Россияса заслуженнöй, Коми Республикаса народнöй артист Анатолий Измалков ноябрь 8 лунö пасйö 65 арöс. Мöд лунас сылöн бенефис — "Куратов" опера, кöні сійö ворсö шöр рольсö. Тшупöда пас водзын артист аддзысьліс "Коми му" газетса корреспонденткöд.
—Анатолий Дмитриевич, енбиыд тшöкыда вуджö бать-мамсянь. Тіян сідзжö?
—Матысса рöдвужысь, кодъясöс ме тöда, некод эз вöв артистöн. Батьöй вöлі военнöй, а мамöй чужлöма крестьяна семьяын.
—Кытысь, сідзкö, ен-биыс, збыльысь Енсянь?
—Кымын ола, сымын думайта, мый тайö тадз. Искусствоö ме вои эг веськыд туйöд. Дерт, ичöтсянь пыр сьылі, лыдди кывбуръяс кружокъясын. Весиг ворсі духöвöй оркестрын. Но кыдз овлö музыкантъяслöн семьяын: "Вася, босьт скрипка да велöдчы ворсны!" Татшöмыс, дерт, эз вöв.
—Но ті аддзинныд асьнытö ыджыд сцена вылын, мöвпалінныд та йылысь?
—Эг. Кöть эськö музыкальнöй школаын велöдысь кывлöма менсьым сьылöмöс да, шуис: "Толя, тэныд колö велöдчыны!" Заводиті роч йöзкостса сьыланкывъяссянь. А сэсся и операысь ичöтик арияяс куті сьывны. Ветлывлі конкурсъяс вылö. Меным восьса вöлі консерватория öдзöс. Но суис неминуча, да öдзöсыд пöдласис.
—А мый лои?
—Ме чорыда ранитчи — взорвитчис Великöй Отечественнöй война кадся мина. Витебск обласьтын ёна тышкасьöмаöсь вöрöглы паныд. И со кольöма му пытшкас минаыд. Челядьдырйи на вöлі корсялам патронъяссö да бипурö шыблалам. Сэки некод эг доймылöй. А 25 арöсöн суис рöкыд...
Вöлі апрель 22 лун. Бать-мамкöд мунім шойна вылö дедлысь гусö весавны. Шойна бокас вöлі гуран, кöні ставöн лöп-ёгсö сотісны. Ме биалі и... взорвитчи. Бöрыннас кывсис, вöлöмкö, трактористъяслы гöригас сюрöма мина да найö сэтчö сійöс шыбитöмаöсь.
Зэв дыр куйлі больничаын, кыдз шуласны, öти кокöн мöдаръюгыдас нин вöлі. Мортъямми эськö, но врачьяс öлöдісны, сьöкыда уджавны пö оз позь. И сьылöмысь öлöдісны, сійö öд зэв жö ыджыд удж.
Вот тадз ме эг веськав консерваторияö. Но век жö велöдчи Ленинградын Крупская нима пединститутын.
—А кыдзи веськалінныд Комиö, миян театрö?
—Тöдсаöй корис Ухтаö. Сэні ме веськöдлі культура дворечöн. Волі удж кузя Сыктывкарö да пыралі опера да балет театрö. Менö сэні кывзісны да корисны сьывны.
—Артистъяс эскöны судьбаö. Кызвыныс, гашкö, суевернöйöсь? Эм-ö тіян кутшöмкö торъя ритуал сцена вылö петігöн, мед ставыс шыльыда артмас?
—Дерт, öтияс сценаö тотш-кöдöны, мöдъяслöн эм кутшöмкö талисман. А ме абу суевернöй, Енлы эска. Сьö-кыд кö спектакльыс, лыддя молитва. Отсалö.
—Öткымынöн асланыс юбилей вылö корöны мир пасьта тöдса артистъясöс. Ті кодöс коринныд? И мыйла бенефис вылö бöрйинныд "Куратов" национальнöй опера?
—Ме некодöс сэтшöмсö эг кор. А мыйла "Куратов"? Дерт, менам радейтана рольыс уна. А "Куратов" опера зэв сьöкыда меным сетчис. Кыдз шуласны, кага, кодöс сьöкыда нöбалін-чужтін, медся муса. Тайö спектакльыс коми культураын зэв тöдчана. И аслам чужан лун дырйи кöсъя аттьöавны Коми Республикаöс, Сыктывкарöс, тані олысьясöс, опера дасьтысьясöс.
