Республикаса юркарын 5 во коставлöм бöрын бара на котыртлісны бур пöрöдаа пемöс-лэбач петкöдлан-вузавлан выставка. Таво сійöс нуöдісны дас кыкöдысь нин "Бöрйы ассьыным!" пас улын.
–Важ йöз зэв стöча шулöмаöсь: омöль кöйдыссьыд пö бурыд оз чуж. Та вöсна талун зэв колана рöдмöдны овмöсъясын бур пöрöдаа пемöс-лэбач, – пасйис республикаса видз-му овмöс да сёян-юан кузя министр Сергей Чечёткин выставкасö восьтігöн. – И сьöмöн дзескыд кризис кадö кö ми водзö эг нуöдöй скöт бурмöдöм кузя уджсö, талун эськö эг лысьтöй мöслысь вонас 4 сюрс тонна йöв да юим-сёйим кызвыннас бокысь вайöм вöлöга.
Татшöм выставкаяс дырйиыс видз-му вöдитысьяс вермöны тырвыйö петкöдлыны скöт бурмöдöм кузя ассьыныс уджнысö, юксьыны сямнас, а сідзжö ньöбны налы лöсялана пемöсъясöс. Комиын медводдза выставкасö котыртлісны Печораын 1970 воын нин. Республикаса 10 овмöс петкöдліс сэні 102 öш-сюрукöс. Та бöрын ас выставка нуöдісны Сыктывкарын, республикаса племобъединениеын.
Став Союзса да став Россияса смотр-конкурссö медводдзаысь котыртлісны 1971 воын. "Изваильский-97", "Южное", "Ухта-97", "Пригороднöй", "Северное" да "Ыджыд Инта" унаысь шедöдлісны сэні мöд да коймöд места да бергöдчывлісны Москваысь дона козинöн. Сьöма премия кындзи овмöсъяслы вичмöдлісны и техника – "УАЗ-469" да "Москвич" машинаяс. 1990 воын Союзын выставкасö нуöдны дугöдісны, а вит во мысти Комиын сійöс бöр "ловзьöдісны".
Тавося выставкаын петкöдчис республикаса 10 овмöс. Юркар дорын матыс районъясысь да Чилимдінысь видз-му вöдитысьяс вöзйисны донъявны да ньöбны 40 öш-сюрукöс, а сідзжö кöза, ыж, дзодзöг, курöг да чери. Вермысьнас шуисны Луздорысь "Южное" ООО-öс, мыйысь предприятиелы вичмис 20 сюрс шайт. Мöд места да 15 сюрс шайтöн шедöдісны "Пригороднöй" ООО да "Ухта-97" племхоз. Коймöдöн шуисны "Изваильский-97" племхозöс. Сылы сетісны 10 сюрс шайта премия.
Пасъям, талун Коми Республикаын скöт бурмöдан уджсö вöчöны 13 видз-му овмöсын. Холмогор пöрöдаа сюрукъясöс рöдмöдöны "Изваильский-97" да "Ухта-97" племхозъ-ясын, "Пригороднöй" да "Южное" ООО-ясын, "Заря-1" да "Корткерос-1" СПК-ясын, "Инта Приполярная" агрокомплексын, "ВНЭБС" предприятиеын да "Коми" РГУСП-ын. Айршир мöс видзöны "Палевицы" да "Вишерскöй" СПК-ясын, "Коми" РГУСП-ын. Кык овмöсын – "Севернöй" ООО-ын да "Оленевод" ПСК-ын быдтöны войвыв кöр.
Дерт, тайö предприятиеясыслысь бур да чöскыд вöлöгасö тöдöны республикаса олысьяс, öд найö важöн нин пырöдчисны "Бöрйы ассьыным!" уджтасö, кодöс войтыр ёна пыдди пуктöны.