Новости Республики Коми | Комиинформ

Муніс Öльöксан война вылö...

Муніс Öльöксан война вылö...
Муніс Öльöксан война вылö...
logo

"Олöм неуна путьмыштіс – война öзйис. Муніс Öльöксан война вылö. Ен мед видзас мöдысь тöдлыны сэкся олöм-вылöм. Ми Нинакöд кыкöн, ыж видзим пыр да, эг тшыгъявлöй. А кодлöн керка тырыс челядь, ёна сьöкыда олісны.

Письмö Öльöксансянь кык и воліс. Война помасис, ловйöн кольöмаяс локталöны, а сысянь шы ни ру. Воис юöр Иван воксяньыс. Куйла пö Мöскуаын, бурдöдча. Öтнамöс оз лэдзны да, кодкö волöй. Аминь öдйö Катя ветліс да вайöдіс.

Бура дыр Иван беддьöн крöвликасис. Коркö и ямöстöма гöтырыслы, мый Öльöксансянь письмö волöма. Муна пö ёрткöд сылöн чужанінас, вермас лоны, кольчча. Насталы энлы висьтав. А Катялöн вомас ваыд эз йизьыв, варовлуныс ассьыс водз чужлöма. Водз-водз асывнас котöрöн локтіс, кашкö, тэрмасьö меным удтыны. И адрессö вайö. Видзöдлі да отьми – Узьбекистан! Меным мый Тöлысь выв, мый Узьбекистан – öтылнаын. Кык лун неморт вöлі, вой эг узь.

Öзйи. Муні сельсöветö. Орчча жыръяс – колкоз правленньö. Кыкнанас фронтöвикъяс ыджыдöсь, ёна эз и ковмы кеньгыны. Шуисны лэдзны менö. Некымын печатя кабала сетісны, öта-мöдсö вежмöныс висьталöны, кыдзи-мый ветлыны. Колкоз пред шуö Öльöксанöс öдйö-джык вайöдны: йöз уджавны оз тырмы, а сійö зарни киа. Мöдыс велöдö, уна кöлуй-мöлуй мед аскöд ог босьт, сэні пö шоныд.

Мöдöдчи. Быдлаö гуся зеп вури. Рöдня нуръясянтор чукöртіс. Бабаяс дивуйтчöны, батьö сöткö, кытчö пö лешакыс нуö. Мамö öюртö, мед Нинаöс аскöд ог ну. А менам аслам дум: Нина быттьö кöзыр Öльöксанкöд сёрнитны. Дзик öд батьыс, кульöма и ляскöма, весиг ветланногыс сылöн. Аддзас да кыскыштас сылань. Код тöдас, колöкö, кык вонад гöтрасис нин сэні...

Со сэсся пукті панераысь чоботанö шылльö-мылльö, нуръясянтор да петім туйö. Медводз дзонь сутки "Бородино" паракодöн карöдз брутким. Син эг куньлы, юрын жувгö: кытчö бара-й мöдöдчи, мый тон лоö? Асъядорыс гöгöрвои: ог кö аддзöдлы, олöм оз ло. Карын чожö отсаліс пуксьыны мöд паракодö, Котласöдз. Йöзыс пуксисны, ыльöбöн йöршитчим труба дорас. Нина унмовсис сы ни садь.

Ми варовитім орчча сиктысь нывбабакöд. Ме моз жö верöс дорас мунö Роч муö. Майбырöс верöсыс корöма сэтчö овмöдчыны. Сэсся Котласын пöшти куим лун бергалім. Коркö и поездö пуксим.

Вот и муныштім, вот и гурликтім. Ыджыд жö Россияным! Мыйсö сöмын эг аддзылöй. Войнаöн рöзöритöм му, пасьвартöм кар да сикт, туй бокö чергöдчöм танк, жугалöм машина, пöрöм вагон... Со кöні страсьтыс вöлöма! Кымыныськö сьöлöм топавліс, он кöсйы, да синва петалас. Поезд то надзöник лунтыр мунас, то быд здукö сувтö. Быд вокзалын йöзыс жуö, ува-ава. Вагонын муртса прöстмылас, бара нин туджсьöмаöсь. Пöшти быд поездын салдат тыра вагонъяс. Гортас локтöны ловйöн кольöм геройяс. Сьылöны, гудöкасьöны, весиг йöктыны босьтчыласны. Ёна и гажöдісны.

А меным дум вылö усьлісны война вылын усьöм ас сиктса мужикъяс. Ставныс верстьö, ён, мастерöвöй йöз. Мед, думайта, тайöяс ыззьöны, гажöдчöны шуда здукас. Водзын уна и удж виччысьö...

