Новости Республики Коми | Комиинформ

Ловъяыслы колö

Ловъяыслы колö
Ловъяыслы колö
logo

 

Мыйлакö тай, велалiм да, нималана морт йывсьыд тшöкыдджыка казьтылам сöмын сылöн чужан лункöд йитöдын, торйöн нин, тшупöда пас кö матысмö.

Александр Лужиковлöн юбилейöдз, ветымын арöсöдзыс, нёль во на. И чужлiс сiйö эз гожöмнас, а март 19 лунö. Но со сюри помка, кöть и абу радлана, но код тöдас, мед буретш öнi казьтыштны тайö енбиа коми кывбуралысьсö, кодi водза-водз эновтiс таладор югыдiнсö.

2003 восянь, кор Александр Лужиков эновтчис "Би кинь" журнал редакцияын уджысь, сiйö быттьö кыдзкö другысь мунiс и литератураысь. А гоз-мöд во мысти Марина гöтырыскöд торйöдчöм бöрын воши и син водзысь. Кывсьылiс, мый сiйö мунöма манастырö, а вермас лоны, пырöдчöма эскысьяслöн кутшöмкö котырö...

Кольöм во арнас грымöбтiс юöр, Александр Лужиков пö, збыль вылас кö, кык во нин куйлö Вылыс Човса шойна вылын.

Шензьöдана юöр бöрад "Республика" газетса корреспондент Марина Щербинина Лужиковлöн дöваыскöд ветлiсны корсьны сылысь гусö.

Собалöмаöсь пидзöсöдз лым пиöд. Но мыйлакö налы Александр Лужиковлöн гуыс син уланыс абу и усьöма. Шуöны, аддзим пö витöд номера сюръясö, но сы улын пö дзик мöд мортöс гуалöмаöсь. А кысь эськö и тöдмалан, кодöс, ним ни вич кö некытчö абу пасйыштöма.

Ми сэсся, "Коми му" газетын уджалысьяс, асьным шуим тöдмавны, кодi збыль вылас танi сорсьöма – гуалысьясыс, кабала вылö пасйысьясыс али "Республикаса" корреспондент.

Вылыс Човса шойна вылысь дас коймöд номера участокыс тыдалö ылiсянь. Танi мукöдлаын дорысь шочаджык паныдалан кöртысь дорöм крест-öградасö. Ни йöзыс, ни каляяс, кодъяс ракаяс пыдди асалöмаöсь шойнасö, татчö пöшти оз кежавлыны. Сiйö шондiа лунас ми öтнаным вомöнавлiм радöн-радöн нюжöдöм кузь мылькъяссö да зiлим корсьны сюръяö тувъялöм пöвторъясысь лыдпаса гижöд. Буретш татшöм ногöн пасъялöны карысь ли, туй вылысь сюрöм шойяссö. Буретш тадзи пасйöмаöсь и Александр Лужиковöс…

Унаöн сэсся нэм кежланыс кольöны лыдпаса ним улын. А мукöдсö пö рöдвужыс корсьöны да аддзöны и бöрыннас торйöдыштöны гунысö – пелькöдыштöны-потшыштöны.

Шойна овмöснас веськöдлысь шöр арлыда Стас нима мужичöй кыз тетрадьсьыс корсьысьöм да колана пасйöдтö аддзöм бöрти ачыс тшöтш вöзйысис петкöдлыны Александр Лужиковлысь гусö, мед некутшöм сорсьöм пö сэсся эз нин вöв.

И збыльысь миян водзын вöл\ сюръяö тувъялöм "№ 5" гижöда пöвторйыд. И сэсся матiберегын — некутшöм нима крест, мед позис сорлавны. Стаслöн тетрадяс сiдзжö лючки-бура гижöма, мый витöд номер, 27.02.2007 пас улын гуалöмаöсь Александр Лужиковöс, кодöс аддзöмаöсь Пушкин уличаса 68 номера керка пöдвалысь.

Кулöм йылысь эскöдан гижöдын пасйöма, мый Александр Лужиков кув-сьöма кöнкö 2006 вося декабрь 25 лун да 2007 вося январь 5 лун костын. Дыр-ö мортыд пöдвалас куйлiс, код тöдас.

Но со, слабог, аддзöма лолыс инсö, мед кöть и тадзи да танi.

А ми, надейтча, аддзим гусö Александр Лужиковлысь. Öнi сэсся колö корсьны сьöм сiйöс мортъяммöдны. Кыдзи со Кекур грездын чужлöм да танi жö бöръя шойччанiнсö аддзöм нöшта öти нималана коми гижысь Пётр Шаховлысь.

А сэсся… А сэсся, колö босьтчыны да корсьны гусö миян Тима Веньлысь. Кöнкö öд тан жö…

Тайö оз кулöмаыслы ков, тайö колö ловъяыслы…