд пö, ог пö гöгöрвоöй öнія коми кывсö. Грамматика терминъяс пö велöдчан небöгас комиöдöмаöсь, да бать-мам оз гöгöрвоны. А школаас нö кодöс велöдöны, оз челядьöс? Налöн вежöрыс ёсь, паметьыс бур, зэв öдйö велалöны, некутшöм торъя сьöкыдлун абу. А челядьлöн бать-мамлысь юрсö позис жö югдöдыштны собранньö вылын либö торъя гижöдторйöн.

Кыдзи нö йöзыс, сiйö жö бать-мамыс, пöч-пöльыс сёрнитöны? Збыль, кывзан да, мöд кывйöн быттьö, шуам: соберитiм малинатö, да кодкö повзьöдiс куст сайсянь, оглядывайтчыны кутiм; керка крышасö кроитiсны; опилкиыс öзйöма да сiдз водзö. Ог пыксьы, сёрнитiгад шусьылö быд ногыс. Но кывйыс, коми кывйыс, эз на некытчö вош, малинаыд öмидзöн, опилкиыд пилипызьöн шусьылiс и шусьö коминас. Мисьтöм али мый нимыс? Мыйта серпаса стöч, мича кыв позьö шуны комиöн, но рочасям, кужам кöть ог. А велöдчан небöгас — учебникас — колö кыдъя рочöн жö гижны? Либö коми газет-журналас?

Абу терминын делöыс, мыйынкö мöдторйын. Гашкö, мортыслöн вежöрас, пытш-кöс культураас…

Нимкодя пасъя, велöдчысьяслысь кутшöм мича кывйöн гижöм уджъяс йöзöдöны "Йöлöга" да "Коми му" газетъяс. Неважöн любöпырысь лыдди велöдчысьяслысь кывбуръяс. Радейтöмöн, сьöлöманыс чужöм кывъясöн гижöмаöсь челядь коми кыв йывсьыс: морöс бердöс шонтö, сійö енэжшöрса шонді, медся дона, медся муса, парма кöра коми кывйöй, медбур ёртöй… Ловруыд кыптö. Сiдзкö, найöс велöдысьыс эм, сэтшöм велöдысьыслы абу веськодь, кыдзи быдмас да кутшöм мортöн лоас сылы синмас веськыда видзöдысьыс, сылысь быд кыв пель саяс сюркнялысьыс. Аттьö татшöм велöдысьыслы!

И со кутшöм помшуöм артмö тайö гижöдыслы: быдмысь войтырöс велöдöмыд верстьö йöз сайын — бать-мам, школаын велöдысь, журнал-газет, радиопередача вöчысь да мукöд сайын. Сiдзкö, кывсö радейтöмыс челядь-йылöмыслöн чужö-сöвмö сэк, кор аслас верстьöыслöн сiйö збыльысь эм, кор абу веськодь сылы чужанiныс, рöдыс, кысянь босьтöма сiйö вир-яйсö, олан этшсö.

Шулöмаöсь тöдчана йöз: чужан кывйыд пö мам йöлыскöд пырö-йиджö быдтан кагаыслы вежöрас, а мыйла, сiдзкö, сiйöс вуштыны. Воштöмторйыд век зэв дона. Кывтö вунöдан, мам дорад кöдзалан, а сэсся кутшöм мортöн, кодöн лоан? Мед сэтшöмöдзыс эськö он жö во.

Век жö ме да менам уджъёртъясöй эскам, мый чужан кыв велöдан небöгъяссö лöсьöдам велöдчысьлы, аскиа выль гижысьлы, енбиа поэтлы, артистлы, сьыланкыв лöсьöдысьлы, ас юрöн олысь мортлы.