Кöрткерöсысь краевед А.А.Панюков "Трибуна" газетын гижліс, Ягкöджысь ас му туялысь Лениан Игнатов пö абу прав сы кузя, мый Комиын овліс гöна морт. Сійö пö миянын овны оз вермы. А ме шуа, мый ачыс А.А.Панюков абу прав, да лыддя: Коми пармаыс тайö гöна мортыслы овны зэв на и лöсялö, весиг унаторйöн бурджык на. Кöрткерöсысь нималана краеведъяс А.А.Смилингис да Л.Н.Королева менам видзöдласаöсь жö. Найö шуöны, мый йöзлöн висьталöм серти, Кöрткерöс гöгöрысь гöна морттö аддзылöмаöсь жö.
Бура важысянь нин миян Войвылын тöдлісны тайö реликтöвöй олысьсö да весиг лöсьöдлісны сы йылысь легенда-преданиеяс. На пиысь öти — "Яг-морт". Кöть Яг-морт — мифологическöй образ, сійöс Изьваса важ йöз мöвпыштöмаöсь абу ылöсас, а босьтöмаöсь асланыс олöмысь, вöвлöмторъяс вылö подуласьöмöн. Öд быд учёнöй-фольклорист тöдö, мый мифология мыджсьö йöзлöн важся олöмын вöвлöмторъяс вылö, торйöн нин, кор найö гöгöрвоны позьтöмöсь да чуймöданаöсь. Мый Комиын овліс гöна морт, эскыны, дерт, зэв сьöкыд. А эмöсь абу та йылысь коми учёнöйяслöн гижöдъяс, ме весиг ог и öд. Лым морттö ме шуа гöна мортöн сы вöсна, мый асыввывса йöз — миянкöд орччöн олысьяс — хантъяс да манси — шуöны тадзи, кöть налöн эм и мöд ним — куль. Сідзкö, гöна морт нимсö лöсьöді эг ме, а сійö чужис важöн олысь йöз пöвстын, налöн легендаясын, преданиеясын да воис миян кадöдз.
Лым морт нимыс оз лöсяв гöнаыслы, öд сійö олö оз сöмын тöлын, но и мукöд кадö. Налöн мыгöрыс лымъяинас бурджыка тыдалö гöра весьтын либö вöрын серти, та вöсна и йöзыс ёнджыка казявлісны сэтысь да чайтісны, мый олöны найö лымъя гöраясын. Та понда и учё-нöйяс мырдöн кöвъялöны лым морт нимсö. Лымъяинас найö волöны лым увсьыс сёянтор корсьны. Некутшöм странаын сійöс оз шуны лым мортöн, роч учёнöйясысь кындзи. Быдлаын шуöны ас ногыс. Овлö, öти и сійö жö странаас шуöны 2-3 ногöн. Менам чайтöм серти, комиöн лöсялас кык ним: гöна морт да яг морт. Гöна морт йылысь менам эм татчöс йöзлöн сизим казьтылöм. Квайтсö на пиысь йöзöдлі "Парма гор", "Эжва йыв" да "Трибуна" газетъясын. Водзынджыктö йöзыд эз на кывлыны гöна морт йывсьыд да аддзылöм реликтсö чайтісны гориллаöн. Весиг кыптыліс сёрни, мый сійö пышйöма кутшöмкö зоопаркысь.
Ягкöдж гöгöрысь гöна мортöс аддзылöм йылысь сёрнисö медводдзаысь ме кывлі кольöм нэмса 70-öд воясö да босьтчи тöдмавны сы йылысь унджыктор. Газетъясысь да журналъ-ясысь чукöрті гижöдъяс, мед видзöдлыны, вермас-ö гöна мортыс овны Комиын. Тайö гижöдас ставыс збыль—ме ачым нинöм эг лöсьöдлы. Мый Комиын овліс да кöнсюрö олö на гöна мортыс, ме таö эска. Ачым кöть эг паныдасьлы, но унаöн аддзылöмаöсь. Кор ме пырöдчи таö пыдöджык, медводз шензьöдіс сійö, мый, вöлöмкö, миян Му вылын татшöм олысьыс абу нин сэтшöм гежöд, мöдарö, найö разалöмаöсь мир пасьталаыс, овмöдчöмаöсь кыкнан Америкаас, Евразияын, Африкаын, Австралияын. Эмöсь и Россияын, но сöмын овтöм местаясын, кöні абуöсь йöзыс. Александр Панюков лыддьö, мый Комиын гöна морт оз вермы овны. Юавсьö, а мыйла сы гöгöр вермö? Видла кытшовтны Коми мулöн "йöр" гöгöрыс. Миянсянь войвылын — яран му. Эг лысьтлы мöвпыштлыны, мый и сэні овлісны гöна мортъясыд, но сэтчöс "тунгуяс" корсюрö вöлöм пыравлöны чумъясö чöсмасьны кöр яйöн да кын чериöн. Шöйöвошöм йöзыс сэсся семьянас весиг эновтлöны оланінсö. Та йылысь висьталöны ненечьяслöн преданиеяс.