9 арöса Нина öдйö вöлі ас коддьöмыскöд тöдмасяс, вагон кузя дзизъялöны. Öтчыд тювкунняöс весиг воштылі. Вöлöмкö, зонпосникöд котöртöма вокзалö вала. Кык орчча поезд увті вуджöмаöсь, а сэні öчередь. Бöр локтігас нин миян поездным вöрзяс. Пызйыштöмаöсь бöрсяньыс, да салдатъяс отсалöмаöсь кавшасьны. А ме – ок да мат! Сувтіс поезд да чеччышті, дась бöр мунны корсьысьны. Видзöда да, салдатъяс аравасö вайöны. Кöсйи шыльчаöс бурпöт някравны, да эз лэдзны. Дыр бöжö кутчысьöмöн эз ов, регыд и бара вöймис.

Коркö унмовсим, эг и тöдлы, киысь прöстмöдöмаöсь воропсö да чоботантö гусялöмаöсь. Бур, мый кабалаястö ас бердын видзи.

Коркö и Ташкентад воим. Гортысь петім майын, а заводитчö нин август. Вокзалын миянöс кутісны, нуисны пывсянö, кöлуйнымöс чукöрнас кытчöкö лэбöдісны, мед той да висьöм тані ог паськöдöй. Пывсьöм бöрын паськöмнымöс сеталісны тертука кодь чорыд да дука. А ми кузь туйнад да пывсян бöрад дзикöдз лигышмунöмаöсь. Босьтім арбуз да здукöн вазгим. Аслым нимкодьыс: ловъя öд вои, Нинаöс эг вошты, тшыгла эг кулöй.

Но колö на водзö мунны, кыдзи адресö гижöма – Андижанö. Бара поезд. Воим да Нинаöс биаліс. Йöршитісны больничаö, малярия пö. Нинаöс лэдзисны, аминь-аминь нэриник, платтьöыс шлюп, куш юра, весиг быттьö нюжалыштöма. Сулалам туйвежын, пöсь лювгö, кок емалö. Колана сиктöдз пö 12 верст. Гортын кö, тайö вöлöктö муртсаöн и вуджан. А öні сідзи унежитчöмаöсь, кок юзгö сюръя моз. Öд сы мында лои подöн рашикасьны жар поводдяö.

Регыд машина сувтіс, арбуз тыра. Веритöй кöть энö, мунö вöлöм миянлы коланаинö, а кабинаас – Öльöксанöс татчö ылöдысь ёртыс! Воим, петкöдліс Öльöксанлысь оланінсö да öдйö пызйыштіс. Менам бара юрö лёк дум воис: мыйла та öдйö пышйис?..

Кутчыси öдзöс вугъяс, сьöлöм горшын пессьö: мый тон аддза? Восьті, воськовті, Нина сувтовкерис. Мышкöн миянлань Öльöксан пукалö, мыйкö мастеритö. А воча коксö сюркнялöмöн томиник нывбаба пукалö, чатöртчöма сы вылö. Син лапнитігкості звирк чеччис да воши. Сьöлöм топавліс – рушкуа! Öльöксан бергöдчис да сöмын нурбыльтіс: тэ али мый?

А сэсся, колöкö, асьныд юртö жуглöй, кыдзи да мый вöлі: окасим али кокасим, бöрдім али сьылім. Сöмын тöвбыд олім, да аньыс весиг öтчыд син водзын эз вуджöртлы. Дыр мысти Öльöксан каймöстліс, мый усьöм салдатлöн дöва, пи быдтö. Коді сэсся чужис, ог тöд. А ме сы водзын абу мыжа. Менам гижсьöм йылысь печатя кабала эм. Ныв со быдмö и...

Но вот, олам-вылам узьбекын. Кыкнанным уджалам жуявмöн. Öльöксан колкозын трактористалö. Ме вата пабрикаын мужикъяскöд радысь. Бабаяс клопоксö öктöны му вылын кöрзинаясö да вайöны миянлы. Ми тöлöдам, сэсся тэчам. Асывнас бригадир юклö йöзсö удж вылö, ставныс менö ас дорас чуксалöны. Кöні ме уджала, сэні план тырö да. Артмö сы вöсна, мый узьбекъяс луннас кыкысь уськöдчывлісны пидзöс вылö, люкалöны мусö да аллах сьылöны. А ме öд сэк кості ог шуйвидз, водзö уджала. Весиг матькыштла вöлі: ме весьтö красуйтчад! Босьта потш да вот пöвсала дыш мышъясöс. Öльöксан вомалö менö яруйтöмысь, нöйтасны пö.

А Нина здукöн ас коддьöмыскöд партитчис. Кватитчи да, на ногöн нин сёрнитны босьтчöма. Мый сэсся: шоныд, кынöм пöт. Но уджтöг и челядьöс эз видзны. Быдöнлы вöлі ва-йöны посни розя ящик, кытчö лöдöмаöсь номыр. Челядь налы сюялöны кор, вазьöдыштöны. Сэсся номыръяссьыс петасны жукъяс (шелкопряд – авт.). Нуасны ящиксö пабрикаö, наысь пö сэсся кутас петны клей кодь вöсни сунис, артмас шöвк.

