Некымын во сайын "Коми му" газет йöзöдліс роч этнограф, ветлысь-мунысь, гижысь Сергей Иванович Сергельлысь (1883-1955) Коми мулöн Помöсдін сиктö да Бадьёльйыв грездö волöм йылысь пасйöдъяс, кодъяс колисны миян лыддьысьысьяслöн паметьö. Öд сійö воліс Эжва йылö революцияöдз на. И сылöн гижöдъясын коми войтырлöн сійö кадся олöм-вылöмыс кыдзкö аслысногöн мöрччанаöн воссис миян водзын. А отсаліс сэки найöс йöзöдны Помöсдінысь челядьлöн творчество керкаса педагог Александр Игоревич Уляшев.
И со тайö лунъясö Сыктывкарын, Коми Республикаса Национальнöй галереяын воссис "Коми-зыряна С.И.Сергельлöн фотографияяс вылын" выставка. Снимокъяссö вöчöма XX нэм заводитчигöн. Видзöны найöс Санкт-Петербургын Пётр Великий нима антропология да этнография музейын, коді бурджыка тöдса кыдзи Кунсткамера. Воисны фотографияясыс Сыктывкарö Александр Иванович Терюковлöн зільöмöн. Сійö юрнуöдö Пётр Великий нима антропология да этнография музейлöн Россияса Европа юкöнын олысь асыввывса славяналöн да войтырлöн этнография отделöн.
С.И.Сергельлöн коллекцияысь фотографияяссö вöлі йöзöдöма зэв нин унаысь. Но налысь авторсö некöн эз индывлыны. Со и сы йылысь вунöдісны. Сöмын бöръя воясас Россияса этнография музейын да Кунсткамераын уджалысьяс сылысь гижöдъяссö да снимокъяссö туялігöн выльысь ловзьöдісны С.И.Сергельлысь нимсö. Санкт-Петербургын регыд лоö лэдзöма Коми му туялысьлы сиöм небöг. А неважöн жö Россияса этнография музейын восьтöма С.И.Сергельлы сиöм экспозиция.
Сергей Иванович Сергель сійö войтыр лыдысь, кодъяс ассьыныс став олöмсö сетісны Россиялы, ас войтырлы. 1906 воын Роч музейса этнография отделлöн вöзйöм серти сійö воліс Коми муö татчöс вужвойтырлысь культурасö туялöм могысь. Экспедициялöн туялöмъясыс вöліны сэтшöм тöдчанаöсь, мый Санкт-Петербургса университетысь физико-математическöй факультетлöн естественнöй отделениеса студентöс кутісны шуны "этнографöн".
Сыктывкарö вайисны С.И.Сергельлысь 100 гöгöр фотография, кöні серпасалöма сійö кадся коми войтырлысь паськöмсö, керкаяс да мукöд стрöйбаяс. Дерт жö, кольöны паметьö мужичöйяслöн да нывбабаяслöн чужöмъясыс.
Выставкаыс кутас уджавны сентябрь помöдз.
Cнимокъяс вылын: А.И.Терюков тöдмöдö выставкаöн; важся фотографияяс висьталöны.