Комиысь вужвойтырлöн шылада-драмаа театр неважöн воис Болгарияысь, кöні муніс комедияяслöн ставмирса кöкъямысöд фестиваль. И Габровоын, коді нималö анекдотъясöн, коми шмоньтö донъялісны вылö. Миян артистъяс лоисны сэні вермысьясöн. Эм эськö жюри, кытчö пырöны уна странаысь драматургъяс да критикъяс, но бöръя кывйыс — видзöдысь сайын.

Миян театр петкöдліс Алексей Поповлысь "Гöтрась, пиö, гöтрась" спектакль. Эз весьшöрö бöрйыны тайö спектакльсö. Сійö и миян видзöдысьяслы воö сьöлöм вылас. Кодсюрö мöдысь дай коймöдысь волöны видзöдны артистъяслысь ворсöмсö да сьылöмсö.

Дерт, ковмис пьесасö вуджöдны болгара кыв вылö. Отсаліс Болгарияын олысь коми морт Николай Сивков. Артистъяс сцена вылын шмонитісны комиöн, а видзöдысь наушник отсöгöн кывзіс вуджöдчысьöс. Театрын литература юкöнöн веськöдлысь Евгения Удаловалы ковмис велöдны болгара кывъяслысь шуанногсö.

Николай Сивков вуджöдіс и "Кимöститчысьясöс". Габровоса театрын ворсысьяс петкöдлісны сійöс чужан кыв вылас. А сэсся Комиысь да Болгарияысь артистъяс öтувтчисны да режиссёр Светлана Горчаковакöд öти лунöн дасьтöм коми-болгар шмоньсö петкöд-лісны видзöдысьлы. Китай Ваньöс ворсісны Сергей Туркин да Илия Костадинов, Кирö Öньööс — Александр Ветошкин да Николай Бързаков, кык Коляöс — Андрей Засухин да Петко Петков. А болгара кыв вылын сёрнитысь Сандра некыдз эз гöгöрво, мыйла сылöн Иваныс мöд кыв вылын варовитö. Бур-пöт сералісны видзöдысьяс...

А сэсся Комиысь артистъяс петкöдчисны шмоньлы сиöм быд вося карнавалын. Колö пасйыны, мый фестиваль вылö ветліс Россияысь дзик öти — миян котыр. Сьöмсö вичмöдіс Коми Республикаса культура министерство "Россия — Болгария: вояс пыр ёртасьöм" уджтас весьтö. Коми да Болгария костын тайö ёртасьöмыс гöрддзасис зэв нин важöн. Кольöм нэм помын болгара олісны-уджалісны Удора районын, кöні кыпöдісны быдса посёлокъяс. Гöтрасисны коми нывъяс вылö, та понда Болгарияын комиыс абу этша. А видзöдысьяс ошйысисны, ми пö овлім Комиад...