Абу нин ловъя Ия Петровна Бобракова. Мыйта вын сійö пуктіс национальнöй опера дасьтöмö. Спектакльö босьтчытöдз ёна водз сійö меным шуис: "Куратовöн ме аддза сöмын тэнö". Ме сэки сэтшöма чуйми. Öд коми кывсö ме ог тöд и эг кöсйы янавны Иван Куратовлысь творчество туялысьяс да коми йöз водзын. Ёна майшаси, мый ог вермы стöча петкöдлыны тайö ыджыд мортсö.
Мыйла мукöдыс корöны асланыс бенефис вылö нималана артистъясöс? Чайта, найö кöсйöны, мед локтіс унджык видзöдысь. Да, менам юбилей дырйи, гашкö, и оз ло зал тыр йöз, гашкö, и оз кутны пурсьыны билетъяс вöсна. Мед. Чайта, тайö абу сöмын менам гаж. Кöсъя, мед искусство радейтысьяс нöшта öтчыд нимкодясисны коми кыв вылын операöн.
—Премьера бöрын на кывлі, мый ті кевмысьöмныд Куратовлöн памятник водзын, корöмныд сылысь бласлöвитöм. Тайö збыль? И, гашкö, öнöдз на сыкöд "сёрнитанныд"?
—Кывлі жö татшöм сёрнисö. Весиг уджъёртъясöй вöлі юасьöны, эг-ö вежöрöн торксьы. Збыльвылас ме эг кевмысь сы водзын. Ог соссьы, петавлі памятник дорас и видзöді, кутшöмöн сійöс вöчöма скульптор, мöвпалі, кыдзи меным колö ачымöс сцена вылын кутны, мед эськö Куратов кодь вöлі да видзöдысьяс менö эз дивитны, мый эг сяммы стöча ворсны коми йöзлы зэв тöдчана гижысьöс да мортöс. Кыдз шуласны, эг кöсйы лоны "фальшивöй" Куратовöн. И кор нин матыстчö вöлі премьераыс, волі памятник дорас да збыльысь шмонитана шуи: "Ваня, отсав!"
—Уджъёртъяссяньыд жö кывлі, мый "Куратов" бöрын тіянлы колö дыр-джык шойччыны. Сэтшöм сьöкыд партияыс или операыс сэтшöма эбöстö босьтö?
—Вокал боксянь кö босьтны, "Куратов" абу дзик опера спектакль. Гижöма сійöс öнія кадлы лöсялана ногöн. Шыладыс бур, но сьöкыд сьывны сы улö. Сэсся тані колö сьывны и комиöн, и рочöн. Сідзкö, артистлы колö вежлавны сьыланногсö, тайö бара жö лоö гöлöс песöмöн. А спектакль помас, кор Куратов кулан выйын шыöдчö чужанін дорас, артмö кутшöмкö горöдöм. Та дырйи зэв сьöкыд кутчысьны. А сьылысь кö мый вынсьыс горöдас, гöлöсыс вермас вошны.
—Артистъяслысь уналысь кывлан, кор пö найö дасьтöны кутшöмкö роль, геройыс, кодöс найö ворсöны, "вермö". Артист заводитö збыльысь овны герой моз.
—Чайта, пöръясьöны. Ме кö ворса Кентервильса замокысь Призракöс, сы моз жö сэсся кута улич кузя ветлыны али мый?
—Театр –— аслыспöлöс, мистическöй места, тані уна овлö гöгöрвотöмыс, чуймöданаыс. Ті мыйкö верманныд казьтыштны? Гашкö, мыйкö серамбанаöс висьталанныд?
—Дерт, та йылысь позьö дыр сёрнитны. Казьтышта дзик медводдза лоöмторсö, кор сöмын на локті театрö, сьылі хорын. Ворса вöлі "Насильно мил не будешь" спектакльын. Пуктыліс сійöс Леонард Ильчуков. Спектакляс петкöдчö, кыдзи кык семья оз лöсявны. Но гусар Скворцов, кодöс ме ворсі, пыр волывліс коравны Присенькаöс. Батьыс сылöн вöлі паныд. Сцена вылас вöлі сувтöдöма завор. Ме тшапа матыстчи сэтчö да сконъяси нюжöдöм тросö и кыдзи тай тювгыси-уси сцена шöрас. Залын пукалысьяс кулісны серамысла.
