Новости Республики Коми | Комиинформ

Козьналім челядьлы радлун

Козьналім челядьлы радлун
Козьналім челядьлы радлун
logo
Козьналім челядьлы радлун
Снимокыс Фёдор МАКАРОВЛÖН

Октябрь 9 лунö ми, "Коми му" газет редакция" автономнöй учреждениеын зільысьяс, шыöдчим асланым лыддьысьысьяс дорö корöмöн отсавны чукöртны небöгъяс Луздор районысь Мутничаса школалы, коді сотчис тавося август 7 лунö гымньöлысь. И тайö чукöстöмыс эз коль веськодьöн некодöс. Куим вежонöн редакцияö волысьыс эз бырлы, книгаяс вайисны зонпосни и верстьö, пöрысь и том. Вайисны гежöда паныдасьлысь нин небöгъяс, велöдчан литература, классика, Сöвет кадся гижöдъяс, детективъяс да с.в. Кодкö вайис кык-куим небöгöн, кодкö — машина тырöн, кодкö ичöтик тубрасöн, а кодкö быдса мешöкöн да кöрöбöн.

Ми сьöлöмсянь аттьöалам ставнысö, коді пуктіс пай Мутничаса школаысь библиотекалы небöгъяс чукöртöмö: Раиса Андреевна Королёвалысь челядьсö, Вячеслав Поповöс, Надежда Алексеевна Митюшеваöс, Тамара Юрьевна Кызродеваöс, Капитолина Вениаминовна Винсöс, Елена ГабоваСтолповскаяöс, Анжелика Елфимоваöс, Семён Терентьевöс, Нина Трофимовна Микушеваöс, Мария Отмаровна Карповаöс, Ирина Байрактарöс, Лия Васильевна Нечаеваöс, Наталья Андреевна Габоваöс, Елизавета Фёдоровна Гановаöс, Мария Вячеславовна Кузьбожеваöс, Луиза Васильевна Хореваöс, Николай Александрович Доронинöс, Артур Артеевöс, Михаил Борисович Рогачевöс, том зонъяс Иванöс да Александрöс. 400 сайö небöг вичмöдісны Комиын "Билайн" компанияса войтыр, отсöг сетöмын водзмöстчисны челядьлы республикаса С.Маршак нима да Кöрткерöс районысь М.Лебедев нима библиотекаясын, Инта карса администрацияысь велöдан управлениеын, "Комикнига плюс" да СГУ-ысь небöг лавкаясын зільысьяс, КР-ысь велöдöм сöвмöдöм да велöданног бурмöдан институт, МВД-са ветеранъяслöн сöвет, республикаса гижысьяслöн котыр, "Знамя труда" газетса редакция да унаöн мукöд, кодъяс весиг эз окотитны висьтасьны.

Октябрь 23 лунö, кольöм субöтаö, ми мöдöдім чукöр-тöм став тайö озырлунсö — 3.294 небöг — Мутничаса школаö. Сэтчöс велöдысь Валентина Фёдоровна Иванова корис газет пыр висьтавны зэв ыджыд аттьö ставныслы, коді козьналіс сиктса велöдчанінлы та ыджда радлунсö. Сійö сідзжö юöртіс, мый небöгъяссö лоö разöдöма велöдчан жыръясö, библиотекасö торйöн некытчö меститнысö да. Кутам пö лача, локтан воясö сиктын кыпöдасны выль школа (Мутничаын сійö зэв колана, öд талун сэні 18 арöсöдз челядьыс 150) да библиотека улö паськыдджык жыръяс вичмасны.

Веськыда кö шуны, ми полім, мый небöгъяссö машинаö сöвтны ковмас сöмын аслыным — "Коми му" газет редакция" автономнöй учреждениеын уджалысьяслы — да та вылö ковмас уна кад да вын-эбöс. Но и та пöрйö сюрины бур сьöлöма войтыр. Соссö пуджöмöн книгаяссö новлісны студентъяс Михаил Косолапов, Алексей Мороков, Павел Дымов, Юрий Цебенко, Денис Чупров, Комиын "Билайн" котырса директор Андрей Николаевич Ершов да компанияын зільысь Елена Нестерова, историк Михаил Рогачев, "Республика" газетысь журналист Артур Артеев, Кыв, литература да история институтын уджалысь Öльöш Рассыхаев. Дерт, и асьным бокö эг кольöй, öтувъя уджö пуктім пай Александр Ульянов, Ганна Холопова Николай верöсыскöд, Фёдор Макаров, Елена Плетцер.