1936 вося август 30 лунö Максим Горькийлысь "Егор Булычёв" спектакль петкöдлöмöн воссис коми национальнöй театр. Ворсісны сэні Ленинградын велöдчöм бöрын воöм том йöз. Нёбдінса Витторлы ставныс вöліны тöдсаöсь, а кодсюрöкöд и уджавлісны öтлаын 1930-1931 воясö. Сэки Нёбдінса Виттор тöждöн да юрнуöдöмöн лöсьöдісны коми артистъясысь ворсан-ветлан котыр (КИППТ). Передвижнöй театрын этшаника быдмöм-велалöм бöрын ворсысьяс мунісны Ленинградö судзöдны збыль артист ним: 1932 воын — Ф. Юранева, Н.Дьяконов, И.Потолицын да П.Мысов, 1934-öдын — С.Ермолин, А.Каликова, И.Попов, Б.Фролов.
Со кыдзи тöдчöдіс Нёбдінса Виттор ассьыс быдтассö да уджсö коми театр воссян лунö: "Коми культура быдмöм-дзоридзалöм понда ме вермася буретш 18 во, 1918 вося августын Сыктывкарö воöмсянь. И чайта, мелöн моз коми театр вöсна первойя 10–12 восö некодлöн сьöлöмыс эз висьлы. Коми театр вöвлі менам ыджыд сьöлöм дойöн. Сійöн и торъя нимкодь талун меным: 18 вося тöждысьöмöй пöртсис збыльö". ("Вöрлэдзысь" газет,1936 вося август 30 лун).
Сыктывдінкарын театр радейтысьяс ворсісны комиöн 1919-сянь 1929 воöдз. Сэсся уна помка вöсна ланьтöдчисны: то дасьтысьны сьöмыс эз вöв, то ворсны нинöм, то артистъясöс спектакль лунö удж вывсяньыс мöдлаö ыстöны (найö öд ас окотасьыс спектакасьöны). Нёбдінса Виттор аддзис петан туй — вöзйис облисполкомса власьтлы лöсьöдны пыр кадся, кадколасттöг уджалан театр, кöні артистлы мöдасны мынтыны удждон. Виктор Савин тшöтш шуис коланаöн ышöдны том йöзöс локны сиктысь Сыктывкарö велöдчыны ворсны театрын. Татшöмыслы пö колö восьтыны студия — кык вося велöдчанін.
"Сöмын куш театр уджö велöдöмыд этша на лоö, — гижö Нёбдінса Виттор 1930 вося январь 20 лунö "Вöрлэдзысь" газетын "Коми театр йылысь. Колö студияын велöдны йöзöс, лöсьöдны кадр. Колö выль репертуар" статьяын. — Миянлы колöны тшöтш сьылысьяс. Коми войтыр мукöд культурнöй йöзысь оз кöсйы бöрö кольччыны. Ми мöвпалам лöсьöдны непöштö прöстöй сьыланкывъяс, а тшöтш и операяс. Студияас лöсьöдны кык юкöн: театральнöй да музыкально-хорöвöй". Виктор Савин гижö сьöлöмсяньыс, кужöмöн подулалö кусöм театрлы ловзян туй. Сійö чукöстö коми войтырöс корсьны-аддзыны ас пытшкысь коми театр ловзьöдны-сöвмöдны вын-эбöс.
Вöзйöмыс эз збыльмы. Студия пыдди 1930 вося сентябрь 5 лунö Сыктывкарын восьтісны тöлысся курс. Кыдзи муніс велöдчöмыс да мый сыысь артмис, бара жö тöдмалам Нёбдінса Витторлысь.
"Веськалісны, дерт, унджыкыс сиктса том йöз, войдöр сцена вылын пöшти ворслытöмъяс, кыдзи шусьö — "уль материал", дай ичöтик грамотааöсь. Велöдны да велöдчыны вöлі сьöкыд: öти-кö, ве-лöдысьясыс рочöсь, а велöдчысьясыс рочнас омöля гöгöрвоöны, мöд-кö, коми репертуар эз вöв.
Бура зільöмöн да сьöлöмсянь тільсьöмöн курс прöйдитім… Дерт, татшöм регыдъя кадöн уна велöдны эгö вевъялö. Мый удитім, и сійö зэв бур. Коми театрлöн подулыс эм нин.
Медводдза коми труппа таво кежлö лоö дас куим мортысь: 1 руководитель-режиссёр, 1 инструктор, 10 артист да 1 гудöкасьысь.
Ассьыс медводдза уджсö коми труппа петкöдліс нин кыкысь — октябрь 12 да 19 лунъясö Сыктывкарса театрын спектакльяс дырйи. Кыкнан рытас йöзыс вöлі театр тыр. Тайö нин петкöдлö: коми труппа, кöть муртса на уджас босьтчис, кужö сцена вылын асьсö кутны, дай сетö надея водзö кежлö коми театрлы кыптöм вылö". ("Ордым" журнал, 1930 вося 20№).
