Татшöм ань
Майбыр, некытчö оз йöрмы
Некрасов на гижлöма, эмöсь пö аньяс, кодъяс рöдтысь вöлöс сувтöдасны, ыпъялысь керкаö пырасны. Быдтор вермасны вöчны: и ассьыныс удж-ноксö, и мужичöйлысь. Оз, майбыр, некытчö йöрмыны. Помöсдінысь Валентина Игнатова некодлы жö вомас оз видзöд. Кык челядя том аньлöн пельпом вылын став овмöсыс кутчысьö.
Киас ворсö пила и чер
Валентина Васильевна верöс сайö петöма водз. Кык во виччысьöма Лёшасö армияысь. Но кыдзи ачыс висьталö, челядь чужöмаöсь, и гозъя юксьöмаöсь. Верöсыс юсьöма.
Юксьытöдзыс гозъя заводитлöмаöсь керка кыпöдны. Но верöсыслöн юсьöм бöрын уджыс дудöма.
—Мöвпышті мунны, а кытчö? Николашаöй дзоля на вöлі. Он öд улич вылö пет, — висьталö Валентина Васильевна. — Медалі сиктсаясöс, мед отсаласны керкаöс эштöдны. Вевт улын сулаліс, а пытшкöсыс нинöм вöчтöм, джодж ни пöтöлöк.
Но помеч вылö эз локны öти лун, мöд, уджыс сулалö. И ковмöма Валентиналы аслыс киас босьтны пила да чер. Войбыд думайтöма, мыйö медводз кутчысьны, ставсö артыштöма да асывсяньыс мунöма выль оланін вöчны.
Кöть кодсюрö и сераліс
Быд лун асывсяньыс сёр войöдз ачыс вöчасьöма. Нёль тöлысьöн и артмöма ставыс. Стрöитчигас нин казялöма, мый мöдöн нöбасьö.
—Пöдругалöн верöсыс шмонитіс, выль керкаад пö выль мужик колö. Сідз быттьö сылöн кывйыс и имитіс. И чужи Тихон, — нюмъялö ань.
Суседъясыс ёна и шензьöмаöсь, кор аддзöмаöсь Валентиналысь мырсьöмсö. Кодкö пö эськö ноксьö, а абу мужик кодь. Первойсö кодсюрö весиг сералыштöмаöсь. А сэсся аддзöмаöсь, мый ставсö лючки вöчö. И кодсюрö туйдöмаöсь на, кыдзи да мый бурджык вöчны.
Керка эштöдöм бöрын Валентина ыджыдджык Лида чойыскöд кыпöдöма пывсян. Дерт, аньлöн удж йылысь кывсьöма и верöсыслы. Волöма Валентина дорö прöща корны. Öти кадö нывбабаыд весиг сибöдлöма. Но винаыд мужичöйлы, тыдалö, чöскыдджык да юöм-кодалöмысь абу и öвсьöма. Аньыд бöр вöтлöма сійöс.
Локтас кö Валя...
Öні Валентина Васильевналöн киас став сикас вöчасян инструментыс ворсö. Мыйö оз босьтчы, быдтор артмö. Мукöд мужичöйысь бурджыка на.
—Девочкöвöй козиныд меным оз ков, колö мальчикöвöй, — шпыннялö Валентина. — Пöдругаяс тöдöны нин, мый меным козьнавны — инструмент. Со суседсянь — уджалан паськöм. Зэв нимкодь таысь.
Зіль аньыд ачыс куим юкмöс нин кодйöма. Öтиöс йöрас, мöдöс гöбöчас, а коймöдöс мамыслы. Öні Валентиналы ваыс гортас ачыс воö, дзик карса патераын моз. Та могысь ставсö жö ачыс вöчöма.
—Карö лэчча да рöдвужöй менö зэв нимкодя вочаалöны, — шуö ань. — Воча чойяслöн верöсъясыс шмонитöны: "Ура! Валя локтіс, ставсö вурас, вöчас, дзоньталас". А ме ог дöзмы. Да и аслым окота мужичöй уджсö вöчны.
Кулан платтьö
Бать-мамыслöн найö быдмöмаöсь куим ныв. Валяöс матыссаясыс рочасигмоз шуöны "золотая серединаöн".
—Батьöй вöлöм шогсьö, пиыс абу да, — висьталö Валентина Васильевна. — А кор мам аддзис, кыдзи пилитча, крапкис, некутшöм пи пö оз ков.
Кыдзи казьтыліс Валентина, сійö челядьдырйиыс ёнджыка зонпосникöд ворслöма, мач чужъялöма да керка вевт вывсянь чеччалöма. Но сэк жö ичöтсяньыс кысьöма-вурсьöма, вышивайтчöма.
Век жö киас медводз ем босьтöма. Чойыскöд ки чышкöд вышивайтöма. 7-8 классын велöдчигöн сиктсалы уналы платтьö вурöма. Медводз öти баб корöма вурны аслыс кулан платтьö. Валентиналöн мамыс ёна и тэрмöдлöма нывсö, öдйöджык пö вур, тшöктіс да. Кызь во нин сэксянь кольöма, а бабыд, ен сыкöдöн, ловъя на.
—Кор аддзысям, пыр шуö, мый менсьым вурöмöс видзö. Тöлöдны пö петкöдла, мед платтьöсö воз оз сёй, — водзö сёрнитам Валентина Васильевнакöд.
И шырас, и баситас
Школаас на велöдчигöн вурсьöма и челядьлы, и верстьöлы. Оз тай вöлöм повны, мый бур дöрасö тшыкöдас. Сизимöд классын жö Валентина заводитöма шырсьыны да причёска вöчавны. Весиг школаын велöдысьясыс вöлöм пуксьывлöны та могысь ныв дорö.
Став тайö сямлуныс öні колö концертъяс кежлö дасьтысигöн. Уджалö Валентина Васильевна клубын. Да и медасьöма сэтчö 15 арöссянь. Сэки том нылöс методистöн босьтöмаöсь. Нуöдöма йöктан да аэробика кружокъяс.
—Мыйлакö эскöны вöлі меным, — висьталö ань. — Некутшöм уджысь ог пов да.
Дерт, велöдчытöм морттö крукыштны вермасны. А Валентина Васильевна сöмын öкмыс класс помалöма. Зіль да писькöс аньыд 10-11 классö помалöма öти воöн. Гортас и велöдчöма. Сэсся заочнöя помалöма культура колледж. Театрса педагог-постановщикöн лоöма. Сиктса клубын веськöдлö "Вдохновение" йöктан котырöн. Ачыс ворсö Помöсдінса народнöй театрын.
* * *
Кытшовті Валентина Васильевналысь овмöссö да шензи. Некыті абу вежыньтчöма, абу киссьöма. Ставыс лючки-бур. Тöдчö, керкаас и аньлöн, и "мужичöйлöн" киподтуйыс эм. Но зэв жö нин окота, мед Валентина и збыльысь аддзис аслыс радейтана пöлöс, коді эськö эз нин лэдз кутчысьны пила-черö.