Эм татшöм легенда. Китайса император чукöртöма странаса став олысьсö ас дорас, медым тöдмавны, коді медся арлыда. На пöвстын вöлöма 194 арöса Мампэ крестьянин. Сыкöд тшöтш локтöмаöсь 173 арöса гöтырыс, 153 арöса пиыс да 145 арöса моньыс.
Ветымын во мысти мöд нин император бара корöма ас ордас пыдди пуктана дыр олысьясöс. И бара локтöмаöсь Мампэлöн рöдыс.
–Мыйла ті та дыра оланныд да дзоньвидзаöсь? – чуймöма император.
–А ми тöлысьнас сизимысь "сотам" сё висьöмысь чут, – вочавидзöма пöрысь морт.
Мампэ сэки висьталöма емöн бурдöдчöм йылысь. Иглорефлексотерапия дырйи ем сатшкигöн неуна сотыштö. А сэсся татшöм ногöн уколтöг да лекарствотöг позьö бурдöдны кöть кутшöм висьöм.
Саша вочавидзас
Сыктывкарысь врач-иглорефлексотерапевт Александр Николаевич Гудырев унаöс жö нин кок йылас сувтöдöма. Сійö ичöтсяньыс кöсйöма лоны бурдöдысьöн. Школаын походъясö ветлігöн сьöрсьыс пыр новлöдлöма аптечка. Кодкö кö доймас, пыр и отсалас. Анатомия урок вылын сыкöд öти классын велöдчысьяс весиг вöлöм шмонитöны, кор велöдысьыс мыйкö юалас налысь, висьталöны: "Мед Саша вочавидзас, сійö öд врачöн кöсйö лоны".
Александр Николаевичлöн мамыс война кад вуджöма, сьöкыда тылын мырсьöма-уджалöма. Дерт, чорыда висьöма. Некутшöм лекарство-уколöн пö вöлі дойыс оз лöнь. Сöмын öти бурдöдысь емöн вермöма отсавны.
–Сэки и шуи аслым, мый быть врачö велöдча, а торйöн кö, кута емöн лечитны, – висьталö Александр Николаевич.
Велöдысьыс Китайын босьтöма тöдöмлунс
Сизимдасöд воясö, кор Александр Гудырев велöдчöма Архангельскса медицина институтын, иглорефлексотерапевтö абу на велöдöмаöсь. Да и öнöдз пö медицина вузъясын тайö нырвизьыс абу. Сöмын бöръя курсын, окотитан кö, верман ветлывны факультатив вылö. Со и Александр Гудырев ачыс босьтчöма корсьны иглорефлексотерапия кузя быдсикас литературасö.
Кор воöма уджавны Сыктывкарö, дум-кöсйöмсьыс абу лэдзчысьöма, öтарö туясьöма-корсьысьöма. 1980-öд вояс заводитчигöн велöдчöма профессор, медицина наукаса доктор, Россияса иглотерапевтъяс ассоциацияса президент Александр Трофимович Качан дорын. Тайö мортыс тöдöмлунсö босьтöма Китайын.
Челядь оз бöрдны
1985 восянь Александр Николаевич ачыс нин заводитöма бурдöдны емöн Эжваса психиатрическöй больничаын. Медводз сы дорын лечитчöмаöсь челядь, кодъяслöн вöлöмаöсь психика торксьöмъяс да нерв висьöмъяс. Рытнас сы дорö волывлöмаöсь и верстьö.
–Öткымын бать-мам полöны, мый челядьыс кутасны горзыны-бöрдны, да локтöны ныв-пинысö кутны семьянас, тшöтш и деднас, и бабнас, – висьталö врач-иглорефлексотерапевт. – Но емöн лечитчигöн некыт оз доймы, челядь лöсьыда куйлöны. Мöдысьсö кагасö вайöдігöн рöдвужыс оз нин майшасьны.
Сідз, ассьыс кыкнан нывсö Александр Николаевич поликлиникаö некор абу нуöдлöма, пыр емöн бурдöдлöма. Налöн весиг амбулаторнöй картаыс абу вöлöма. Ыджыдджык нылыс бать кок туйöдыс восьлалö, сійö невролог да и емöн тшöтш бурдöдö.
Чутад колö на веськавны
Емöн позьö бурдöдны уна сикас висьöм. Лекарствоöн кö юр либö кос висьöмыд оз лэдз, емöн дойыс öдйö лöньö. Тадзисö оз нин ков юны лекарство, вöчны укол да физиопроцедураяс.
