Декабрь 7 лунö республикаса юркарын нимöдісны быд вося "Признание" конкурсын вермысь журналистъясöс.

"Дебют" нимпасын вермис "Войвыв кодзув" журналын уджалысь Любовь Ануфриева.

"Золотой микрофон" нимпасын медбурöн шуисны "Коми гор" телерадиокомпанияысь корреспондент Василий Каневöс. Чолöмаліс сійöс Комиын общественнöй палатаöн веськöдлысь Маргарита Колпащикова. Сійö пасйис, мый журналистъясöс позьö öткодявны бурдöдысьяскöд. Ті пö кывйöн верманныд вины и лечитны. Василий Канев жö вочавидзис, мый "Коми горса" журналистъясысь повны оз ков, найö пö сöмын отсалöны.

"Золотой объектив" нимпасын вермис "Республика" газетысь фотокорреспондент Дмитрий Напалков. Чолöмаліс сійöс мирса чемпион Василий Рочев. Мыйлакö нималана спортсмен сорсьöмöн шуис Дмитрийöс Фёдорöн. Ме пö тэнö бура тöда, унаысь снимайтлін миянöс да.

"Золотой рейтинг" выль нимпасын медбурöн шуисны Кöрткерöс районысь "Звезда" газет.

"За личный вклад в журналистику Республики Коми" нимпасын вермысьöн лоис Валентина Лях.

Уна вося бур уджысь Коми Республикаса правительстволысь премия сетісны "Чушканзі" журналлы.

"Журналистская акция" нимпасын медбурöн шуöма Луздор районса "Знамя труда" газетöс. Жанр серти медбур гижöд тшöтш жö йöзöдлöмаöсь Луздорса газетын. Премия вичмис сэні зільысь журналист Константин Сердитовлы. А "Зарни борд" вичмис "Печорское время" газетысь шöр редактор Раиса Глущенколы.

"Признание" конкурсысь Гран-при вичмис миян "Коми му" газетысь Павел Симпелевлы. Сійöс шуисны 2012 вося медбур журналистöн.

–Нимкодь? – юалі уджъёртлысь.

–Эн юась, – вочавидзис Павел Иванович да козьналіс меным ассьыс букетсö. Моздор тыр лои.

Тöдчö коми мортыдлöн вежавидзöмыс. Выльлунö бара сы дорö "сираси". Павел Иванович шуис, мый премия сетöм бöрын сійöс унаöн чолöмалісны, госсöветсаяс, мукöд газет-журналысь уджъёртъясыс и.

–Шуисны, заслужитін пö. Гашкö, – нюмдіс Павел Иванович.