Февральын коми войтырлöн дасöд съезд дырйи вöлі вöзйöма лöсьöдны "Коми велöдысь" общественнöй котыр да быд во чукöртлывны сэтчö пырысьясöс.
Сэки жö съезд вылö воöм велöдысьяс и гижисны выль котырö пырöм йылысь шыöдчöмсö. Эз сöмын Комиысь, но и Ненеч, Перым-Коми кытшъясысь войтыр, и котырыс пыр жö лоис регионъяскостсаöн. Тулыснас бöрйисны öкмыс морта правление, веськöдлысьнас лоис Мария Кузьбожева. Аски республикаысь велöдысьяс чукöртчасны госслужбалöн да веськöдланног академияын асланыс медводдза форум вылö. Шусьö сійö "Коми Республикаын чужан кыв да литература велöдöмын мытшöдъяс, найöс венан туйвизьяс". Форум йывсьыс паськыдджыка висьтавны корим Мария Вячеславовнаöс.
– Медводз кöсъя аттьöавны йöзöс велöдан министерствоöс, мый пыдди пуктіс съездлысь шуöмсö да во помасьтöдз на чукöртіс форумсö. Воасны сэтчö кар-районъясса велöдан управлениеясöн да "Коми войтыр" öтмунöмлöн представительствоясöн вöзйöм войтыр. Ставыс сё гöгöр морт. Дерт, чужан кыв велöдöм йылысь сёрнитам тшöкыда, тшöтш и коми войтырлöн конференцияяс дырйи, но ланьтöдчыны оз ков, мед эськö босьтöм öдыс эз чин. Чужан кыв велöдöмлы öні зэв лöсялана кад, öд та могысь и власьтлöн зільöмыс эм, и йöзыс – уна сикас юасьöмъяс серти – та дор сувтöны, и сьöм та вылö торйöдöны, коми кыв кабинетъяс колана оборудованиеöн могмöдöны, и велöдчан небöгъяс лэдзöны. Эм кодлы и учебникъяссö дасьтыны. Сідзкö, велöдысьяс сайын унатор, медым челядь окотапырысь волісны урокъяс вылö, медым коми кыв да литература налы радейтанаöн лоисны.
Татшöм аддзысьлöм-форумыс выль вын сетö велöдысьяслы. Таво гожöм-ар ветлім Кудымкарö, Санкт-Петербургö да, найö висьталöны, быттьö пö бордъясим, ас синмöн аддзим: ми йöзыслы интереснöйöсь сыöн, мыйöн торъялам наысь, асланым кывнаным, культураöн.
–А мый майшöдлö велöдысьясöс?
–Медся майшöдланаыс сійö, мый чужан кывсö велöдöмысь эновтчöны и коми районъясын. Весиг Изьваын, кöні войтыр асьныс зільöны ассьыныс олöмсö лöсьöдны-котыртны, видзны ассьыныс аслыспöлöслунсö. Сідзкö, миянлы колö ёнджыка ышöдны йöзсö, öд мукöд предмет велöдысьяс оз мунны коми кывйыслы паныд, гашкö, öткымынлаын сöмын школаса веськöдлысьяс талань синöны, öд, этшаджык кад кö вичмöдны коми кывлы, директорлöн тöжд-могыс чинас.
Майшасьöмыс и сиктса олöмкöд йитчö. Карад да гырысь посёлокъясад коми руыс абу нин. Юркарса коми культура шöринö том йöзыс уна волывлö, но подувсö öд пуктöма, коми дорас муслунсö чужтöма-пестöма сиктын. Карын велöдчигöн найö кöсйöны видзны-сöвмöдны, мый нин босьтісны ас чужанінас. Кодкö шуас, сикт йылысь пö сёрниыс велöдысьяслöн форумлы оз лöсяв, но ставыс öд топыда йитчöма, да мед эськö и чина войтыр пыдди пуктасны локтан восö Сиктлöн воöн шуöм йылысь съездлысь корöмсö.
