Уна нин гижöма да сёрнитöма диспансеризация йылысь. Но оз на ставныс тöдны, мыйла да кодлы сійö колö, кор да кытчö шыöдчыны. Сентябрь 10 лунö Коми Республикаса Юралысьлöн Общественнöй приёмнöйын котыртлісны та кузя "веськыд йитöд", да телефоныс эз и лöньлы.

Звöнитчысьяслöн юалöмъяс вылö вочавидзисны дзоньвидзалун видзан министерствоысь специалистъяс Ирина Кондратьева да Татьяна Лыюрова, а сідзжö Сыктывкарса 3 номера поликлиникаöн веськöдлысь Надежда Боянкова.

Сыктывдін районысь Анна Дмитриевналöн внукыс мунö детсадйö. Поликлиникаысь справкатöг кагасö оз босьтны.

—Ми локтім поликлиникаö справкала, а миянлы мырдöн тшöктісны прöйдитны диспансеризация. Мый эськö да, колана петкöдчывны врачьясыдлы, но кык часöн найö удитісны видзöдлыны матö 80 челядьöс. Здук кежлö и пыралім быд специалист дорö. Тöлкыс татшöм диспансеризациясьыс, да кодлы сійö колö? — норасис ань.

—Поликлиникаын врачлы сетсьö унджык кад висьысьöс видлалöм вылö. А диспансеризация дырйи — кык пöв этшаджык, и сійö тырмы-мöн, медым тöдмавны, колö-ö мортлы отсöгыс. Но тіянлысь шыöд-чöмтö босьтам тöд вылö да туялам, збыльысь-ö врачьяс веськодьпырысь вöчöны ассьыныс уджсö, — вочавидзис Ирина Кондратьева.

Анна Дмитриевна висьталіс, мый Паджгаса амбулаторияöдз налы колö 4 километр мунны подöн. Автобус оз ветлöдлы. Гашкö, диспансеризация лунö ыліджыксьыс йöзсö ваясны-нуасны торъя машинаöн?

Но Ирина Александровналöн кывъяс серти, тайö — муниципалитетöн веськöдлысьяслöн мог. А быд грездö врачöс ыстыны оз тырмы специалистыс, да и позянлуныс абу.

—Ньöти абу окота мунны поликлиникаö да сулавны висьысьяскöд öти öчередын. На пöвстын ачыд висьман. Оз-ö позь диспансеризациясö нуöдны торъя лунö да кадö, а гашкö, и вичмöдны торъя врачöс? — юаліс Сыктывдін районысь жö Надежда Алексеевна.

—Буретш та йылысь ми сёрнитім воддза лунö минздравын. Кутам зільны поликлиникаяскöд öтвылысь, та могысь уджöдны врачьясöс и субöтаö. Сёрнитчам гырысь предприятиеяскöд да мöдöдам врачьясöс сэтчö либö вичмöдам поликлиникаын торъя лун, — эскöдіс Ирина Кондратьева.

Сыктывкарса 3 номера поликлиникаöн веськöдлысь Надежда Боянкова содтіс, мый уджалысьяслöн лоö позянлун öтувтны диспансеризациясö профосмотркöд либö медосмотркöд. Сувтас донтöмджык.

Сійö жö вочавидзис Сыктывкарса олысьлöн юалöм вылö. Маргарита оз окотит мунны аслас поликлиникаö да юасьö, эм-ö сылöн позянлуныс прöйдитны диспансеризациясö мöдлаын.

Сылы висьталісны, позьö пö.

—Кывлі, оз ставныслы диспансеризацияыс ков. Юклöмаöсь кыдзкö арлыд серти. Меным 61 арöс, — звöнитчис Сыктывкарысь мужичöй.

—Диспансеризациясö урчитöма прöйдитны мортыслы 21 арöссянь куим вонас öтчыд. Таво поликлиникаясын виччысьöны найöс, кодъяслы 21, 24, 27, 30, 33 арöс да сідз водзö (21 арöссянь арлыд дорö куим во содтöмöн). Тіянлы кык во мысти сійö лоас. Но врач дорö верманныд шыöдчыны кöть кор, — вочавидзисны специалистъяс.

—А ог кö удит таво прöйдитны диспансеризациясö, татшöм позянлуныс лоö оз менам локтан воö? — юаліс мöд сыктывкарса.

—Сöмын куим во мысти, — вочавидзисны сылы.

Ирина Кондратьева пасйис, мый арлыд вылö видзöдтöг диспансеризация вылö вермасны шыöдчыны войнаса ветеранъяс.

Сосногорск районысь Мария Валерьевна юаліс, кутшöм специа- листъяс нуöдöны диспансеризациясö да эм-ö на лыдын онколог, а сідзжö лоас-ö позянлун вöчны томография.

—Öні унджык поликлиникаас эм онколог, и сы дорö веськавны некутшöм мытшöд абу. Эм позянлун петкöдчывны диагностика шöринса врачьяслы. А позьö шыöдчыны и сэтчö, кöні сійö эм, кöть и миян бурдöдчанінö, — вочавидзис Надежда Боянкова. — А диспансеризация дырйи медводз колö шыöдчыны терапевт дорö, сдайтны анализ, вöчны ЭКГ, флюорография. Сэсся сійö нин ыстас мукöд специалист дорö, тшöтш и гижöдасны томография вöчны да мукöд ногöн дзоньвидзалунтö туявны, эм кö таын коланлуныс. Быд мортлы сетасны ки вылас сідз шусяна "паспорт здоровья". Сэні лоö ставсö гижöма, тшöтш и дзоньви-дзалун видзöм кузя врачьяслöн тшöктöмыс.

Юркарысь Ольга Игоревна висьталіс, мый школа-детсадйын врачь-яс видлалöны челядьöс быд во, но бать-мамöс некор оз тöдмöдны кывкöртöднас. Весиг пö мукöддырйи огö и тöдлöй медосмотр йывсьыс.

—Тадзи, дерт жö, вöчны оз позь. Медосмотр йылысь колö быть юöрт-ны водзвыв бать-мамлы. Найö вермасны öткажитчыны да асьныс нуöд-ны ныв-писö поликлиникаö, медым на дырйи врачыс видзöдлас кагасö. Ми тайö лоöмторсö туялам, — кöсйысис Татьяна Лыюрова. — Тöдчöда, мый торъя диспансеризация лоö котыртöма и челядьлы, кодъяс быдмöны опека улын да приёмнöй семьяясын. Найöс видлалас унджык специалист. Но эмöсь и сэтшöм зонпосни, кодъясöс гижисны асланыс ныв-пиöн. Буретш налöн бать-мамыс асьныс бöрйöны, колö налöн быдтаслы паськыдджык диспансеризацияыс либö мукöд челядьыскöд петкöдчывны сöмын пе- диатрлы, медым оз кывсьы, мый кагасö босьтöмаöсь детдомысь.

* * *

Минздравын артыштöмаöсь да, диспансеризация улö таво веськалö Комиысь матö 170 сюрс морт. 33 сюрсыс прöйдитöма нин сійöс. Пöшти 60 прöчентыслысь казялöма висьöм. Унджыкыс нёрпалöны вир да сöн, кынöм да эндокриннöй висьöмöн. Татшöмъяссö ставнысö мöдöдöмаöсь мукöд специалист дорö.