Талун уджалысь на олöмаджык войтырöс ёна майшöдлö сійö, збыльысь-ö овмас петны пенсия вылö öнія серти ёна сёрöнджык. Найöс, дерт жö, шызьöдісны Санкт Петербургын неважöнся экономическöй форум вылын Россияса вице-премьер, сьöм овмöсса министр Алексей Кудринлöн кывъясыс, быттьöкö миян войтырлы пенсия вылö петан арлыдсö лоö содтöма. Но корджык тайöс вöчасны, абу на тöдса.

Ставыс, вöлöмкö, сы сайын, мый Россияса Пенсия фондлы талун кежлö оз тырмы триллион сайö шайт, либö странаса бюджетлöн дасöд юкöныс. Водзтіджык та вылö сьöмсö босьтлісны йöзлысь олöм бурмöдан национальнöй фондысь. Но кризис пöдлаліс тайö туйсö, фондас сьöмыс кутіс öдйö рекмыны да. Öні став надеяыс бюджет вылö, коді öдвакö вермас дыр отсавны. Öд сэтчö сьöмыс оз жö дугдывтöг киссьы. Сэсся и бöръя воясö йöзлöн олан арлыд содöмкöд йи-тöдын пыр ичöтджык кутіс лоны коластыс уджалысь войтыр да пенсионеръяс костын. Алексей Кудринлöн кывъяс серти, талун странаын 100 пенсионер вылö воö 128 уджалысь, 2012 воö лоас нин 112 уджалысь, а 2030 во кежлö быд пенсионер вылö кутас воны öти уджалысь мортöн. Сійö öдвакö вермас вердны странаöс. И нинöм абу омöльыс сыын, мый талун Пенсия фондлöн юöртöм серти, Россияса 38 миллион пенсионерысь 10 миллионыс уджалöны на. А 2015 во бöрын кö пондасны уджавны 10 миллионысь унджык пенсионер, сöмын сэки позяс сёрнитны пенсия вылö петан арлыд содтöм йылысь. Тадзи шуис журналистъяскöд аддзысьлігöн Россияса войтырлысь дзоньвидзалун видзöм да налысь олöмсö бурмöдöм кузя министр Татьяна Голикова.

Но ставыс бара жö пыксьö сыö, мый миян странаын талун кежлö мортыс олö шöркодя 69,2 арöсöдз. Олан нэм кузьта серти Россия мирын 131-öд страна. Миян нывбабаяс шöркодя олöны 74 арöсöдз, а мужичöйяс и 60-сö оз тыртны.

Öткодявны кö мукöд странакöд, США-ын мужичöйяс олöны 75 арöсöдз, нывбабаяс — 81-öдз. Китайын мужичöйяс воöдчöны 71 арöсöдз, а нывбабаяс—75-öдз. Швецияын мужичöй олö 78 арöсöдз, нывбаба—83-öдз. Вермас артмыны сідзи, мый пенсия вылö петан арлыдсö кö содтасны, миян кызвын мужичöйыс сідзи и оз удитны аддзывны пенсиясö.

Абу бурджык серпасыс и Комиын. Россияын серти миян республикаын йöзыс олöны шöркодя 1,7 воöн эшаджык. Та кузя ми Россияын 57-öд местаынöсь. Медся унаöн Комиын кулöны сьöлöм висьöмъясысь, лёк пыкöсъясысь, пагалöмысь, доймалöмысь. Дерт жö, уналöн нэмыс дженьдаммö вина-водка юöм вöсна. Торйöн нин омöль та кузя серпасыс сиктъясын. Сідз, сійö жö Сыктывдін районысь Яснöг посёлокса олысьяслы ассьыныс вирнысö донъялöм могысь колö ветлывлыны Паджгаö. А ылі сиктъясса олысьяс, сэні больничаясыд эз лоны да, та вöсна дзик веськодя видзöдöны асланыс дзоньвидзалун вылö. Со и кадысь водз мунöны мöдаръюгыдö да оз овны пенсияöдз. Татшöмъясыс шойччыны петан арлыдсö содтöм йылысь кывлöм бöрын сöмын шога нюмъялöны да öвтыштчöны кинаныс. Мыйта пö Енмыс сетöма, сы мында и олам. А миянлы пö тырмас. И артмö, мый государствоыд пайкö миянлысь сідз нин гöля олысь войтырöс.

Кор волывла ас сиктö да кежавла шойна вылö матыссаясöс казьтыштігмоз, шемöс босьтö, кутшöм водз миян сиктсаяс мунöны таладор югыдсьыс. Налы эськö водзö овны да уджавны. А пенсия вылö петöм бöрын шойччыны внук-внучкаяснас нимкодясигмоз. Но со и тайö кадсö насянь кöсйöны ылыстны.

Москваса чиновникъяс, дерт, велалöмаöсь ыстысьны, мый йöзыс бöръя кадас пондісны дырджык да бурджыка овны. И нинöм пö омöльыс оз ло, содтасны кö пенсия вылö петан арлыдсö. Но найö торъялöмаöсь нин прöстöй войтырлöн олöмысь. Кремльсяньыд öд унатор оз тыдав. Кор аслад зептыд кыз, кажитчö, мый и мукöдыс оз омöльджыка овны. А мед воласны найö ылі сикт-грездъясö, кытчö асфальтыс эз на во, да матісяньджык тöдмасясны сэні олысьяскöд. Сэки, гашкö, унатор гöгöрвоасны.

