Уна нин сёрнитöма-гижöма му да керка-овмöс асэмбуралöм кузя. Неважöн "Коми му" газет йöзöдліс Кöрткерöс районса олысьяслöн БТИ-ын "кабала дзугйö" веськалöм йылысь гижöд. БТИ-ö шыöдчысьыс уна, быдöнлы, дерт, абу ставыс гöгöрвоана.
Кольöм вежонö Коми Республикаса Юралысьлöн Общественнöй приёмнöйын котыртлісны та кузя "веськыд йитöд". Звöнитчысьяслöн юалöмъяс вылö вочавидзисны "Ростехинвентаризация – Федеральное БТИ"-лöн республикаса юкöнöн веськöдлысь Антон Ткаченко да Сыктывкарса юкöнöн веськöдлысь Руслан Артамонов.
Кодлöн кутшöм мог
Медводдзаяс лыдын "веськыд йитöда" телефон пыр звöнитчис Валентина Ивановна:
–Дас во сайын нин патераöс асавлі, колö-ö вöчны кадастрöвöй паспорт, кута кö сійöс вузавны, – юасис ань.
"Ростехинвентаризация – Федеральное БТИ"-лöн Сыктывкарса юкöнöн веськöдлысь Руслан Артамонов вöзйис, мый быть колö. Гашкö пö, мыйкö асьныд сэні вежлавлінныд. Вöчны колö и техническöй паспорт. Медым юрыд нинöмысь эз вись, бурджык став колана кабаласö водзвыв дасьтыны, кыдзи патерасö вузалысьлы, сідз и ньöбысьлы.
Эжваысь Елена телепон пыр висьталіс, мый кызь вит во са-йын батьыс некымын мужичöйкöд кыпöдлöма гараж комплекс. Быдöн вöдитчöма аслас гаражöн. Вöлöма весиг комплекснас веськöдлысь. Но олöмыс мунö водзö, оланпасыд вежласьö, да öні быть колö асавны гаражсö. Кор та могысь кутöмаöсь чу-кöртны документъяс, тыдовт- чöма, мый гаражнас батьыс оз вермы вöдитчыны. Кык во сайын шыöдчылöмаöсь ёрдö, коді шуöма сетны тайö эмбурсö. Но кыдз висьталö Елена, öнöдз оз вермыны сувтöдны батьыслысь гаражсö кадастрöвöй учёт вылö. Колö пö мукöдсö корсьны, кодъяс ба-тьыскöд öтув кыпöдлöмаöсь комплекссö. Но кöні найö олöны, ань оз тöд, а Эжваса администрацияын пыксьöны висьтавны.
Аньöс кывзöм бöрын БТИ-ын зільысьяс весиг шай-паймунісны. Руслан Геннадьевичлöн кывъяс серти, Елена збыльысь веськалöма "дзугйö". Сылы аслыс ковмас дзоньнас комплекс вылас документъяссö лöсьöдны либö жö корсьны та могысь мукöдсö, кодъяскöд батьыс кыпöдлöма гаражсö.
Кулöмдін районса Помöсдінысь Валентина Николаевна юасис:
–Öні быдöнлы колö асавны сиктса керка-овмöс. Ми асьным кутам мынтысьны уджсьыс либö сиктса администрация став рöскодсö босьтас ас вылас?
–Керкаыд кö асланыд, дерт, ковмас аслыныд вештысьны. А оланіныс кö муниципалитетлöн, сідзкö, сиктса администрация мынтысяс, – вочавидзис Руслан Геннадьевич.
Пöгибö воöм йöз тшöтш и асьныс волісны республикаса Юралысьлöн Общественнöй приёмнöйö. Сідз, Емдін районса Айкатылаысь Ильдар Сагитович Галин оз вермы дасьтыны ас овмöс вылас став колана документсö, кöть и керкаас олö нин во. Пыр пö мыйын кö да сорсьöны БТИ-са специалистъяс.
–Мыйла тадзи артмö? – шензьö Ильдар Сагитович.