Сэтшöм забеднö аслым лои, чайті, режиссёрыс видас. Но Леонард Фёдорович матыстчис спектакль бöрас да такöдіс: "Эн шогсьы! Артистъяс пöвстын эскöны, мый уджавны заводитігад кö усян сцена вылö, сідзкö, тэнö сійö радейтö да быть лоан нималанаöн".
—Анатолий Дмитриевич, ті ворсінныд нин уна тöдчана роль. Мый нöшта окота сьывны?
—Весиг пенсия вылö петöм артист майшасьö, окота эськö вöлі и сійöс, и эсійöс ворсны, но эз мойви. Дерт, и менам уна на мöвп эм. Зэв окота сьывны "Тоскаын" Скрипиалысь партиясö. Окота ворсны Риголеттоöс. Но, кыдзи шуліс Шаляпин, пола.
—Мыйла?
—Чайта, Риголеттолысь партиясö сьывны, менам гöлöсöй "эз на быдмы". Ме лирическöй баритон. А сэтчö колö драматическöй.
Чайта, и ичöтик роль позьö ворсны яръюгыда, а ыдж-ыдсö лёка. Шуам, позьö ло-ны бур Кöинöн да лёк Фигароöн. Кызь воысь нин дырджык ворса Кöинöс "Золотой цыплёнокын". Тайö рольыс мен ёна муса и челядьлы кажитчö. Неважöн на вöлі муна туй кузя да паныдасис том зон: "Чолöм, Кöин!" Сэсся висьталіс, öнöдз на пö помнита спектакльсö. И таысь меным нимкодь.
—Музыкант видзö кисö, сьылысь –— гöлöссö...
—Висьтала кö, мый ёна куритча, мый и лоö гöлöс видзöмнас? Дерт, ме ог кынты кокöс, ог ю жар гожöмын кöдзыд ва, ог сёй мороженöй, ог кут горзыны улич вылын кöдзыд поводдя дырйи, а куритчантö песта.
—Анатолий Дмитриевич, ті казьтыштінныд пенсия йылысь. Чайта, быд артист полö тайö кывсьыс. Стöчджыка кö, полö, мый оз кутны сетны позянлун ворсны. А кодкö, гашкö, и сцена вылын кöсйö кувны...
—Да эмöсь сэтшöмъясыс. Но ме ог кöсйы, мед водзлань кокöн театрысь петкö-дісны. И ме пола, мый коркö ог ковмы театрлы. Но ог кöсйы, мед менö жалитісны да водзті бура ворсöм вöсна лэдзлісны петавны сцена вылö. Театр абу собес.
—Ті ёна ветлывлінныд гастрольöн Россия пасьта, суйöр сайö, сідзкö, тöданныд сэтчöс театръяс да искусство радейтысьясöс. Кутшöм тшупöдын миян театр? Тані эм-ö классика радейтысьыс, колана ног донъялысьыс? Эн дöзмöй, но ноябрь 9 лунö, а буретш сэки тіян и бенефисыд, Сыктывкарö локтö Нюша. Гашкö, ставöн сэтчö котöртасны?
—А коді тані мыжа? Ню-ша али Муся? Жаль, миян культураыс вывті улын. Сійöн и котöртасны кывзыны "муси, пуси, гуси". Весиг ог кöсйы öткодявны Куратовöс да Нюшаöс.
А миян театр зэв бур и артистъясыс енбиаöсь. И ог ачымöс ошкыны кöсйы. Искусство радейтысьяслы тöдса "Сыктывкарса тулыс". Фестиваль вылö волывлöны мир пасьта нималана артистъяс. На пиысь некод на нинöм лёксö эз шулы миян театр да артистъяс йылысь. Мöдарö, ошкöны, аслыс-пöлöс спектакльяс пуктам да. Дерт, жаль, Сыктывкарса олысьяс унаöн шеныштöны кинас опера вылö. Но эска, мый "муси-пуси" кадыс регыд помасяс.
—Анатолий Дмитриевич, а ті некор эн мöвпыштлöй мунны Сыктывкарысь мöд театрö?
—Корлісны эськö, но ме öд тайö сцена вылас уси...