Усинск районса Усвавомын медводдзаысь на котыртлісны-нуӧдісны "Битва хоров" концерт-конкурс, кодӧс сиисны Айму вӧсна Ыджыд тышын Вермӧмлы.
"Шылада косьын" вермасисны сиктса вит хор: детсадйын зільысьяслӧн "Синяя птица", больничаын уджалысьяслӧн "Красный крест", школаын велӧдысьяслӧн "Лира", уджвывса ветеранъяслӧн "Нам года – не беда" да орчча Нӧвикбӧж грездысь школа-садйын зільысьяслӧн "Северная жемчужина".
Быд котырлы коліс сьывны война кадся да чужан му йылысь сьыланкыв, а сідзжӧ дасьтыны на дорӧ сценавывса петкӧдчӧм.
Конкурсӧ пырӧдчысьяс зілисны петкӧдчыны медся бур боксянь да шензьӧдісны эз сӧмын мыла гӧлӧснас, но и мича костюм-паськӧмнас.
Нимкодьӧдісны артистъяс "Журавли", "Вальс фронтовой медсестры", "Мой дом – Россия", "Снегири", "Дорога на Берлин" да уна мукӧд сьыланкывйӧн. Ворсісны гитараӧн да баянӧн.
Сцена вывсянь на вылӧ видзӧдігӧн йирмӧг босьтліс, ӧд тыдаліс, мыйта вын-эбӧс пуктӧмаӧсь петкӧдчысьяс, сьӧлӧмсяньыс дасьтысьӧмаӧсь! Репетируйтӧм вылӧ уна кад вичмӧдӧмыс да вермыны окотитӧмыс эз весьшӧрӧ коль – быд петкӧдчӧм вӧлі сьӧлӧмӧ йиджана, аслыспӧлӧс да яръюгыд.
Видзӧдысьяслы ёна и кажитчисны сьыланкывъясыд – артистъясӧс аттьӧалісны гораа клопайтӧмӧн да "Браво!" горзӧмӧн.
А сэсся воис кад жюрилы, кытчӧ пырисны Усвавомса администрацияӧн веськӧдлысь Тамара Полётова, Усинск районса ветеранъяслӧн котырӧн юрнуӧдысь Надежда Шитова, Афганистанса, Чечняса да мукӧдлаын йӧзӧдлытӧм войнаса ветеранъяслӧн Усинск карса котырӧн веськӧдлысь Сергей Новосёлов, Усинск карса искусствояс школаын велӧдысь Надежда Ловгиненко да Усвавомса участкӧвӧй уполномоченнӧй Павел Варанкин, бӧрйыны вермысьясӧс.
Колӧ пасйыны, донъялысьяслы ёна воӧма сьӧлӧм вылас татшӧм выль сикас кон-курсыс, да вӧзйӧмаӧсь и водзӧ сійӧс нуӧдны-котыртлыны.
И сідз, "Самое душевное исполнение" нимпасын вермис детсадйын зільысьяслӧн "Синяя птица" хор. "Самый артистичный хор" номинацияын медбурӧн шуисны больничаын уджалысьяслысь "Красный крест" котырӧс. Нӧвикбӧжса школа-садйысь сьылысьяслы сетісны "Самый мелодичный хор" ним. "Суперхорӧн" лоис велӧдысьяслӧн "Лира". А "Шылада косьын" вермысьӧн лои уджвывса ветеранъяслӧн "Нам года – не беда" котыр. Найӧ збыльысь вӧліны медбуръясӧн!
Яръюгыд, сьӧлӧм вӧрзьӧдана конкурс-гаж артмис! А медтӧдчана сійӧ, мый бур сьыланкывъяс бара на чукӧртлісны-ӧтувтлісны уна йӧзӧс, война кадся шылад йиджис видзӧдысьяслӧн сьӧлӧмӧ шаньлунӧн да мелілунӧн.
Людмила КАНЕВА
Усвавом сикт, Усинск р.
