Россияын быд во му-ваö визувтö 5 (!) миллион тонна мусир
Усинскын 1994 вося неминуча йылысь öнöдз на казьтылöны. Письтöм трубаысь ортсö визувтö- ма 100 сюрс тоннаысь унджык мусир. Экологъяс артыштöмаöсь, мый сэки "Коминефть" вöчöма вöр-ваыслы лёксö 26 мил- лиард шайт дон. Торйöн нин тайö мöрччöма матігöгöрса сикт-грездын олысьяслы. Ю-шорö, весиг скöт йирсянінö веськалöма нефтьыд. Уна мöс кувсьöма, и йöзыс ёнджыка ку-тöмаöсь висьны...
И талун оз-оз да бара на мусирыд ылькнитлö му-юö. А мый збыльвылас вöчсьö Комиын нефть перъянінъясын?
Шемöс босьтöма
Печораöс доръян комитетö пырысь Валентина Семяшкина тайöс бура тöдö. Сійö майшасьöмпырысь висьталіс:
–Кольöм вося августын Усинскын вöлі войтыркостса чукöртчылöм, кöні сёрниыс муніс Арктикаса шельфын мупытшкöсса озырлун перйöм йылысь.
Конференция вылас волöмаöсь Россияса Войвылын олысь вужвойтыр, весиг и Гренландияысь инуит*. Йöзыс ёна майшасьöны, мый мусир перйигöн да трубаті сійöс качайтігöн овлö уна неминуча. Тадзи няйтöссьö тундраын сывлытöм муыс, гырысь да ичöт юыс. А мый лоö, ускöттьöыс кö суас Арктикаса шлейфын биару да мусир перйигöн? Öнöдз на син водзын Мексика залив пасьталаын ва веркöсын гöвкъялысь сьöд визьыс... Буретш та вöсна Войвывса вужвойтыр кöсйöны öтувтчыны, медым асьнысö дорйыны.
Валентина Томасовна висьталіс, кыдзи гöсьтъяслы петкöдлöмаöсь мусир перйысьяслöн пакöститчöмсö. Сійö казьтыштіс:
–Кадыс эз вöв да, ылö эг мунöй, Усинсксянь Харъягаö мунан туй пöлöн и ветлöдлім. Серпасыс шемöсмöдана, шуш-тöм. Та бöрын петкöдлім космоссянь вöчöм снимокъяс, кодъясöс миянлы сетіс Россияса Гринпис котыр. Сöмын Усинск районын мусирыс киссьöма 220-лаын.
А вит миллионыс кöні?
Лыдпасъяс ясыда висьталöны, мый Россияын быд во овлö мусир перйöмкöд йитчöм 20 сюрс неминуча. Вöр-ва видзысьяс арталöмаöсь да, экономикалöн тайö юкöнас быд час мысти пö овлö кутшöмкö да ускöттьö.
–Збыльвылас жö мусирыс ва-муö веськалö ёна унджык. Труба письтöм йылысь мупытшкöсса озырлун перйысь компанияясыд некор да некодлы оз юöртлыны. Дерт, та йылысь кабалаясыс, гашкö и, эмöсь, но найö буссьöны кутшöмкö джаджйын, – тöдчöдö "Россияса Гринпислöн" энергетика уджтасöн веськöдлысь Владимир Чупров. – Миян видзöдлас серти, странаса мусир юкöнын став перйöм нефтьсьыс воштöмыс этша вылö 1 прöчент.
Россияын быд во перйöны матö 500 миллион тонна "сьöд зарни". И артмö, 5 миллионыс (!) асъя ру моз сылö-вошö... И оз кытчöкö, а няйтöсьтö чужан мунымöс, ю-тынымöс!
Вöр-ва видзан ставмирса фондысь координатор Алексей Книжников лыддьö, мый Россияын весиг оз артавны мусиркöд йитчöм неминучасö. Асьныс компанияяс зільöны дзебны авариясö либö тöдчымöн чинталöны ускöттьö-ыслысь ыдждасö. Сідз, юöртöны, мый мусир няйтöсьтöма 2-3 гектар, а збыльвылас – 10-öс. Мыйла тадзи вöчöны? Государстволы, буракö, веськодь, а, сідзкö и, некод оз мыжды ни кывкутöмö оз кыскы. Мирын жö серпасыс дзик мöд. Сідз, Мексикаса заливын ускöттьö бöрын "Бритиш Петролеум" компания веш-тöма 4,5 миллиард доллар штрап.
"Россияса Гринпис" котырын зільысь Владимир Чупров эскöдö, мый мусир трубасö, кодлысь потöм-пись-тöмсö кöть и казялöны, тшöкыда оз дзоньтавны. А мыйла? Сьöдасьöм-няйтöс-сьöм мусö вевттяс лым, тулысын ытваыс сійöс пожъялас-мыськас, а "сьöд зарнилöн" кутшöмкö юкöн йи-джас сылöм муö. И тадзи пö став Россия пасьталаын. Сідз, космоссянь вöчöм снимокъяс ясыда петкöдлöны, мый сöмын на кыпöдöм Вангорса нефть перъянінын гöгöр сьöд ты. Труба вежлалöм-выльмöдöм пыдди мусир компаниялы ёна кокниджык мынтыны штрап. "ЛУКОЙЛ" вонас нажöвитö 10 миллиард доллар. Сэк жö мынтö ылöсас 1 миллион доллар штрап. Дерт, сэсся быд 10 во мысти важ трубасö вежны оз и зільны. Штрапсö вештыны тöдчымöн кивывджык.