Збыльысь, миян, торйöн нин ылыссаджык сикт-грездъяс оз на сэтшöм тэрыба пырöдчыны öнія рынок модаа олöмас. Налöн позянлуныс та вылö абу. Сэні зэв уна уджтöмалысь оз аддзыны сьöкыдлунъясысь петан туйсö да вочасöн дзикöдз лэдзчысьöны. Сиктса войтыр пиысь джынсьыс унджыкыс олöны мукöд серти ёна гöльджыка. Со и сэтчöс том йöз быдмыштöм бöрас зільöны öдйöджык мунны чужанінсьыс. Олöмаяс петöны пенсия вылö, а найöс некодлы вежны. Сэк жö миян сиктъясын талун ёнджыкасö пенсионеръяс бертöны гортса кызвын уджсö. Унджык семьяыс буретш бергöдчöны олöма войтырлöн пенсияяс тшöт весьтö.

А удждонтö талун мынтöны сöмын налы, кодъяс сиктса учреждениеясысь öтдор зільöны видз-му предприятиеясын да öтувъя овмöсъясын. Россияса видз-му овмöс министерстволöн юöртöм серти, кольöм во сэні шöркодь удждоныс вöлі 9.523 шайт, медся этша экономикалöн мукöд юкöнъяс серти. Гöгöрвоана, мый татшöм удждоннад он ёна чеччав. Да и пенсияыд оз нин ло сы мында, мыйта эськö колö судзсянаджык олöм вылö.

А найöс, кодъяс кутöны талун ассьыныс овмöс, позьö öд сідзжö шуны уджтöмалысьясöн. И татшöмъясыс этша мыйкö вермасны вöчны ыджыдджык пенсия босьтöм могысь. Сы вöсна, мый насянь корöны уджалöм да удждон йылысь, Россияса Пенсия фондö страхуйтан взносъяс мынтöм йылысь официальнöй документъяс. Но абу кокни судзöдны тайö кабалаяссö. Мытшöдыс помтöм. И со та вöсна зэв уналы воö сöмын 2.562 шайт — пöрысьлун серти медічöт пенсия. Ов сы вылö, кыдзи кужан.

Сэк жö, экспертъяслöн висьталöм серти, сёрнисö талун колö нуöдны оз сы йылысь, кутшöм арлыдсянь петны войтырыслы пенсия вылö. Став лёкыс сыын, мый миян странаын омöля на уджалö экономика, ичöтöсь удждонъяс. Тайö нелючкияссьыс медводз и колö мынтöдчыны. Медым эськö миян странаын йöзыс олісны 75 арöсысь эз этшаджык. Медым медикъяс ёнджыка тöждысисны олöма войтырлöн дзоньвидзалун вöсна. Сöмын сэки, гашкö, позяс сёрнитны пенсия вылö петан арлыд содтöм йылысь. Но кор на кутасны овны миян войтыр талунъя серти ёна дырджык. Та вылö öдвакö кодкö вермас вочавидзны.

Сэсся, кыдзи шуö Госдумаса депутат Геннадий Гудков, пенсия вылö петан арлыдсö содтöмыс оз нин вай сы мында бурсö. Россияса Пенсия фондын артыштісны, мый тайö сетас содтöд сöмын 40-90 миллиард шайт. А тайö оз отсав вежны бурланьö серпассö. Оз позь вунöдны и сы йылысь, мый талун медся уна уджтöмалысьыс том йöз пöвстын. А пенсия вылö петан арлыд содтöм бöрын на пöвстын уджтöмалысьыс лоас нöшта на унджык. Олöмаяс оз кутны тэрмасьны лэдзны ас пыдди томъясöс. Сідзкö, кытчöдз оз бурмы олöмыс, кытчöдз йöз оз кутны ёна пöрысьöдз овны, нинöм и сёрнитны пенсия вылö петан кадсö вештöм йылысь.

И бара на окота шуны некымын кыв миян пенсияяслöн ыджда йылысь. Мыйла нö суйöрсайса уна странаын йöзыс шойччöг вылö петöм бöрын босьтчöны ветлöдлыны став мир пасьта? Да сы вöсна, мый налöн пенсияыс удждонысь абу нин ёна ичöт. А миян уна олöма войтыр пыр на уджалöны да оз кöсйыны петны шойччыны. Аддзöны, мый сöмын пенсия вылад овны лоас зэв сьöкыд. Сы вöсна жö и пенсионеръяс пиысь унаöн, кытчöдз вермöны, вöдитöны дача. Сэні быдтöм град выв пуктасъясыс и отсалöны налы бергöдчыны ичöт пенсия вылö олігöн. Жальöсь овлывлöны татшöм войтырыс, кор аддза, кы-дзи рытъяснас гырысь мышнопъясöн чотігтырйи локтöны дачаысь гортаныс. А унаöн сэсся и вуза-сьöны асланыс быдтöмторъясöн. Мый вöчан, государствоыд кö оз тэрмась отсавны ас войтырлы. Сöмын тай найö, кодъяслы колö кывкутны миян олöма войтыр вöсна, асьнысö оз вунöдны. Со мыйта сёрни öні мунö Госдумаса депутатъяслы пенсияяссö содтöм йылысь. И сэки окота казьтыштны на йылысь, кодъяслы сідз и эз удайтчы овны пенсияöдз да и водзö вылö сэтчöдз оз кутны овны. Коді нö мöвпыштлас тайö войтыр йывсьыс?