Койгорт районса Грива сиктысь Кирилл Нечаев таво помалöма школа. Экзаменъяссö гижöма бура. Öні мöвпалö, кытчö мунны велöдчыны водзö: прокуратура институтö либö вузö, кöні дасьтöны МЧС-лы уджалысьясöс.
Кирилл оз пов мунны ылі карö. Но документъяс сетас и Сыктывкарса университетö.
Снежана чойыс, коді мöд во нин велöдчö Кировса медакадемиялöн Коми юкöнын, ышöдö зонмöс босьтны вылыс тшупöда тöдöмлунсö ыджыд карын. Бать-мамыс абу жö паныдöсь, мед кöть и ковмас янсöдчыны пиыскöд дыр кежлö.
Кирилл ошкö ЕГЭ-сö. Оз нин пö ков мöдысь гижны вузö пыран экзаменъяс да ветлыны та могысь мöд карö. Документъяс жö позьö ыстыны пошта пыр.
Экзаменъяс гижисны и 9 класс помалысьяс, тшöтш и Кириллöн ёртыс — Яша Ануфриев. Сійö кöсйö водзö велöдчыны Сыктывкарса связь да сервис колледжын электромонтёрö. Но зонлы сьöлöм сертиыс и физкультура велöдысьлöн уджыс. Мöвпыштла на пö, шуö Яков.
Сентябрöдз зонъяслöн эм на кад и гожйöдчыштны, Сыктыв юын уялыштны да бать-мамыслы гортгöгöрса уджын отсасьыштны.