Öні мужичöй бара сетöма документъяссö Айкатыласа БТИ-ö. Мед ставыс нин артмис лючки, кöсйысис отсавны ачыс "Ростехинвентаризация – Федеральное БТИ"-лöн республикаса юкöнöн веськöдлысь Антон Ткаченко.
Сыктывкарысь Раиса Ивановна Кудрявцевалöн оланін вылас кадастрöвöй паспортыс 2009 вося. Пенсионерка юаліс Руслан Ген- надьевичлысь, шогмö оз нин тайö документыс али выльöс колö босьтны.
Сыктывкарса юкöнöн веськöдлысь эскöдіс, мый шогмö, да став документнас ыстіс Раиса Ивановнаöс росреестрö (важ ног кö, юстицияö), мед босьтны патера вылас свидетельство да вöлисти нин гижны завещанньöсö.
Нöшта тайö бабыслöн эм Дыр-нöсын дача. Мусö сылы сетлöмаöсь нэм кежлас вöдитчыны. Та кузя кабалаысь кындзи пенсионеркалöн некутшöм документ абу. Раиса Ивановна юасьö, нывлы кö пö кута дачасö гижны либö, гашкö, вузавны, колö оз кадастрöвöй палатаö шыöдчывны да вöчны сідз шусяна межевание.
–Дерт, колö, – вочавидзис Руслан Артамонов. – Важ техпаспортсö тшöтш колö выльмöдны.
Öд дыр каднад унатор вермис вежсьыны йöрас. Шуам, воддза инвентаризацияöдз пывсяныд сулаліс öтар забор бокас, а бöрас, гашкö, мöдлаö кыпöдісны да с. в.
Максаковкаысь Иван Фёдорович комын во сайын кыпöдлöма гараж, нюжöдöма сэтчö би. Но неважöн сылы шуöмаöсь администрацияын, мед мöдлаö вуджöдас стрöйбасö.
Мужичöй пыксьö, мыйта пö мырси да öні ковмас вештыны? Нöшта шуöмаöсь, мый сэні, кöні сулалö Иван Фёдоровичлöн гаражыс, регыд нюжöдасны ва да шоныд сетан трубаяс.
БТИ-ын зільысьяс видзöдлісны Иван Фёдоровичлысь кабаласö да, тыдовтчис: гаражыс кöртысь, а абу сідз шусяна капитальнöй стрöйба, сідзкö, позьö вештыны. Да и гараж улас мусö мужичöйлы сетлöмаöсь недыр кад кежлö.
–Ёрдö сета, – оз сетчы сійö.
–Видлöй, но öдвакö сэні тіянöс доръясны, – вочавидзис Руслан Артамонов да вöзйис. – Корöй администрацияыдлысь мöдлаысь му.
Иван Фёдорович öтарö пыксис. Весиг висьталіс, мый администра- цияын сылы вöзйылöмаöсь нин мöдлаö сувтöдны гаражсö, но абу кöсйысьöма, уна вося уджыс пö весьшöрö лоö да.
Вермасны мырддьыны
Нöшта йöзлы тöд вылö "Ростех-инвентаризация – Федеральное БТИ"-лöн республикаса юкöнöн веськöдлысь Антон Ткаченко висьталіс, 2016 восянь пö выльног кутасны перйыны вот. Муниципалитетлöн бюджетö вотыс кутас воны сэні пасйöм дзик быд овмöсысь.
Öні жö республикаын 45 гöгöр прöчент керка-овмöсыс "кöзяинтöм". Он кö найöс гижöд ас вылад да он мынты вот, сідзкö, муниципалитет вермас босьтны тэнсьыд керка-картатö. Дерт, öні меставывса чинаяс йöзыдкöд ёрдын "оз на люкасьны". Кöть эськö и збыльысь вермасны мырддьыны татшöм стрöйбаяссö. Абу гижöмыд ас вылад, сідзкö, абу тэнад.
Таысь кындзи, гижöдтöм керкаын олысьлы оз кутны сетны пес, дзоньтасьöм вылö вöр. Кулöм- дін районын пö öнісянь нин тадзи вöчöны.