–Кыдзи лоö котыртöма форумлысь уджсö?
–Первой, дерт, лоöны пленарнöй докладъяс: Каналан сöветса веськöдлысьöс первой вежысь .П.Марковлöн, йöзöс велöдан министерствоысь министрöс вежысь Н.И. Студиградлöн, ИЯЛИ-ысь учёнöй В.А.Лимеровалöн, КГПИ, СГУ, КРАГСиУ да КРИРО-ысь коми кыв туялысь-сöвмöдысь специалистъяслöн да, дерт жö, кар-районъясса школаясын велöдысьяслöн. "Коми велöдысь" котыр тшöтш вöчас доклад, а сэсся лоас велöдысьяслöн мöвп-вöзйöмъяса аслыссикас ярманга. Коми кывсö öні куим ног велöдöны, и учебник лöсьöдысьяс висьталасны, кутшöм небöгъясöн колö вöдитчыны. Кутшöмкö опыт чöжсис нин и сідз шусяна образовательнöй туризм котыртан уджын. Казьтыштлі нин Санкт-Петербургö да Кудымкарö ветлöмъяс йылысь. Кутчысясны кö тайö мöвпас районъясса методическöй котыръяс, ми эськö отсалам петавны велöдысьяслы и мукöд регионö. тлаын ветлігад налöн и öта-мöд костас ёртасьöмыс крепыдджык лоас.
Окота юксьыны форум дырйи и Перым-Коми кытшсалöн опытöн. Сідз, Кудымкар районса Разино да Кекур грездъясын школаыс велöдысьлöн оланінкöд öти вевт улын. Коймöд грездын нин татшöмсö мöвпалöны кыпöдны. Перымса комияслысь опытсö вылö донъялöма и федеральнöй тшупöдын.
Кудымкар районас сідзжö кызвын детсадсö пыртöмаöсь школа борд улö. Бурторйыс таысь эм, öд школаясö сьöмыс воö федеральнöй, а детсадъясö – муниципалитетса бюджетысь. Миян республикаын öткымынлаын босьтчисны жö нин öтувтны школаяс да детсадъяс.
Директорлöн и сідз могыс уна да, Кудымкарын сійöс мездöмаöсь челядьöс вердан, автобусöн новлöдлан, школа дзоньталан-пелькöдан тöждъясысь. Медалöны та могысь бокиса организацияясöс.
Республикаын унаöн нин тöдöны öтуввезйын Владимир Уляшевлысь "Лунö-бана" лист боксö. Сійö дась лöсьöдны и коми кыв велöдан портал, а юöрсö сэтчö сетны вермасны асьныс нин велöдысьяс. Та йылысь сёрниыс лоас жö форум вылын.
Тайö чукöртчылöм дырйиыс шымыртам ставсö, мый йитчöма коми кыв велöдöмкöд. И, чайта да, тыдовтчас, кутшöм нырвизьын нуöдны сёрнисö локтан форумъяс вылын.
И медбöрын, гашкö, медтöдчанаыс: форум дырйи лоö кырымалöма "Коми войтыр" да йöзöс велöдан министерство костын локтан воясö öтувъя удж нуöдöм йылысь сёрнитчöм.
***
Форум котыртысьяс шыöдчöны велöдысьяс дорö, кодъяс оз лоны чукöртчылöм вылас, мед асланыс вöзйöмъясöн, юалöмъясöн, майшасьöмъясöн найö шыöдчасны четвергö, декабрь 20 лунö, 15-сянь 17 часöдз 20-31-89 телефон пыр. Телефон дорас лоас Мария Вячеславовна Кузьбожева.
Декабрь 21 луннас 9 час асывсянь 15 час лунöдз позьö шыöдчыны 89042001955 телефон пыр, вочавидзасны том йöз – форум котыртысьяслы отсасьысьяс, да вöзйöмъястö сетасны "Коми велöдысь" котырын водзмöстчысьяслы.
"Коми му" газет