Уна нималана йöз петалісны Дереваннöйысь. Öти на пиысь — республикаын бура тöдса учёнöй-экономист Михаил Алексеевич Чувъюров.
Чужлöма сійö 1935 вося август 6 лунö. Вöлöма семьяас вит челядь пиысь нёльöдöн. Быдмöма батьтöг, кодöс лöж юöр серти пуксьöдöмаöсь колонияö. Сэні чорыда висьмöма да 1937 воын вöля вылö петöм бöрын регыд кувсьöма.
Мамыс, Александра Павловна Чувъюрова, ас кадö помавлöма начальнöй школа. Война дырйи да войнабöрся воясö вöлöма колхозса председательöн. Бöрйылöмаöсь Кулöмдін райсöветса, Коми АССР-ысь да СССР-ысь Верховнöй Сöветъясса депутатöн.
Дереваннöйын школа помалöм бöрын Михаил Чувъюров пырис велöдчыны Ульянаса видз-му овмöс техникумö, кодöс зэв бура помаліс 1954 воын. Сійö жö воас сюсь зон шуис пырны Тимирязев нима видз-му овмöс академиялöн экономика факультетö. Сійöс, кыдзи бур велöдчысьöс, вермисны босьтны экзаменъястöг. Но деканатын вочавидзöмаöсь, мый 1954 во кежлö студентыс тырмымöн нин. Сійö бöр локтіс Комиö да кутіс уджавны агрономöн Сыктывдін районысь Придаш сиктса колхозын. Но эз эновтчы аслас кöсйöмысь да тайö академияас пырис 1957 воын армияын служитöм бöрын нин. Сылы сэки ковмис петкöдлыны тöдöмлунсö сöмын физикаысь.
Академия зэв бура помалöм бöрын Михаил Чувъюровöс босьтöны уджавны Журавский нима Коми Республикаса видз-му овмöслöн опытнöй станцияö отделса веськöдлысьöн, учёнöй секретарöн. Во мысти вуджö инструкторöн партия обкомö. А сэсся КПСС ЦК бердын общественнöй наукаяслысь академия помалöм бöрын лоö партия обкомса лекторöн, ёна ветлöдлö лыддьыны лекцияяс республика пасьта. Сэсся велöдö Коми пединститутын, öттшöтш веськöдлö рытъя университетын марксизм-ленинизм кафедраöн.
1970-1977 воясö уджалö Коми пединститутын доцентöн, философия да политэкономия кафедраса веськöдлысьöн. 1977-1980 воясын зільö вöр промышленносьтса веськöдлысьяслысь да специалистъяслысь тöдöмлунъяс кыпöдан став Союзса институтлöн Сыктывкарса филиалын доцентöн, управление да экономика кафедраса веськöдлысьöн. Сэсся недыр уджалö Тимирязев нима видз-му овмöс академиялöн Смоленскса филиалын доцентöн, но регыд бöр локтö гортас да выльысь босьтчö Журавский нима опытнöй станцияын уджö, öттшöтш велöдö Сыктывкарса университетын.
Учёнöй-экономистъяслы бура тöдсаöсь Михаил Чувъюровлöн видз-му овмöс наукаын зільöмъясыс. Сылöн да сы юрнуöдöм улын мукöд учёнöйяслöн зільöмöн дасьтöма да лэдзöма Комиын му бура вöдитöм, скöт видзöм, видз-му овмöс öнія кадыслöн корöмъяс серти котыртöм йылысь научнöй уджъяс. Тöдсаöсь и Россиялöн талунъя социально-экономическöй сöвмöм йылысь сылöн уджъясыс. Сэні учёнöй восьсöн гижö, мый выль сикас монополияяс экономикалöн уна юкöнын колисны Россияöс ёна бöрö. Аслас бöръя кадся научнöй уджъясын М.А.Чувъюров висьталö, кыдзи Коми Республикалы колö восьлавны рыноклань, мыйла чужис мирын да Россияын бöръя кадся кризисыс да кыдзи öдйöджык мездысьны сыысь. Уна во сійö вöлі Коми Республикаса Юралысь бердын вылыс экономическöй сöветö пырысьöн, асшöр экспертöн, зілис туявны биологическöй да социально-экономическöй тэчасъяс бурджыка уджöдöм кузя могъяс.
1962 восянь 2010 воöдз йöзöдіс 170 сайö научнöй удж, на пöвстын 12 монография, кодъясöс гижис öтнасöн да мукöдкöд öтвылысь. 20 сайö во сылысь уджъяссö йöзöдісны Ыджыд Сöветскöй Энциклопедиялöн быд вося петасын. Учёнöйлысь корсьысьöмъяссö сідзжö печатайтöма Молдавияса Сöветскöй Энциклопедияын, Коми Республикаса Энциклопедиялöн коймöд томын.
Бöръя кадö (2000-2010 воясö) Коми Республикаса да Россияса газет-журналъясын Михаил Алексеевич йöзöдіс 85 статья, кöні сёрниыс мунö Комилöн да дзоньнас страналöн социально-экономическöй сöвман туйяс йылысь. Учёнöйöс ёна майшöдлö, кутшöмöн лоö аскиа луныс Россиялöн, кыдзи öдйöджык мездысьны уна сикас сьöкыдлунъясысь. Та йылысь сійö восьсöн гижö Россияса Президент Дмитрий Медведевлы, премьер-министр Владимир Путинлы, КПРФ-са нырщик Геннадий Зюгановлы, ЛДПР-öн юрнуöдысь Владимир Жириновскийлы, уна мукöд гырысь йöзлы, вензьö накöд Россиялöн сöвман туйяс йылысь.
И таын медводз петкöдчö Михаил Чувъюровлöн, кыдзи сöстöм сьöлöма, ас му вöсна висьысь мортлöн да Россияса збыльысь гражданинлöн видзöдласыс. Аслас корсьысьöмъясын сійö зільö сöмын бурöс ас войтырлы. Мый торйöн нин окота пасйыны, ыджыд веськöдлысьяс пыр вочавидзöны Михаил Алексеевичлöн сьöлöмсянь петысь шыасьöмъяс вылö. Найö бура гöгöрвоöны сылысь майшасьöмъяссö. Öд буретш татшöм войтырыслöн зільöмыс и отсалö стöчмöдны страналысь водзö мунан туйвизьяссö. Бур, мый эмöсь татшöм йöзыс. Бур, мый миян страна озыр наöн. Тайö сетö ыджыд лача, мый Россиялöн аскиа луныс лоас талунъя серти ёна бурджык, мый сійö регыдъя кадöн кыпöдчас ёна вылöджык.
Уна во нин тöдса тайö ыджыд вежöра, восьса сьöлöма, пыр серамбана мортыскöд. Быд паныдасигöн восьсöн сёрнитам öнія олöм-вылöм йылысь, юксям асланым майшасьöмъясöн. И сійöс кывзöм бöрын пыр жö кокниджык овлывлö лов вылын. Сы вöсна, мый сійö эскö аскиа лунö да кужö эскöдны бурас и мукöдöс.
И мед жö Михаил Чувъюровлöн и водзö вöлі бур дзоньвидзалун, мед сійö унатор на вöчас ас войтырлы олöм-вылöмас.
Иван БЕЛЫХ,
коми гижысь.
"Коми му" газетса уджалысьяс пöся чолöмалöны Михаил Алексеевич Чувъюровöс сылöн олöмын тшупöда пасöн, сиöны кузь нэм да бур шуд.
"Коми му" газет,
2010 вося август 5 лун.