2014 вося январь 1 лунсянь Россияса правительство дугдас отсавны регионъяслы, оз кут вичмöдны сідз шусяна дотация, а найö оз кутны сетны сьöма отсöгсö муниципалитетъяслы. И медым ас керкасьыд мойдын кöчöс моз эз вöтлыны, колö гижöдны сійöс ас вылад.
–Кадыс абу нин уна, – тэрмöдлö Антон Владимирович. – Овлö, йöзыс нюжмасясны, а сэсся ставöн уськöдчасны кабалаяссö чукöртны. БТИ-са специалистъяс оз кутны слöймыны лючки да регыдъя кадöн дасьтыны колана документъяссö.
"Ростехинвентаризация – Федеральное БТИ"-лöн республикаса юкöнöн веськöдлысьлöн кывъяс серти, быд муниципалитетын, Кöртке-рöсысь кындзи, эм налöн содтöд юкöн. Но регыд воссяс и Кöрткерöс районын.
Эн ылав!
Тавося октябрь 1 лунсянь кутас уджавны 250 номера федеральнöй закон, коді выльмöдö "О регистрации государственной кадастровой недвижимости" 221 номера оланпассö.
Öти-кö, сійö кокньöдас кадаст-рöвöй учёт вылö керка-овмöс сувтöдöм. Медым босьтны техническöй план, оз ковмы дасьтыны техпаспорт. Но, öтар боксянь, мортыд видзтас сьöмсö. Да и техническöй плансö БТИ-са специалистъяс вермасны дасьтыны тіян висьталöм серти. Шуам, юöртінныд, мый патерааныд олан юкöныс 50 квадрата метр, а збыльвылас 60. БТИ-ын эскасны да висьталöм сертиныд и гижасны. Но бöрынджык ті, шуам, кутанныд оланіннытö вузавны либö рöдвуж вылад гижöдны, кредит босьтігöн заклад пыдди вöзъянныд, и сэки тіянлысь кутасны корны збыльысь 50 квадрата метр ыдждаöс. И тіянлы бара ковмас техпаспорттö вöчны. А сідзкö, выль пöв котравны. Тадзинад ноксьöмыс содас кык пöв.
Либö кор ньöбанныд выль патера, сёрнитчанныд стрöитчан котыркöд. Договор серти тіянлы вузаласны 100 квадрата метра патера. Но сэні сöмын стенъясыс, нинöм на абу юклöма. Шуам, кöсъянныд мыйкö вежыштны либö бара жö заклад пыдди сетны. Локтанныд БТИ-ö техпаспортла. Специалистъяс туяласны, да тыдовтчас, мый тіян абу 100, а сöмын 80. Вöлöмкö, сёас арталöмаöсь и балконсö, и асмогасянгінсö. Артмö, ті донаджыкысь ньöбинныд.
Арталöй, уна-ö лишнöйсö мынтінныд. Шуам, Сыктывкарын квадратнöй метрыс 60 сюрс шайта да донаджык. Артмö, 10 квадрата метр пондаыс ті колана мындасьыс содтöд 600 сюрс шайт сетінныд. А патера ньöбтöдзыс кö вöчöдінныд техпаспортсö, воштöмыс эз эськö ло.
* * *
Дерт, керка-овмöс вылö кабала дасьтігöн ёна колö котравны. Но позьö и кокньöдчыны. Кыдзи висьталіс Антон Ткаченко, позьö корлыны налöн котырысь специалистъясöс республикаса быд сикт-грездö. Сöмын та могысь колö шыöдчывны сиктса администрацияö. Сэтчöс веськöдлысь чукöртас морт дас-кызьöс, и БТИ-саяс воласны. Ставсö мерайтасны, гижасны, а сэсся урчитöм кад кежлö корласны БТИ-ö документъясла. Сэсянь нин сэсся ковмас ветлыны кадастрöвöй палатаö, а сы бöрын – росреестрö.
Тадзи тшöтш уджавнысö БТИ-салы вöзйöмаöсь Комиын Госсöветöн веськöдлысь Игорь Ковзель да "Единая Россия" партиялöн регионса юкöнöн юрнуöдысь Сергей Артеев.
–Öткымын муниципалитетö ми ветлывлам нин. Шыöдчöй, волам, – кöсйысис Антон Владимирович.