Ольга Ивановна Мишаринаöс сöмын велöдысьöн аддзан. Ачыс сiйö ичöсяньыс мöд удж йылысь абу мöвпавлöма. Таво комын витöд во нин, кыдзи велöдö чужан Ыджыдвидз сиктса школаын коми кыв да литература.
Уна вося бур уджысь Ольга Ивановнаöс пасйöмаöсь "Отличник просвещения" знакöн, Россияса йöзöс велöдан министерстволöн Почёт грамотаöн.
Öнöдз на "ворса"
--Дзоля дырйи пöдругакöд школаысь ворслiм. Тыдалö, эг пöт да öнöдз на ворса, --шмонитö Ольга Ивановна. --Ставыс вöлi урок вылын моз. Стенын öшалiс дöска, кытчö мелйöн шыпасъяс гижавлi. Джоджын пукалiсны велöдчысьяс. Дерт, классын öти велöдчысь -- ловъя морт – ме либö пöдругаöй, а мукöдыс аканьяс. Нинакöд вежласьöмöн учителялiм. Талун ме, а аски сiйö.
Збыль вылас кö, велöдысьлысь уджсö ворсöмкöд он орччаöд. Мамыс Ольга Ивановналöн велöдысьöн жö вöлöма да нывка ичöтсяньыс тöдöма, кутшöм сьöкыд тайö уджыс. Пыр пö мамöй школаын вöлi, гортö сёрöн волывлiс. И рытъяснас дыр пукалiс, аскиа урокъяс кежлö дасьтысис.
--Висьöмтö, сьöлöм шогтö, став дойтö колö дзебны, ас пытшкад кутны, --шуö Ольга Ивановна. --Помнита, мамöй мукöддырйи гортын öдва ветлöдлö, нёрпалö да. А урок вылын висьöмсö оз петкöдлы. Ме сэсся гусьöникöн матыстча да юала сылысь: "Мам, тэ бурдiн нин?" А мыйöн гортö локтас, брут водас крöватьö, сьöкыд да.
Ольга Ивановнаöс мамыс пединститутын велöдчöмысь абу кутöма. Сöмын пö филологö эн мун, тетрадь прöверитöмыд уна кад сёйö да. Но Ольга век жö мам кок туйöдыс восьлалöма, бöрйöма коми кыв да литература. Чужан кыв дорö муслунсö буретш мамыс, Агния Васильевна, и чужтöма. Сiйö ачыс уна во Ыджыдвидзса школаын нуöдiс коми кыв да литература кузя урокъяс.
Медводдза урок
Быттьö тöрыт на ставыс вöлi. Ыджыдвиддзысь петлöм ныв Ольга Ивашовалы (нывдырся овыс) сетiсны Коми пединститут помалöм йылысь диплом. Радлуныс морöсас оз тöр. Ачыс том да мича. А водзын став олöмыс...
Том специалистыдлы дзик пыр и класс сетöмаöсь. Кызь кöкъямыс велöдчысь пö вöлi. Пырöма на ордö тöдмасьны да шуöма: "Ме тiян класснöй мам". Челядьыд семдöмаöсь серамысла. Ас кодьныс жö том ныв висьтасьö мамöн. Öдва и лöньöмаöсь...
--Öнöдз на тайöс казьтылам. Тшöтш и, кыдзи верöсöй школаö волывлiс. Ме урок нуöда, а сiйö öдзöссö костöдöмöн кыйöдö, кор помасяс. Нöшта на чуксалö вöлi менö букварикöн. Урокыд пö оз на эшты? Сiйö менö тадзи шулывлiс, ёна лыддьыся вöлi да, --сералö Ольга Ивановна.
Челядькöд бипур дорын
Водзынсö велöдчысьясыскöд тшöкыда походö ветлывлöмаöсь. Тöв кöть гожöм, пыр кытчöкö да мунöны.
--Öтчыд гожöмнас мунiм шойччыны. Бипур дорын пукалiм, пусим, сёйим. Сэсся шондi лэччöм бöрад сэтшöма номйöссис. Некытчö воштысьны. А öти палатка и босьтлiм. Сэтчö пöшти комын морт пырисны. Оз тöрны, ышмöны. Сэсся палаткаыс косяссис. Скöрми весиг. Вай, мися, мунам нин гортö. Первойсö эськö эз кöсйыны, олыштам на пö. Но мыйöн аддзисны öта-мöд вывсьыс самасьöм номъяссö, водз вылын и лэччисны.
А мöдысь вышка дорö кайлiм. Видзöда да, Выльыбысь Вася Мишарин йылас кайöма. А вышкаыс ставнас нин вöрö, важысла сiсьмышталöма да. Вай мися, Криста ради, лэччы! Кермысьны ковмис. Полан öд. А усьö кö, чорыда доймалас, --казьтылiс велöдысь челядькöд öтвылысь шойччöмсö.
Ольга Ивановналöн керкаыс дзик школа дорас. Весиг öшиньясыс сылань видзöдöны. И унаысь велöдчысьяс тшай юны сы дорö волывлöны. Быдöнлы сiйö рад.
