Кöжмудорын кыпалысь выль школа йылысь миян газет эз нин öтчыдысь гижлы. От гöравывса челядь талун велöдчöны Туискерöсса шöр школаын, коді ёна нин важмöма да оз лöсяв талунъя кадыслы. И нёль во сайын шуисны стрöитны Кöжмудорын öнія проект серти выль школа. Стрöйбаыс ортсысяньыс дась нин, вевт улын и быдсöн.
—Но тайö зэв на этша, — висьта-лö Кöжмудорысь администрацияöн веськöдлысь Надежда Каракчиева. — Колö на вöчны зэв уна пытшкöсса удж, кыпöдны котельнöй, гараж, вöчны няйт ва весаланін. Сэк жö школасö эштöдöм могысь тавося планö абу на индöма вичмöдны сьöмсö. Виччысям, мый первой квартал помасьöм бöрын лоö пыр-тöма бюджетö кутшöмсюрö вежсьöмъяс. Та кузя шыöдчим Коми Республикаса Госсöветöн веськöдлысь Марина Дмитриевна Истиховская дінö.
Кыдзи висьталö администрацияöн веськöдлысь, кымын ёнджыка кутас нюжавны школа эштöдöм кузя уджыс, сымын унджык ковмас сьöмыс. Сідз, 2006 воын школасö кыпöдны заводитігöн сы вылö вöлі шуöма видзны 160 миллион шайт. А талун колö нин 360 миллион. Нёльöд во кыпöдöны тайö стрöйбасö, и öдйöджык колö помавны. Дерт, тавося сентябрь 1 лун кежлö öдвакö ставсö лоö эштöдöма. Кыдзи пасйö Надежда Ильинична, кöть нин пö во помöдзыс колö удитöдчыны. Сэк жö "Комижилстрой" котыр, коді таöдз вöчис став уджсö, öткажитчис помавны выль стрöйбасö. Сы вöсна, мый сьöмсö стрöитчысьяслы сетöны сöмын удж вöчöм бöрас.
Колö корсьны мöд пöдрадчикöс. Вöлі йöзöдöма конкурс. Но некод на эз вöзйысь.
—Миянлысь корöны кыдзкö дон-тöммöдны стрöитчан уджъяссö, — майшасьöмпырысь висьталö Надежда Каракчиева. — Вöзйöны эштöдны школасö гаражтöг. Но сытöг некы-дзи. Öд школалöн куим автобус, "Нива" автомашина, "МТЗ" трактор, мыйöн челядь велöдчöны уджавны да босьтöны механизаторлысь правояс. Чайтам, век жö Емдін районса юралысь Михаил Махмудов воöдчас öти кывйö республикаса Юралысь Вячеслав Гайзеркöд да петан туйсö лоö аддзöма.
Неважöн Коми Республикаса Госсöветысь национальнöй политика кузя комиссиялöн чукöртчылігöн Госсöветса депутат Вера Скоробогатова вöзйис босьтны син улö Кöжмудорса школалысь выль стрöйбасö. Гашкö, депутатъяслöн сёрниыс отсалас öддзöдны сэні уджсö.