Водзö мунам асыввылö, Из гöра сайö — Юграö, кöні олöны хантъяс да манси. Тані реликттö шуöны гöна мортöн да нöшта кульöн (мутиöн). 1970 воын öти хант Каменскöй мыс дорысь аддзывлöма кык гöна мортöс, кодъяс пö дзик вöліны пасьтöмöсь да ставнас гöнаöсь, збоя мунöны да öта-мöдныскöд гораа варовитöны тöдтöм кыв вылын. Хантыд повзяс да пышъяс. Нöшта аддзывлöмаöсь некымынысь Васяково грезд дорысь. А 1898 воын Берёзово карсянь неылын öти кыйсьысь весиг лыйлöма кульсö. А водзö кö мунам асыввылö, то воам Сахаö (Якутияö). Роч му вылын сэні медкöдзыд, но гöна морт овмöдчылöма и сэтчö, а шуöны сійöс чучунааöн.
Миянсянь лунвылын — Киров обласьт. Мый сэні паныдасьлö гöна мортыс, оз нин ков ыстысьны ёна важся кад вылö. Öні на эмöсь. Та йылысь ёна нин гижлісны газетъясын, петкöдлісны телевизор пыр. Татчöс Верхошижемскöй районысь охотовед В.Сергеев öнія ка-дö нин некымынысь да матысянь аддзывлöма гöна мортöс, кодöс нимтöма Авдошкаöн. Сергеев весиг вердлöма сійöс мыр вылö сёян пуктöмöн. Неважöн сэтчö воліс экспедицияöн нималана уфолог В.Чернобров. Корсьысисны да аддзисны, кыдзи чайтöны, татчöс Авдошкалысь оланінсö.
Миянсянь рытыввылын —Архангельск обласьт. Гöна мортыд эм и сэні. Вайöда сöмын öти лоöмтор, мый йылысь гижліс обласьтса газет. Сиктса велöдысь мунас вöрö вотчыны да паныдасяс ошкöд, коді вот-вот уськöдчас сы вылö. Но лоас шемöсмöданатор: ош вылö бöрсяньыс уськöдчас гöна морт да чашвартас сійöс. Велöдысь, дерт, садьтöгыс пышъяс гортас. Сиктас чукöртчасны мужикъяс, мед ветлыны вöрас, оз-ö пöръясь велöдысьыс, да вайны ошкыслысь шойсö. Но сійö оз сюр, а местаыс пö зэв вирöсь, и нитшсö ёна лойöма. Ошсö, тыдалö, гöна мортыд "гортас" кыскöма. Та йылысь газетса гижöдыс эм менам гортын.
Артмö, Коми му гöгöр гöна мортыд овлöма. Тасянь позьö кывкöртавны, мый сійö овлöма да и олö миян пармаын.
Сё сюрс вояс чöж ас кежас олігад гöна морт велалöма венны сьöкыдлунъяссö да лоöма зэв вынаöн да винёлöн. Специалистъяс, кодъяс туялöны сылысь олöмсö, лыддьöны, мый гöна мортыд миян серти ставсö кылö да аддзö ёна бурджыка. И кöть кыдзи гöна морттö он кы-йöд, матысянь сійöс аддзывны он сяммы. Верман сöмын ёна-ёна ылысь, да ачыс гöна мортыс кö оз пов, аснаукöн матыстчас, öд сійö быдтор тöдны кöсйысь. Ми сылöн сюсьлун да вын во-дзын коньöр кодьöсь, да и мукöдторнас на гöна мортыд верктуй босьтö.
Менсьым юасьлöны, а мыйла пö сійöс оз кутны либö лыйны. Колö шуны, мый таысь чорыда öлöдö оланпас. Но öткымын странаын кутлісны и лыйлісны да эз этшаысь, но эз вермыны вайны, мед сійöс видлавны.
Гöна морт матыстчывлö йöз оланінö тшыг кадö, мед судзöдны сёян. Кор сійö тшыгъялö, вермас вöчны и лёктор. Öти гижöдысь лыддьылі, мый сылöн тшыгъялысь гöтырыс сёйöма ассьыс верöссö. Но сідзсö найö абу морт сёйысьяс. "Яг-морт" легендаын висьтавсьö, мый сійö пышйöдлöма Туган зонлысь Райда невестасö да сёйöма аслас изъя гуын. Тайö оз вермы лоны. Гöна морт оз сёй том нывъясöс, но вермас гусявны гöтыр вылö аслыс либö пияныслы. Öні уналаын на, мирса пыді пельöсъясын, кöні олö лыда морт, гöна йöз олöны накöд пöшти орччöн да тшöкыда паныдасьлöны, весиг тöдöны нин öта-мöдсö. Тайö йöзыс учёнöйяслы висьтавлöны гöна мортлöн олöм йылысь унатор. Тайöн и вöдитчöны учёнöйяс.