Кöть эськö збыльвылас урчитöма, кыдзи да мый колö вöчны, мусир кö визувтö му-ваö. Татшöм юöр бöрас Росприроднадзор медводз ставсö туялö. Ылькнитöм "сьöд зарни" йыв- сьыс кабаласö мöдöдöны мупытшкöсса озырлунöн вö-дитчöм кузя федеральнöй агентствоö, кöні котыртöны торъя комиссия. Сэтчöс специалистъяс сэсся индöны, кыдзи ускöттьöсö бырöдны, виччысьöны, кор мыжмöм предприятиеыс тайöс збыльмöдас... А кадыс мунö.
И пагалö звер-пöтка...
Öтуввезйын эм уна аслыс-пöлöс юöр. 2012 воын тыдовтчöма, мый "РН-Юганск-нефтегаз" торкалö вöр-ва видзан оланпас. Сідз, Мамонтовса мусир куйланінын "сьöд зарнинас" няйтöсьтöмаöсь 10 гектар. Пагалöма зэв уна утка-кулик. Да сöмын кö тайö! Мöйму арбитражса ёрдö нелямынысь шыöдчылöмаöсь, медым кыскыны тайö предприятиесö кывкутöмö. Öтувъя штрапыс öкмöма 540 миллион шайт. А вештöмаöсь-ö сьöмсö?..
Ямал-Ненечса вöр-ва видзан прокуратура туялöма, мый 2012 вося апрельсянь майöдз некымынысь письтлöмаöсь трубаяс, кыті визувтö Спорышевса, Умсейса да Сугмутса куйлöдъясысь пер-йöм мусир. Мыжаöсь вöлöм "Газпромнефть-Ноябрьскнефть" да "Муравленсковск-нефть" ВАК-яс, кодъяс пырöны "Газпромнефть" борд улö. Вöр-ваыслы лёксö вöчöмаöсь 11 миллион шайт дон. Ёрд индöма пакöсьт вöчысьяслы весавны му-васö.
Мыйла чöв олöны государстволöн вöр-ва видзан тэчасъяс? Öд öти вонас предприятиеыс 40-ысь (!) торкöма законсö... Гашкö, важöн нин колö вöлі татшöмсö "ньöръявны" да мырддьыны сылысь мупытшкöсса озырлун перъян лицензиясö? Сэк жö кыдзкö сьöкыд гöгöрвоны, мыйла öти компаниялы урчитöны мынтыны 540, а мöдлы, унаысь жö пакöсьтитчöмысь, – сöмын 11 миллион?
А кыдзи суйöр сайын?
Олöмыс петкöдлö, мый суйöр сайын дзик мöд ног вöдитчöны "сьöд зарнинас". Дерт, и сэні сулö ускöттьöыд. Сідз, США-ын 2010 воын мусир трубаыс потлöма 314-ысь, ортсö визувтöма 17, 6 сюрс тонна. 2011 воын Канадаын письтöм трубаысь ылькнитöма 7,7 сюрс тонна мусир. Бöръя воясö Норвегияын петöма ортсö 3 сюрс тонна нефть.
Специалистъяс эскöдöны, мый суйöр сайын законыд зэв чорыд, и мыжаыслы чин да рöдвуж вылö видзöдтöг быть ковмас кывкутны. Буретш та вöсна мир пасьталаын мусир компанияяс зільöны пыдди пуктыны оланпассö.
Жаль, но Россияын ставыс дзик мöд ног. Та вöсна и мусир тёпкö-петö потöм трубаысь...
Сьöмыс чунь костöд визувтö
"Россияса Гринпис" котырын уджалысьяс эскöдöны, мый öти кубометр мусир, веськалас кö ваö, няйтöсьтö 5 сюрс квадратнöй метр. Муö йиджöмыс уна жö лёксö вöчö. Сэні артмöны сэтшöм сорасъяс, кодъяс мортлöн вир-яйö веськалöм бöрын вочасöн "пестöны" уна висьöм, на лыдын и лёк пыкöс.
Му-ваö веськалöм мусирсö колö идравны-чукöртны öдйö да ас кадö. "Россияса Гринпис" котырын зільысь Владимир Чупров висьталö, мый уна предприятие сöмын мода вылас вöчö татшöм уджсö. Мусирсö чукöртöм да нуöм пыдди няйтöссьöминас вайöны лыа. А сэсся сэтчö кöдзöны турун. И комиссияö пырысьяс нимкодьпырысь кырымалöны кабала, став колана уджсö пö компанияыс вöчöма. А во мысти сэні турун ни дзоридз он аддзы – мусир сора муад некутшöм ловъя лов оз быдмы.
Мый вöчны?
Эскöй кöть эн, а Россияын мусиркöд йитчöм неминучасö донъялöны, вöлöм, оз öткодя. Ылькнитас кö пö 10 кубометр – тайö абу авария. Та мындасьыс весиг кывкутöмö оз кыскыны ни оз штрапуйтны. Унджык кö письтас, сэки нин сёрниыс лоö мöд.
Со и артмö, мый предприятие майшасьтöг вермас лэдзны му-ваö "урчитöм" 10 кубометр мусирсö. И пов-ны оз ков, та дырйи кö труба пöлöн лоö сюрс татшöм гöп. Буретш та понда быд во миян страна воштö 5 миллион тонна нефть.
Мый вöчны? Вöр-ва видзысьяс вöзйöны вежны талунъя законъяссö, кöть и на-йö лыддьысьöны мирас медся чорыдöн. Эмöсь нелючкияс, кодъясöн "бура вöдитчöны" мусир перъян компанияяс.
Жаль, но сідз шусяна олигархъясыд пыр водзö зільöны быд ногыс нажöвитчыны. Ыджыд сьöмыс, буракö, йöймöдöма. Чужан му да вöр-ва видзöм вöсна татшöмъясыд ньöти оз майшасьны.
*Инуит — Канадаын олысь эскимос.