Новости Республики Коми | Комиинформ

"Ме тані ола"

"Ме тані ола"
"Ме тані ола"
logo

Коми Республикалы 100 во тыригкежлӧ Коми Республикаса Национальнӧй библиотека тавося августсянь октябрь 10 лунӧдз нуӧдіс "Ме тані ола" видеороликъяса конкурс.

Кывкӧртӧдъяссӧ вӧчисны Иван Куратовлӧн литература музейын библиотекаясӧн веськӧдлысьяслӧн чукӧртчылігӧн.

Торъя нимпасъясын лои бӧрйӧма кӧкъямыс вермысьӧс.

Конкурс котыртысьяс — Коми Республикаса национальнӧй политика да культура, туризм да архив удж министерствояс.

Конкурсӧ пырӧдчысьяслы (челядьлы да том йӧзлы, семьяяслы) коліс дасьтыны чужанінлӧн история да ӧнія олӧм йылысь видео да пыртны сэтчӧ Игорь Жеребцовлӧн "Где ты живёшь?" небӧгысь асланыс сикт-кар йылысь пасйӧд-юӧр.

Ставнас конкурсӧ пырӧдчис 60 морт. 13 муниципалитетысь воис республикаса 15 кар-район йылысь 36 удж.

4_1.jpg

Медъёна зілисны Эжва йывсаяс да Сыктывкарын олысьяс. А видеосӧ медуна дасьтӧмаӧсь Изьва да Кулӧм-дін районъясса сикт-грезд йылысь. Сӧмын ӧти сиктлы, Кипиеволы, сиӧмаӧсь быдса куим ролик.

Конкурс нуӧдысьяслы зэв нимкодь, мый видео дасьтысьяс юксьӧны уджъясаныс уна шензьӧдана юӧрӧн, сёрнитӧны сиктын олӧма да нималана йӧзкӧд, юасьӧны сиктлӧн история йылысь музейын да библиотекаын уджалысьяслысь, традиция тӧдысь-видзысьяслысь.

Видеояссӧ донъявны жюрилы вӧлі зэв сьӧкыд, ӧд быд удж ӧттор-мӧдторйысь позис ошкыны-пасйыны.

Ӧтияс чукӧртӧмаӧсь зэв уна интереснӧй юӧр. Мӧдъяслӧн юӧрсӧ петкӧдланногыс нин шензьӧдӧ: бӧрйӧмаӧсь мичасьыс-мича серпасъяс, лӧсялана шылад, да и асьныс ныв-зон зэв шаня сёрнитӧны. А кодсюрӧ дасьтӧмаӧсь весиг серпаса да пластилина мойдъяс!..

Ӧткымын ныв-зонлысь уджъяссӧ мичмӧдӧны ас му йылысь сьӧлӧм вӧрзьӧдана кывбуръяс да чужанінлы сиӧм мелі кывъяс.

Со, шуам, Сыктыв муысь Алина Бахир вермис буретш "Медся патриотическӧй видеоролик" нимпасын. А конкурс уджсӧ дасьтӧм бӧрын сійӧ босьтчӧма нин лӧсьӧдны чужан посёлокыслӧн история серти быдса проект. И ышӧдӧма тшӧтш зільны-туясьны классьыс мукӧд велӧдчысьсӧ.

Пасъям, мый ачыс "Ме тані ола" конкурсыс вермис "Этноинициатива-2021" конкурсын.

* * *А со и водзмӧстчысьяслӧн ним-вич-ов:

Анастасия Аврамова, Степан Головко, Снежана Лятиева, Егор Шимко, Екатерина Шимко, Степан Мартынов, Кирилл Кожемякин — "Медся аслыспӧлӧс ӧтувъя творческӧй проект" нимпасын вермысьяс.

Анастасия Романовна Федяева — "Медся бур тэчаса удж" нимпасын вермысь.

Илья Игоревич Антонов — "Медся ышӧдана сюжет" нимпасын вермысь.

Алина Андреевна Бахир — "Медся патриотическӧй видеоролик" нимпасын вермысь.

Юлия Николаевна Королева — "Коми кывъя медбур удж" нимпасын вермысь.

Анастасия Николаевна Уляшева — "Сиктса медмича серпас" нимпасын вермысь.

Софья Микушева, Таисия Ширяева — "Медбур видеоэкскурсия" нимпасын вермысьяс.

Галина Александровна Янчук — "Медбур туялан уджтас" нимпасын вермысь.

Снимокъясыс Коми республикаса Национальнӧй библиотекаысь.