Вöт да вемöс
Ольга Ивановна ичöтсяньыс ассьыс олöмсö школакöд йитöма. Тшöкыда весиг вöтасьö сэнi уджалöмсö. Но мыйлакö пö вöтас пыр абу ставыс лючки. То быттьö вунöдöма книга-тетрадьсö сьöрсьыс босьтны, то идрасян паськöмöн локтöма, то юрсиыс шыльöдтöм, а урок вылö нин звöнок, лöсьöдчыны кадыс абу.
--И мыйлакö важ школасö вöтала. Выльсö ог аддзы. Гашкö, пенсия вылö пета да выляс вуджа, --шмонитö велöдысь.
Челядь радейтöны тайö авъя аньсö, окотапырысь кывзöны сылысь урокъяссö. Ольга Ивановналöн урок вылын челядь оз сöмын тöдмасьны кывйöн да литератураöн, но и велöдчöны радейтны чужан мунысö, пыдди пуктыны вужвойтырлысь оласногсö. Коми гижысьяслöн кывбуръяс да висьтъяс пыр велöдысь чужтö челядьлöн сьöлöмын и вöр-ва дорö муслун. Унаöн на пиысь школа помалöм бöрас лоины Ольга Ивановна моз жö коми кыв да литература велöдысьясöн.
И аслас Галина нылыс сiдзжö помалiс Сыктывкарса государственнöй университетын финн-йöгра факультет. СГУ-ын велöдчигас на учёнöй-филолог Паула Кокконен юрнуöдöм улын босьтчис пырöдчыны финн кывйö. Öнi олö-уджалö Финляндияын, гижö фольклорысь наукаясса докторлысь удж.
Радейтчöм
Пединститут помалöм бöрын Ольга Ивановналöн вöлöма позянлун водзö велöдчыны СССР-са Наукаяс академиялöн Коми филиалса аспирантураын. Но том филолог сэтчö абу пырöма.
--Менам жöник вöлi. Моряк!-- водзö висьталö сiйö. --Ас водзас сiйö сувтöдiс ыджыд мог -- кыпöдны сиктын видз-му овмöс. Со и овмöдчим асланым Ыджыдвиддзö. Да и аслым водзö наукаын зунясьöм дорысь окотаджык вöлi челядькöд уджавны.
Верöсыскöд тшöтшъяяс вöлöмаöсь. Вочча классъясын велöдчылöмаöсь, а Шойнатыын 9-10 классö öтлаын нин помалöмаöсь. Ныв первойсö том зонсьыд ёна пышъялöма. Öтар туй бокöдыс кö пö воча локтö, мöдарас вуджа. Туй кузя кö восьлалö, москиöдыс муна. Но век жö налöн туйныс öтласьöма.
--Ме сэсся сiйöс армияö колльöдi. Толя куим во Балтия флотын служитiс. Öта-мöдлы быд лун письмö гижим. Важ платтьöö гартовтi да быттьö ноп тыр лои. Армиясьыс воöм бöрас миянö и пырис. Гортас абу на ветлöма. Öнöдз син водзын. Пырö Толя, бушлата, бескозыркаа. Сэсся регыд и öтласим. Куим челядь чужтiм-быдтiм. Ставныс помалiсны СГУ. Жаль, верöсöй водз кувсис. Квайт во нин ме дöва, --ышловзис ань.
Музей
Велöдöм кындзи Ольга Ивановна юрнуöдö школаса музейöн. Таво музейыслы 35 во жö тырö. Заводитöма важся эмбурсö чукöртны мамыс Агния Васильевна.
Уна вонад мыйыс нин абу чукöрмöма. Важ дозмук, кöлуй, Ен öбразъяс. Мыйсюрö рöдвуж пасаöсь. Став тайö эмбурнас öнi на позьö вöдитчыны. Миянлы Ольга Ивановна патефон заводитлiс, Сталинлысь радейтана "Сулико" сьыланкывсö кывзiм.
--Мукöд гижöдсö лыддигöн музейса экспонатъяс ёна отсалöны, --шуö велöдысь. --Шуам, öнiя челядь оз тöдны, мый сiйö лучкöвöй пилаыс. Иван Тороповлöн гижöдъясöн тöдмасигöн, кöнi геройясыс лучкöвöй пилаöн вöдитчöны, лэччылiм музейö. Сэнi петкöдлi ме челядьлы тайö важся инструментсö. Ныв-зон абу жö на ставöн аддзылöмаöсь и зу -- вöв бурисьысь вöчöм сынасянтор. Бара жö петкöдла. Казьтыла, кыдзи ыджыд мамöй пывсян бöрын вöлi пуксяс паччöрö каян сод вылö да сынасьö.
Эмöсь музейын и война вылö ветлысьяс йылысь казьтылöмъяс, налöн снимокъяс, наградаяс. Öшалö Чечняын пöгибнитöм татчöс кык зонмöс казьтылан пöв. Вöчöма Ольга Ивановна и Ыджыдвиддзысь петлöм нималана йöзлы пельöс. Челядькöд öтвылысь вочасöн выльмöдöны, мичмöдöны музейсö. Сиктын важ эмбурыс унатор на сюрлывлö. Кöнi пö керка косялöны, сэтчö и ветлывлам.