Унджык йöзыс, дерт, оз эскыны, мый гöна мортыд эм. Öтияс шуöны, мый оз эскыны, кытчöдз асьныс оз аддзывны. А ме ачым воча юавла: "А тэ вöрсьыс ошсö аддзывлін?" Эг пö. А ме воча: "Сідзкö, тэ ногöн кö, вöрас ошкыс абу жö?"
Мукöд ыстысьöны Комиын кöдзыд вылö. Сахаын овлö миянысь на кöдзыд, но чучунааяс оз повны таысь. Кор учёнöйяс лабораторияын видлалісны кыськö судзöдöм гöна мортлысь кучиксö, то сэсь аддзисны кынмöмысь видзан "вещество", коді пö уна сюрс во чöжöн артмö кöдзыд вöсна. Сійöс шонтö и гöныс, а шоныдсö терпитны оз вермы.
Эскытöмъяс эмöсь и Ягкöджын. Öтчыд, гожöмнас, кор пöдтісны номъяс, татчöс öти олысь меным шуис, тэнсьыд гöна морттö пö номъясыс вильöдасны, сылöн öд абу мавтчанторйыс, да шпыньмуніс, чайтіс, мый менö шöйöвоштіс. А ме сылы воча, мися, эм. Номъясыс асьныс оз матыстчыны гöна морт дорад, сы вöсна мый сійö зэв лёк дука. Нэм чöжыс оз мыссьывлы да та вöсна дыр каднад кучиквывса сылыс сорасьö ньылöмнас, няйтнас да таысь дуксьö, мыйысь артмö аслыспöлöс "репеллент", коді зэв бура видзö кучиксö гагъясысь, номъясысь, гутъясысь да "грибока" висьöмъясысь. А бокöвöйтö дуксьыс вермас восöдны, вермас и лёк лоны, кыдз висьталöны гöна мортöс туялысьяс. Найö та йылысь кывлöмаöсь аборигенъяссянь, кодъяслы мойвилöма аддзысьлыны гöна мортыскöд. Дуксö оз терпитны и понъяс, кодъяс нöшта и полöны сыысь. Ме гижлі нин, мый Югыдтыдорысь П.С.Уляшев вöралігас Агö керкасянь неылысь аддзылöма, кыдз ачыс чайтö, татшöмсö. Понйыс эськö уськöдчылöма сы вылö, но туй шöрас друг быттьö кынмöма, а сэсся никсігтырйи пышйöма кöзяиныслы кок улас, повзьöмысла сувтöма гöныс да тіралö вöлöм дзоньнас тушанас. П.Уляшев меным сьöлöмсяньыс шуліс: "Серав кöть эн, а яг мортыд эм!" Сэки гöна морт йылысь сёрниыс Комиын эз на пансьыв, а яг морттö тöдісны школасянь.
Гöна морт — абу зверь. Сійö — аслыспöлöс морт. Школатö эз помавлы да, дерт, грамотаыс абу, но вермас кокниа бöбйöдлыны и мывкыднас, и сюсьлуннас. Сійö понйысь на ныриса. Мортлысь дуксö кылö ылісянь. Шуам, тшöктасны кö кутны гöна мортöс, эштöма! Сылöн сюсьлунöдз не воöдчыны. Кутны сійöс — весьшöрö ноксьöм! А чукöрöн кö вöтлысьны — дзик нин тöлктöм мырсьöм. Йöз сёрни серти унаöн чайтöны, мый гöна морт вöрас öтнас шöй-тö. Оз, сылöн эм аслас семья. Пыдын вöрас, йöз синсайса лöнь пельöсын, лöсьöдö оланін, кöні эм нитшкысь да куясысь вольпась, юр весьтас — зэрысь да лымйысь вевт. Сійöс туя- лысьяс пиысь унаöн лыддьöны, мый гöна морт кужö сёрнитны ас кыв вылын.
А сідзсö гöна морт йылысь этша на мый тöдöны. Комиын тайö мортыс овліс да, гашкö, и öні на олö. Та йылысь висьталöны йöзлöн казьтылöмъяс да нöшта сійö, мый и Коми му гöгöрын эмöсь. Миянын та могысь эм позянлуныс: уна на вöрзьöдлытöм вöрыс, зверь-пöткаыс, быдсяма вотöсыс да с.в. Öні он и казявлы гöна морттö, öд сійö сюсьджык миянысь, и вермас кокниа пышйыны. Öнія кадö вöртö быдлаын ёна нин пасьвартісны техникаöн да, сійö пырис пыдöджык пармаö, кöні лöнь да йöзыс оз повзьöдлыны сійöс.