Гижöдас Нёбдінса Виттор тöдчöдö: ёна пö и ноксьыны лои, кор тулыссянь курсыс пыр нюжаліс. Сэтчöдз на ковмис эновтчыны студия котыртöмысь. Дыр виччысьöмыс помасис, кор Мöскуаысь воисны кык велöдысь (öтиыс музыкаö велöдны), и сентябрь 5 лунö курсыс воссис. Сэсся содтö: "Сöмын сэтчö йöзсö лои босьтны бурджыка бöрйытöг (кодъясöс вöлі корам, эз сетны мукöд организацияяс)". Курсас эз веськав Александр Даньщиков, кöть гижліс Нёбдінса Витторлы артистöн лоны кöсйöм йывсьыс.
"Ёрт В.А.Савин. Ме тэныд шыöд-ча прозьба, кодöс урчита улö.
Ми кöсйым сетны заявленьö студияö. Но миянöс кыдзык бригадиръяс командирным эз лэдз. Бригадаас комсомолецысъяс абу да сiйöн, а öнi ледзе, приёмныс тiян студияас буракесь кончитчыс нын. Вот та кузьта есликö позяс локны тэ миянлы мöдöд татшöм адрес вылö юöр асланыд. С. Вомын Шойнаты район, бригадиру Даньщикову Александру Егоровичу.
Наверне тiянлы ковмасны отзывъяс и документъяс. Еслике позяс нин локны. Ми Вомынысь кыкен. Мöдыс Даньщиков Иван Васильевич, тоже бригадир. Менам товарищ. Сылöн сiдз жö зев ыджыд желанье. Ачым ме велöдчывлi Сыктывкарын 2-öд ступеньын 5 группаын. Та кузьта верма же документсö. 1927 воын велöдчывлi Шойнаты семилеткаын 6 группаын. Семилеткасьыс гортса дугöдiсны, потому что гортысь кулi дедушка, уджалысьыс эз коль да сы понда. Кутшöмторъяс ковмасны документъяс верма ставсö представитны, мый кудзта и тэнö беспокоитым. Комсомолскöй привет — Даньщиков Александр Егорович. 19. 04. 1930 во". (Национальнöй архив. ФР-148, опись 1, 460 делö, 54-55 л.б.).
Вомынысь комсомолец Александр Егорович Даньщиков дас кык арöс-сянь кöсйис лоны артистöн, унаысь ворсліс чужан сиктас да Шойнатыын пуктылöм спектакльясын. Дас вит арöсаöн, комсомолö пырöм бöрын, Александр ёртъясыскöд котыртісны 15 нылысь да 17 мужичöйысь бригада да вöр лэдзысь котыръяс пöвстын ордйысьöмын нёльысь босьтлісны медводдза места да вуджана гöрд дöрапас.
Вöрын первойя тöв уджалігас на шойччан кадö драмкружок пуктыліс спектакльяс. Студия котыртöм йылысь газетын лыддянторсö Александр чайтö сылы инманаöн да шыасьö Нёбдінса Виттор дорö веськыда. Но артистöн лоны, колхозын да мукöдлаын кывкутана уджысь вöзйысьны сэки эз артмы. Даньщиковöс век жö эз вунöдны да кык во мысти корисны Сыктывкарö, кöні бöръян комиссиялы петкöдчöм бöрын сійöс дас вит том морткöд öтвылысь ыстісны Ленинградö велöдчыны артистö. Сэк кежлö зон мода серти вежис ассьыс овсö да лоис Александр Зинöн.
1936 вося август 30 лунö "Егор Булычёв" спектакль видзöдігöн Нёбдінса Виттор нимкодясьöма сы ворсöмöн. А мöд лунся газет рецензияын Педь Гень (Г.А.Фёдоров) гижис: "Видзöдысьлöн дыр кежлö кольöны паметяс Максим Горькийлöн реалистическöя серпасалöм образъясыс. Кызь öти арöса артист Зин, комсомолец (ворсіс Булычёвöс), завоюйтіс видзöдысьяслысь симпатия аслас босьтчöдана ворсöмнас. Сійöс, тöдöмысь, кутас радейтны публика".
"Ме лыддьылі да лыддя уна книга, классикъяслысь да öнія ги- жысьяслысь. Ёна уджала ас вылын. Кута уджавны нöшта бура", — кöсйысис Александр Зин 1937 вося январь 1 лунö петöм газетын. — Ме ворсі татшöм рольяс: Президентöс — Шиллерлöн "Коварство да любов", Гошаöс — Киршонлöн "Чудеснöй сплав", Платон Кречетöс — Корнейчуклöн татшöм жö нима пьесаын. Öні дасьта Д.Фурманов пьесаын Чапайлысь роль".
1940 вося февральын "Коми АССР-са заслуженнöй артист" ним сетісны медводз вит артистлы, тшöтш и А.Е.Зинлы.
СнимокЪяс вылын:
В.А.Савин коми театрын ворсысьяс Архангельскысь воöм бöрын. А.Е.Зин первой рад шöрас.
1937 вося гожöмын гастроль дырйи вöлі петкöдлöма и А.Пушкинлысь В.Савинöн комиöдöм "Русалка" (медводдза картина).