–Найö öд öтилаті лечитöны, а мöдлаті калечитöны, – висьталö Александр Николаевич. – Дерт, диабетöн нёрпалысьöс инсулинысь ог дугöд, лекарствотöг некыдз и налы, кодлöн эпилепсия, давлениеыс вылын. Но век жö вочасöн позяс и сытöг овны.
Мортлöн вывтырас 1.686 чут. Öти пеляс сöмын 168. Найö вывті матынöсь öта-мöд дорас. Абу кö бур специалист, он и веськав коланаас. Кыдзи висьталіс Александр Николаевич, унаöн босьтчылöны бурдöдны емöн. Но кор заводитöны тöдмасьны лечитанногнас да аддзöны сы мында чут, öвсьöны.
–А позьö емöн калечитны мортöс, он кö веськав коланаинö? – юася сылысь.
–Калечитны вермас быд врач, – шуö сійö. – Оз кö бура туяв висьöмсö да ад-дзы сылысь помкасö. Куж-тöгыд емтö кöть яй пасьталаыд сатшйöдлы, кокньöдыс оз ло. Шуам, чунь помын зэв уна чут. Сöмын игло-рефлексотерапевт тöдö, кöнöсь найö. Коланаинö веськалігöн позьö садьсö воштöм мортöс пальöдны либö пиститöг ёнмöдны вын-эбöстö, мед он висьмы ОРЗ-öн да гриппöн.
–Сідзкö, емöн позьö бурдöдны дзик став висьöмысь?
–Абу дзик сідз. Но ичöтсянь кö лечитчыны емöн, весиг дзоньвидзалун ёнмöдöм могысь, миян пöвстын эськö вермытöмаяс эз вöвны, – чайтö Александр Гудырев. – Жаль, иглорефлексотера-певт дорö нёрпалысьяс локтöны медбöрын. Медводз найö кытшлаласны поликлиникаяс, стационаръяс, тöдысьясöс, йогаясöс, магъясöс, а сэсся нин миян дорö воöны.
Больничаын к он бурд...
Александр Николаевичлöн кывъяс серти, медицинаын сылöн уджъёртъясыс оз пыдди пуктыны емöн бурдöдысьясöс. Öд найöс вузъясын профессоръяс велöдöны торъя схемаяс серти лечитны. Сэтшöм либö татшöм лекарствоöн "вердасны", а кокньöдыс оз и ло. Сэсся гижöны, мый висьöмыс хроническöйö вуджис да нинöмöн нин отсавны оз вермыны. А колö эськö специалистлы иглорефлексотерапевткöд öтув уджавны.
Кыдзи висьталі нин, емöн позьö öдйö лöньöдны дойтö. Тöдан кö, дерт, кытчö сатшкыны. Александр Николаевич уналы нин отсалöма. Казьтывны кö ставсö, газетлöн листыс оз тырмы. Некымын во сайын сы дорö вайöдöмаöсь мужичöйöс. Уджавлöма сійö вöрын да, дерт, кынмавлöмыс сюрлöма. Со и юрсö вежыньтöма, оз бергав, ни оз веськав. Дас вит во мортыд пöлöс юрöн ветлöдлöма. Медбöрти рöдвужыс вайöдöмаöсь Александр Николаевич дорö.
–Час чöж сыкöд нокси, – казьтылö Гудырев. – Видлалі да емöн сатшкалі. Медводз сійöс пöсьö шыбитіс, давленньöыс кыптіс, сэсся ставыс лöсяліс, да мужичöйыд юрсö веськöдіс и... бöрддзис.
А кысь нö он нормы?
Мöд вöвлöмтор. Öти том морт чери кыйигöн коксö вундöма. Ранаыс пежасьöма да нёль во улялöма. Некыдз оз вöлöм косьмы. Кокыс сісьмыны нин кутöма, да вундыны кöсйöмаöсь. Мамыс вайöма писö карö операция вылö. Тöдсаыскöд паныдасьöмаöсь, да сійö и туйдöма пыравны Александр Николаевич дорö. Дерт, отсалöма. И некутшöм операция зонлы абу вöчöмаöсь.
Кор ми сёрнитім Александр Николаевичкöд, бурдöдчанінысь петіс öти ань. Киöдыс кутіс ар квайт нывкаöс. Мамыс тшöктіс нылыслы янсöдчигас кинас öвтыштны – "данньö" висьтавны. Но нывкалöн лёкиника на артмыштіс "пока". Мамыслöн синваыс доршасис...
Вöлöмкö, нылыс оз сёрнит, а со воссьыны заводитöма гöлöсыс.
–Емöн бурдöдчöмыс – дивö?
–Ме абу волшебник, – вочавидзис Александр Николаевич. – Тайö менам дыр кадся удж. Ас кадö кö шыöдчасны, мыйöн верма, отсала.