.jpg)
—Мукöддырйи мöвпала — дышöдіс, вежа уджöс, а сэсся думöй мöдарö бергöдчö. А кытöн кута уджавны, ог кö тані? Ачымöс мöдлаын ог и аддзы...
Тадзи пансис миян сёрниным Помöсдінса школаын коми кыв да литература велöдысь Татьяна Владимировна Уляшевакöд.
Ворснытö пыр верман
Школаын велöдчигöн Татьяна Владимировна мöвпалöма, мый верстяммас да олöмсö йитас музыкакöд. Öд коймöд классянь сійö велöдчöма ворсны баянöн. Помöсдінса школаын музыка урок нуöдысьыс котыртöма торъя класс. Велöдчыны окотитысьыс вöлöма уна. Сэсся вочасöн ныв-зон разöдчалöмаöсь. Дас кык мортысь Татьяна кольöма öтнасöн.
—Баянöн ворсны велöдчи вит во. Дерт, абу профессионал, но аслым ворсны кужа, — висьталö Татьяна Владимировна.
Школа помалöм бöрын сійö тöкöтьö абу пырöма велöдчыны музыкальнöй училищеö, но мамыс падмöдöма, бурджык пö педучилищеö мун. Сідзжö пö лоан музыка велöдысьöн либö садйын кутан уджавны. Нывлысь майшасьöмсö лöньöдöмаöсь Помöсдінса велöдысьяс, бурджык пö велöдчыны вузын, а музыкаыд коляс хоббиöн да и ворснытö, кор окотитан, пыр верман.
Ме тэнö виччыся
—Сэсся и пыри велöдчыны СГУ-ö, помалі финн-йöгра факультет, — водзö висьтасьö Татьяна Владимировна. — Фрида Эммануиловна (Помöсдінса школаын директор — авт.) öтарö корис: "Ме тэнö виччыся, лок".
И университет бöрын Татьяна локтöма чужан сиктас. Сійöс кыскöма бать-мам дорас. Да и карын пö овны эг эськö вермы. Сиктад майбыр!
—А эн полöй, мый чужанінад Таняöн вöлінныд да Таняöн и колянныд?..
—Та вöсна эг майшась, — вочавидзис велöдысь. — Воча чой-вок меысь ичöтджыкöсь да найöс велöдчигас на суи. Пыр и сёрнитчим накöд, мый школаын ме абу Таня, а Татьяна Владимировна. Артур воча вокöс аслам классын велöді. Дерт, гашкö, кодкö шуас, рöдвужтö пö лэптан, но татшöмыс некор эз вöв. Сэсся и Помöсдінса школаын велöдысьяс зэв бура вочаалісны. Неважöн на пö ми тэнö велöдім, а öні нин миян уджъёрт.
Медводдза воськовъяс
Том специалистыдлы дзик пыр и сетöмаöсь класс. Лов вылас вöлöма кыпыд, но тшöтш и полыштöма. Сентябрь 1 лунö класснöй час вылö локтöмаöсь 18 велöдчысьлöн батьыс да мамыс.
—Полышті, мый том морт вылад лачаыс озджык ло. Но классыс вöлі зэв бур, челядьыс сибыдöсь и бать-мамыс зэв водзмöстчысьöсь, — казьтыліс Татьяна Владимировна.
Университет помалöм бöрын медводдза велöдан воас том велöдысь нуöдöма Тима Веньлöн чужöмсянь 110 волы сиöм восьса урок. Волöмаöсь район пасьталаысь 25 велöдысь, мед донъявны Татьяна Владимировналысь уджалан ногсö.
Классас весиг абу ставöн тöрöмаöсь да калидорас пукалöмаöсь. Том специалистлöн морöсас сьöлöмыс чеччöма. Мый дасьтылöма урок кежлас, 20 минутöн водзджык эштöдöма. Мый и вöчны? Ковмöма Татьяна Владимировналы урок вылас нин думайтны. Асьсö абу янöдöма, ставыс сылöн артмöма. Районысь воöм велöдысьяс ошкöмаöсь том уджъёртнысö.
Тэ коді?
Велöдысьлöн уджыс сьöкыд, но овлöны и тешкодьторъяс. Во куим сайын Татьяна Владимировна бара босьтöма выль 5-öд класс.
Сентябрь тöлысь. Рытнас сёрöн мунöма лавкаö. Друг сэтысь аддзöма аслас классысь öти зонкаöс.
—А олöны найö ылын, — висьталö Татьяна Владимировна. — Ме юала сылысь: "Ваня, мый тэ тані вöчан татшöм сёрнас?"
—Лавкаö локті.
—А кодкöд?
—Пашакöд, — вочавидзис зонкаыд.
А сійö сыысь на дзоля арлыднас.
—Öтнад, бать-мамтöгыд? И лэ-дзисны? — водзö юася.
Сэсся чöв-лöнь, и друг сійö менсьым юалö: "А тэ коді?"
Вöлöмкö, сійö менö абу на босьтöма тöд вылас. Мися, кыдзи, ме жö тэнад класснöй руководительыд. Эн тöд?
—А-а-а, — нюжöдыштіс сійö.
Мед эськö оз мустöммы
Татьяна Владимировна сьöлöмсяньыс радейтö чужан кыв да чужтö сы дорö муслун быдтасъясыслысь. Медым урокъяссö вöчны аслыспöлöсöн, овлö и, баяннад ворслывлö сы вылын.
—Челядьсьыд он мудз, — шуö велöдысь. — Уджын падмöдö сійö, мый бöръя кадö колö ёна уна план гижны, документöн ноксьыны.
Майшасьö велöдысь и сыысь, мый коми кывлысь донсö лэптöмыс бöръя кадö артмö дзик мöдарö — йöзыслы сійö мустöммö, выль вуджöдöмнас тыр-тöны да.
Татьяна Владимировналöн висьталöм серти, терминъяс комиöдöмыс збыльысь гудыртö челядьлысь юрсö. Кор водзынсö терминъясыс öтмоза шусьöмаöсь, и комисьыс, и рочсьыс урокъяссö ныв-зон кокньыдджыка гöгöрволöмаöсь.
—Мед эськö комиыд оз мустöммы, — майшасьö Татьяна Владимировна. — Эска, миян Помöсдінын оз вуджны коми кывсö кыдз государственнöй кыв велöдöмö. А öд татшöмыс эм. Со Ручын, дзик коми сиктын, вуджöны. Тайö тешитчöм лоö, кутам кö велöдны "пань" да "кань".
Помöсдінса велöдысьлöн чайтöм серти, государство öні нуöдö сэтшöм политика, мый комиыс збыльысь мустöммö да лоö ковтöмöн. Тавосянь 9-11 классъяс помалысьяс оз кутны сдайтны коми кывйысь да литератураысь быть колана экзаменсö. Вылісянь кö дугöдöны, челядьыдлы öдйö дышöдö. Тшöтш и Помöсдінса коми челядь шуасьöны, мыйла пö, сідзкö, велöднысö. Ми пö сідз тöдам кывсö.
—Тайö абу коми кыв лэптöм, а бырöдöм, — шуö Татьяна Владимировна.