А менö лунысь-лун гажтöм босьтö. Нинöмöн сьöлöм оз бурмы. Муртса вит час, а ывлаыс сап пемыд нин. Гортын тöлысьыс гöгрöс чужöмнас быттьö вашъялö, а тані вывті ыджыд, виж, быттьö грöзьбаöн видзöдö. Сёрнитны некодкöд. Öльöксан абу варов, Нина ичöт на. Узьбекъяслöн мода абу öта-мöд дорö пыравлыны. Быд лун кöзяинкöд пана гортö мунöм йылысь сёрни. Тшöкыда вöтася гортсаясöс, лымъя ывла выв. Да и Нинаöс думнö. Школаыс Андижанын, коді сійöс новлöдлас? Узьбек аньыс дум вылö усьлö. Лешаклы, колö мунны татысь.

Менö вöлі шуöны урусöн. Мися, ме абу урус, абу урöс, абу русскöй, ме – коми! А уджыд и гортын ки гаддявтöдз сюрö. Тані зьмейяс кыскасьöны, лёк гагъяс му джоджöд тювкъялöны. Лягушаясыс пöтöса кань ыдждаöсь, войбыд зэв гораа ваксöны. Коркö пажнайтігöн Нина юр весьтын стенас друг ыджыд лёк гаг мыччысис. Öльöксан весиг миянöс горöдöмысь öлöдіс. Надзöник нюжöдчыліс кузь воропа клещила да тшапнитіс гагсö. Вöлöма яда твар, эг кö казялöй, войнас вермис кувтöдз курччыны. Шонді сотö, пöжöм сырчикъяс кодьöсь лоим, омöльтчим да муговмим. Пыр деньга чукöртам туйö.

Май помын казялі "анькытш ныльыштöмтö". Ог жö йöз муын чужты!

Паракодсянь сиктöс аддзи, да лолöй оз шед нимкодьла. Сиктсаяслы шемöс, юасьöны быдтор. Ми тшöтш вобыдся татчöс лоöмторъяссö горша сёрнитам. Вöлöмкö, миян мунан 47-öд воад гожöм шöрнас зэв чорыда пужъялöма. Кынмöма нянь и картупель, тшак и вотöс. Вывті сьöкыда тöвйöмаöсь йöзыс и скöтыс. А ми сэні нинöм эг тöдлöй.

Мый сэсся висьтала? Доддясим уджö. Пыр уджалі скöт дорын. Чужті öта-мöд бöрсяыс ичöт костöн куим ныв, медбöрын – нимкодьтор пи.

А Öльöксан понда пöрысьмытöдз ковмис нервничайтны. Кымынлыськö лёзь нетшкылі, весиг öшинь кисьтлі. Кытчöкö тай ставыс кольöма.

Быттьö вöтын моз вöлі олöмöй, пыдöстöм ру пиын ставыс вунö, сайкалö. Тöрытъяыс вунöма, а коркöяыс пыр син водзын..."

* * *

Кывза Наста баблысь тайö висьтасьöмсö да ог мудз шензьыны. 1947 во. Страна джынйыс пасьвартöма. Тшыг нисьö пöт олöм. Колö войвывсянь лунвыв пыдöсöдз вуджны. Ань жебиника тöдö роч кыв, а мöд кывъя йöз муö путьмö мунны. Лэдзöны и колхозсянь, кöть эськö ставсö топöдісны, паспорт весиг оз вöлі сетны, медым йöзыс эз мунны бокö. Колö зеп тыр сьöм та ылнаö воны. Збойлун колö, öд быдсяма йöз кузь туяд паныдасьлö. Öльöксанöс коланлун. А, гашкö, небöгын да киноын кодь радейтöм? Кöть эськö тайö кывсö Наста баб öтчыд эз шу.

1976 воын ме вöлі сійö местаясас. Намангакöд орчча сикт юркарбердса Выльгорт кодь. Школаас буретш велöдчан во пом. Некутшöм гаж оз вöчны. 6-öд классянь нин нывкаяссö заводитöны ньöбавны гöтырпуяс пыдди. А школа помалöм бöрын июль тöлысь чöж мунö пир бöрся пир. Невеста медводдзаысь аддзö ассьыс жöниксö сöмын кöлысь ворсан лунö. Вö-лöмкö, пыр тшöкыдджыка нывъяс киськалöны асьнысö бензинöн да öзтöны, зэв нин мустöм да пöрысь сайö кö сетöны. Суд, прокуратура быттьö нинöм оз аддзыны. Клуб ни кино сиктын абу, том зонъяс Намангаö ветлöны зэв гежöда. Сэні быд воськолын плакат, кöні Брежнев вом на вом окыштчö сэтчöс секретарь Рашидовкöд. И ставыс тайö – Сöвет власьтлы 60 во тыригöн! А 1947 воö?!

Менам ветлігöн сэтчöс олöм йылысь гижны эз позь. Весиг "Правда" газет ылöдчис, СССР-ын пö быдлаын райын кодь олöм, закон да пöрадок, войтыр костын топыд ёртасьöм. А ми эским.