Кыв, культура, история сертиыс комилы медся матыс войтырыс – перымса комияс.

Миян республикаын олö 650-ысь унджык перымса коми. Некымын во сайын найö лöсьöдісны ассьыныс котыр, веськöдлысьнас бöрйисны Василий Осиповöс. Неыджыд кадколастöн удитісны нин нуöдны уна сикас аддзысьлöм, Сыктывкарö концертъясöн корлісны Гайна районса "Веселушки" да Кочев районса "В кругу цветов" котыръяс.

А неважöн Коми Республикаса финн-йöгра культура шöринын Визинысь "Девчата" котыркöд öтувъя концертын петкöдчис ПерымКоми кытшса Кукушка грездысь этнографическöй ансамбль. Сійö нималö йöзкостса сьыланкывъяс бура сьылöмöн, а йöктынысö — тупи-тапиасьны — на дорö петалісны и видзöдысьяс. Кукушкаса сьылысьяскöд Сыктывкарысь перымса комияс тöдмасьöмаöсь таво гожöм, Пармайлово грездын "Чудный карнавал" гаж дырйи. Сэки и сёрнитчöмаöсь Комиö волöм йылысь.

Концертсö петкöдлісны "Перым-коми паськöм вурам, новлам асьным" рыт дырйи. Рöдвуж войтырлöн паськöм йылысь висьталісны киподтуя йöз — Татьяна Николаевна Надымова да Галина Алексеевна Казанцева. Перымса комияслöн паськöмыс кöть и абу синмö шыбитчана, но сійöс лöсьыд новлыны тöлын и гожöмын, уджалігöн и шойччигöн. Сыктывкарысь перымса комияс öні на видзöны пöчьясыслысь сарапанъяссö, мичмöдчанторъяссö, пасьтавлöны сійöс концертасигöн, гажöдчигöн.

А рыт помасигас перымса комияслöн сёянöн чöсмасьöм бöрын выль ёртъяс шуисны öта-мöдлы: "Нимкодь пантасьны!" — "Выльысь на радпырысь аддзысьлам!"