Новости Республики Коми | Комиинформ

"Югыд ваын" зарни перйыны оз позь

"Югыд ваын" зарни перйыны оз позь
"Югыд ваын" зарни перйыны оз позь
logo

Россияса Верховнöй суд кывкöрталіс, мый "Югыд ва" национальнöй паркысь "Чудное" зарни куйлöдсö петкöдöмыс торкö Россияса оланпас да войтыркостса став кöсйысьöмсö.

Казьтыштам, Россияса Гринпис некымын во чöж шыöдчывлöма став тшупöдса ёрдö. И сöмын Генпрокуратура быд ногыс отсасьöма "турунвижъяслы". Медбöрын ассьыс вына кыв шуöма и странаса Медвылыс ёрд.

Россияса Гринпислöн вöр-ва видзанінъяс кузя уджтасöн веськöдлысь Михаил Крейнд-лин тöдчöдіс, мый Россия-са Минприроды, кыдзи и водзті, зілис эскöдны, "Чудное" зарни куйлöд пö некор эз вöв "Югыд ва" национальнöй парклöн борд улын. Но та дырйи судыслы эз вермыны петкöдлыны ни öти татшöм документ. А Гринпис вайис карта, кöні ясыда тыдалö, мый нацпарк котыртігöн "Чудное" пырöма сэтчö.

Пасъям, зарни куйлöдсö босьтчисны петкöдны "Югыд ва" паркысь кольöм нэмся 90-öд вояссянь. Но та йылысь быд выль индöдсö сэки "турунвижъяслöн" зільöмöн киритлісны. Сэсся Россияса Минприроды урчитіс парк йылысь индöд, код серти "Чудноесö" сэтысь век жö петкöдісны. Роснедра сетіс "Голдминералс" ВАК-лы озырлун перйöм могысь лицензия. И сэні заводитісны уджавны геологъяс. Космоссянь вöчöм снимокъясыс ясыда петкöдлöны налысь зільöмсö.

Печора-Ылыдз государственнöй заповедникса вöрзьöдлытöм вöрсö ЮНЕСКО пыртіс ставмирса наследиеö. Но со тадзи виччысьтöг да аснаукöн "Чудное" зарни куйлöдсö, позьö шуны, шышкалісны.

Дерт, ЮНЕСКО чöв овны эз жö вермы. Аслас комитетлöн чукöртчылöм вылын кыкысь кыпöдлöмаöсь юалöм, медым Комиысь вöрзьöдлытöм вöрсö пыртны "Всемирное наследие под угрозой" пас улö. Öд татшöмас сэсся оз нин позь корсьысьны-туясьны ни перйыны зарни. А 48 сюрс гектар асалöм пондаыс вермас тöдчымöн чинны вöрзьöдлытöм вöр-ваыслöн тöдчанлуныс. Бур, мый Россияса Медвылыс ёрд шуис ассьыс вына кывсö.

Михаил Крейндлин пасйис, мый öні сэсся, гашкö, вöрзьöдлытöм вöр-ваын зарни перйöм йылысь сёрниыс лöняс.

Но Россияса Минприроды век жö вермас на шыöдчыны судö сідз шусяна апелляцияöн...